Mover Ficha

Tornar a indignación en cambio politico

Igual que en atros momentos d'a historia, veyemos hue un continent europeu immerso en a perplexidat. Entre que as mayorías miran con nostalchia o pasau perdiu, unas poderosas minorías, sin atro criterio que a suya propia supervivencia, contrimuestran que l'enriquimiento ye o suyo sinyal y a impunidat o suyo horizont. Nunca en Europa no i hai habiu tanta chent descontenta con a perda de dreitos y, de vez, menos perspectivas de poder canalizar ixa indignación a traviés de bella opción electoral que emocione y que, de vez, contrimuestre capacidat de representación d'as mayorías trucadas y capacidat de chestión eficient y compromesa que faiga reals as millors opcions posibles. Resulta ta muitos intolerable que en a crisi mas gran d'o sistema dende o crack de 1929, as fuerzas que se dicen progresistas amuestren a suya mayor febleza, condenando a las mayorías d'os nuestros países a una suerte de malinconía que conduz a la resignación y a la depresión poliitica. Pero hemos pasau por piors momentos y somos estaus capaces de sobreposarnos a las dificultatz. Por qué habría d'estar agora diferent?

As esleccions a o Parlamento Europeu se van a celebrar en un momento de funda crisi de lechitimidat d'a Unión Europea. En o nuestro caso, somos debant d'a mayor perda de credibilidat d'o rechimen naixiu con a Constitución de 1978. Movimientos d'indignación politica como o 15M connectoron con una clara voluntat popular: no sacrificar maas dreitos en l'altar d'uns mercaus guiaus por a especulación y a rapinya. A impotencia u desistimiento de responsabilidatz d'os Gubiernos, a incapacidat voluntaria d'os partius politicos de gubierno, a conversión d'os Parlamentos en organos burocraticos y sin capacidat politica y o desconcierto d'os sindicatos han deixau a la ciudadanía abandonada a la suya propia suerte. Como en tantos atros países, a perplexidat ye estando emplegada ta tornar os deudos privaus en publicos, ta trascolar a grupos particulars os biens comuns devantaus entre deecadas y ta adedicar os zaguers recursos puublicos a la financiación d'intreses interpresarials particulars y estreitos. Somos debant d'un Golpe d'Estau financiero cuentra os lugars d'o sud d'a Eurozona. Os que mandan son vendendo o país y o nuestro futuro a micazas. L'aumento d'a represión (con leis maas autoritarias, incremento d'as pinyoras en un scenario d'empobrimiento econoomico y, mesmo, dificultatz ta l'exercicio de dreitos civils y poliiticos) remata de completar un paisache dominau por l'agreviamiento d'as desigualdatz socials y de chenero y una mayor depredación d'os recursos naturals. No ye extranio o pesimismo y o derrotismo que pareixen amostrar sectors a os quals, manimenos, les sería prou una purna d'ilusión ta salir d'ixa trapa d'a desasperanza.

As leis de seguranza ciudadana (que tornan en delito as formas de protesta engueradas por o 15M), a tornada d'a represión cuentra a libertat d'as mullers, o escabezamiento d'a democracia en os ambitos politicos locals, o mayor control d'os medios de comunicación u o control d'a chudicatura quieren creyar un scenario an que o espanto suspenda a democracia. Trazas que caminan enta rechimens autoritarios embolicaus en procesos electorals mas vuedos de conteniu por cada vegada. Tien sentiu que o 90% d'a población que ye sufrindo istas politicas no se dote de ferramientas ta creyar un esdevenidor mas luminoso?

Pero no ye cierto que sigamos instalaus en a redota. Manimenos ixos intentos, veyemos que ixe muro no ye infranquiable y que, dende abaixo, ye posible frenar istos procesos d'involución d'as nuestras democracias. Hue ye una realidat a nuestra exichencia d'una politica que torne a las carreras, que charre como a mayoría d'a chent que ye farta, ye mas real que nunca a nuestra exichencia d'una mayor chenerosidat a os representants, d'una mas gran horizontalidat y transparencia, d'una tornada d'as valors republicanas d'a virtut publica y a chusticia social, d'a reconoixencia d'a nuestra realidat plurinacional y pluricultural. Feba decadas que no yera tant real o nuestro deseyo de prener as nuestras propias decisions y responder a las nuestras propias preguntas. A casta nos conduz a l'abismo por o suyo propio beneficio egoísta. Nomás d'a ciudadanía puede venir a solución, como han veniu a protección de l'emplego, a esfensa d'as familias frenando desfiuzamientos u a guarancia d'os servicios publicos, chicotas pero significativas victorias. A movilización popular, a desobediencia civil y a confianza en as nuestras propias fuerzas son imprescindibles, pero tamién en ye forgar claus ta ubrir as puertas que hue nos quieren zarrar: fer plegar a las institucions a voz y as demandas d'ixa mayoría social que ya no se reconoixe en ista UE ni en un rechimen corrupto sin recheneración posible.

En as venients esleccions a o Parlamento Europeu ye necesario que i haiga una candidatura que s'ofreixca a la onda d'indignación popular que enlucernó a o mundo. Nos alegramos de l'abance d'as fuerzas d'a zurda, pero somos conscients d'a necesidat de fer bella cosa mas ta enchegar os cambios que amenistemos. Ye tiempo de valentor y de no deixar que se zarre a finestra d'oportunidat que o compromís de tanta buena chent ha ubierto. Amenistemos una candidatura unitaria y de ruptura, encabezada por personas que exprisen nuevas trazas de relacionar-se con a politica y que supose una menaza real ta o rechimen bipartidista d'o PP y d'o PSOE y ta qui han seqüestrau a nuestra democracia. Una candidatura que sume a la capacidat de chestión de lo publico, a capacidat d'embrecar a las mayorías en a configuración d'o suyo propio futuro. Una candidatura que dé respuesta a ixa choventut a la quala se convida a abandonar unatra vegada o país, a uns treballadors que veyen mermaus día a día os suyos dreitos, unas mullers que han de tornar a reclamar l'obvio, unas personas mayors a las qualas pareixe no haber-les estau pro luitar y treballar toda una vida. Una candidatura que abance dende os espacios ya asolaus y que aconsiga abanzar dillá d'a paralís actual. Una candidatura que mueva ficha ta convertir o pesimismo en optimismo y o descontento en voluntat popular de cambio y apertura democratica.

  1. Una candidatura por a recuperación d'a soberanía popular: ye a ciudadanía qui ha de decidir, no pas a minoría egoísta que nos ha trayiu dica aquí. En primeras van as necesidatz d'a chent. L'austeridat y los retalles afogan a economía y as nuestras vidas. Cal derogar l'articlo 135 d'a Constitución espanyola y cal una moratoria ta levar a cabo una auditoría ciudadana d'o deudo que determine qué partes d'a mesma no son lechitimas; os deudos ilechitimos no se pagan. Ye menister una politica alternativa que estableixca un impuesto sobre as transaccions financieras y o control sobre o movimiento de capitals, asinas como a nacionalización d'a banca privada. As administracions que en o nuestro país han asumiu as recetas de l'austeridat son a preba d'a inutilidat d'as mesmas ta resolver os problemas d'a chent. Queremos una candidatura que s'opose por tanto a las retalladas que en nombre de l'austeridat s'aplican por parte d'o Gubierno d'o PP en o Estau pero tamién por parte d'o PSOE y atros partius en diferents Comunidatz Autonomas. Queremos unatra Europa, chusta, a d'os dreitos y a democracia, no a d'a rapinya y o desprecio a os pueblos.
  2. Una candidatura que, debant d'uns gubiernos a o servicio d'a minoría de l'1% reivindique una «democracia real» basada en a soberanía d'os pueblos y en o suyo dreito a decidir o suyo futuro libre y solidariament. A democracia no nos fa miedo a las y os democratas; somos encantaus y encantadas que escoceses y catalans puedan charrar y decir qué futuro deseyan. Por tanto, que empara a celebración d'a consulta convocada en Catalunya ta o 9 de noviembre.
  3. Una candidatura que esfienda os salarios y pensions dignas, una fiscalidat progresiva ta que paguen mas os que mas tienen, que persiga o frau fiscal, que refuse os despidos en interpresas con beneficios, y que apueste por o reparto de totz os treballos, incluiu o treballo domestico y de cudiaus no remunerau. Ye fundamental desfender condicions de treballo dignas ta una choventut condenada a la precariedat eterna u a l'exilio.
  4. Una candidatura por o dreito a la vivienda digna. Cal empentar un parque de vivienda publica, asinas como un modelo de loguero social seguro y digno. Se puede y se debe rematar con o drama humano d'os desfiuzamientos, aturando-los totz y aprebando a dación en pago retroactiva, como exiche a Plataforma d'Afectaus por a Hipoteca.
  5. Una candidatura que refuse todas as privatizacions de servicios publicos y biens comuns: a educación, a sanidat, a chusticia, o transporte, a información, a vivienda u a cultura, que desfienda a reversión d'as mesmas y apueste por a suya chestión democratica. Son dreitos y han d'estar baixo control publico. Una candidatura que desfienda una democracia radical a on os referendums vinculants y as ILP faigan parte destacada d'un nuevo ordinamiento jurídico dimpués d'un proceso constituyent.
  6. Una candidatura que combata a violencia masclista y esfienda o dreito d'as mullers sobre o suyo propio cuerpo y, por tanto, o dreito a decidir si quieren interromper u no pas o suyo embrazo. Y que desfienda asinasmesmo a libertat d'orientación y identidat sexual cuentra toda forma de discriminación y homofobia. Una candidatura por l'increbantable dreito a estar y amar como se quiera.
  7. Una candidatura que apuesto por un cambio de modelo productivo que siga a o servicio d'as personas a traviés d'una reconversión ecolochica d'a economía, por a nacionalización y socialización d'as interpresas enercheticas y por a soberanía alimentaria.
  8. Una candidatura que desfienda os dreitos de ciudadanía ta totz y todas y exicha a derogación d'as leis d'extranchería. Una candidatura ta un país an todas y totz sigamos ciudadanos y dengún no siga invisible, presa d'a sobreexplotación, a persecución u a marchinalidat por a xenofobia institucional.
  9. Una candidatura que refuse as intervencions militars, que desfienda a salida d'a OTAN y siga firme defensora d'as relacions solidarias entre os lugars.
  10. Una candidatura que siga o resultau d'un proceso participativo ubierto a la ciudadanía, en a elaboración d'o suyo programa y en a composición d'a lista paritaria, basada en os criterios de presencia d'activistas socials, politicos y culturals, con rotación de cargos y ingresos equivalents a o salario medio. Una candidatura con compromís de transparencia y rendimiento de cuentas, que os suyos recursos financiers sigan independients d'a banca privada y d'os “lobbies”.

Qui sinyamos iste manifiesto somos convencius que ye o momento de fer un paso enta debant y que fendo-lo imos a trobar-nos-ne muit@s mas. Os d'alto nos dicen que no se puede fer soque aconhortar-se y, como muito, trigar entre as colors de siempre. Nusatros pensamos que no ye tiempo de arrenuncios sino de mover ficha y sumar, ofrindo ferramientas a la indignación y o deseyo de cambio. En as carreras se repite insistentment "Sí se puede". Nusatras y nusatros decimos: "Podemos".