Ditari

Ministri i Punëve të Jashtme i Republikës së Kosovës, Enver Hoxhaj, po planifikon që ta dërgojë në stafin diplomatik të Kosovës edhe njërin nga këshilltarët e tij. Në vazhdën e punësimeve të anëtarëve të kabinetit të tij, ai së shpejti do ta dërgojë si ambasador në Bruksel këshilltarin e tij politik, Gëzim Visoka.

Burime të besueshme të “Zërit” brenda Ministrisë së Punëve të Jashtme kanë treguar se kryediplomati kosovar tashmë ia ka “vënë syrin” Ambasadës së Kosovës në Belgjikë, dhe se ka vendosur që për ta rehatuar këshilltarin e tij ta “sakrifikojë” ambasadorin aktual, Ilir Dugolli.

“Ministri e ka vendosur që këshilltari i tij, Gëzim Visoka, të bëhet ambasador në Bruksel. Përveç se është staf politik, Visoka është shumë i ri në moshë, dhe nuk ka asnjë ditë përvojë pune si ambasador. Qëllimi është që të futet në mesin e stafit diplomatik, e pastaj të zhvillohet aty si diplomat. Përveç kësaj, Visoka e ka bashkëshorten në punë në Bruksel...”, thotë burimi i gazetës.  

Ndërkaq, sipas burimit, ministri Enver Hoxhaj po planifikon që ambasadorin aktual në Bruksel, Ilir Dugollin, ta dërgojë në Suedi, në vend të Lulzim Pecit, i cili është emëruar i dërguar i Kosovës në Beograd, ndërsa vendin e mbetur bosh në Bruksel ta plotësojë me këshilltarin e tij politik.

“Ideja është që njëkohësisht ta punësojë këshilltarin e tij në stafin diplomatik dhe ta largojë ambasadorin Ilir Dugolli nga Brukseli, sepse, Dugolli nuk është militant i PDK-së dhe me të s’po mund të manipulojnë si me shumë ambasadorë të tjerë”, ka theksuar burimi.

Ky nuk është rasti i vetëm kur Hoxhaj më shumë është angazhuar në “konvertimin” e stafit politik në staf diplomatik e konsullor, sesa në kryerjen e punëve të shtetit ashtu siç duhet.

Para pak ditëve, përkatësisht në fund të muajit të kaluar, ministria që ai e drejton ka marrë vendim që dy bashkëpunëtorët e tij të ngushtë, Lulzim Pllana e Heroina Telaku, të kalojnë nga kabineti i ministrit, përkatësisht nga stafi politik në staf civil.

Këshilltari i tij politik, Pllana, është zgjedhur zyrtar i Lartë për Këshill të Evropës, ndërsa shefja e kabinetit të tij, Telaku, Zyrtare e Lartë për BE – Parlament, Bruksel Strasburg.

Mirëpo, zyrtarët e Ministrisë së Punëve të Jashtme e kanë mohuar kategorikisht se janë duke u bërë “kalkulime” për emërimin e këshilltarit të ministrit Hoxhaj në pozitë të ambasadorit. 

Drejtori i Zyrës për Informim në MPJ, Artan Behrami, ka mohuar kategorikisht se Gëzim Visoka do të përfitojë pozitë të ambasadorit falë të qenit i afërt me kryediplomatin kosovar.

“Kjo informatë lidhur me këshilltarin e ministrit, Gëzim Visoka, është e pavërtetë. Me të kurrë nuk është diskutuar dhe kurrë nuk është konsideruar për këtë pozitë, apo për ndonjë pozitë tjetër në shërbim të jashtëm diplomatik të Kosovës”, ka thënë ai.

Nga ana tjetër, të gjitha këto veprime të ministrit të jashtëm, nga partitë opozitare  cilësohen si tejet të dëmshme për shtetin e Kosovës.

Deputetja e LDK-së, Vjosa Osmani, thotë se ministri Enver Hoxhaj përditë po dëshmon se prioritet i tij në politikën e jashtme është pikërisht rehatimi i militantëve partiakë në pozita shtetërore.

“Besoj që ky është edhe një veprim i kësaj ministrie i cili vërtet po e shkatërron shërbimin diplomatik të Republikës së Kosovës. Ministri Hoxhaj deri tani ka dëshmuar se nuk i interesojnë procedurat, se deri tani nuk i interesojnë meritat e njerëzve apo përgatitjet profesionale të tyre. Prandaj, është për keqardhje që pretendon që me kontrabandime të tilla të fusë njerëzit e tij në shërbimin diplomatik”, thotë ajo.

Osmani shprehet e bindur se kjo është një agjendë e kryediplomatit kosovar që duke i vendosur këshilltarët e tij nga pozitat politike në ato civile t’i dërgojë jashtë vendit si zyrtarë në ndonjërën prej ambasadave dhe konsullatave të shtetit.

Behrami: Dugolli është propozuar për në Suedi!

Artan Behrami nga MPJ-ja e ka pranuar se ambasadori aktual në Bruksel, Ilir Dugolli, së shpejti do të largohet nga kjo ministri, ndërsa ka theksuar se MPJ-ja është në fazën finale të përzgjedhjes së ambasadorit të ri, i cili do ta drejtojë ambasadën e Kosovës në Suedi.

“Përzgjedhja e ambasadorit të ri në Suedi është duke u shqyrtuar dhe është në fazën finale të përzgjedhjes. Ne kemi propozuar ambasadorin Ilir Dugolli tek presidentja e Kosovës. Është në procedurë dhe varet nga presidentja se kur do ta dërgojë”, ka nënvizuar Behrami.