அரங்கனின் ஆணைப்படி வல்லி என்ற பெண்ணொருத்தி மூலம் தோன்றிய வல்லிப்புத்தூரில் குடியேறிய வேயர்கள் எனும் முன்குடுமிச் சோழிய மரபில் வந்த முகுந்தபட்டர் எனும் அந்தணருக்கு, அவர்தம் பெருந்தவத்தின் பயனாய், குரோதன ஆண்டு, ஆனி மாதம், சுவாதி நட்சத்திரத்தில், எட்டாம் நூற்றாண்டில் பிறந்தவர் விஷ்ணுசித்தர் எனும் பெரியாழ்வார். நந்தவனம் ஒன்றை அமைத்து அதில் நில, நீர், கொடி மற்றும் கோட்டுப் பூக்கள் என்று நால்வகை பூக்களையும் வளர்த்து, பரந்தாமனுக்கு நித்தம் சமர்ப்பித்து வந்தார். அன்றைய அரசனின் " பரம்பொருள் எது? " என்ற கேள்விக்கு, பரந்தாமனின் ஆணைப்படி அரசவை சென்று, வேத விற்பன்னர்கள் முன்னிலையில் பரம்பொருளின் ததுவம் சொல்லி " பட்டர்பிரான் " என்ற பட்டம் பெற்றார். பெரியாழ்வார் பாடிய 469 பாசுரங்கள் " பெரியாழ்வார் திருமொழி " என்று அழைக்கப்படுகின்றது.