Датум:
18.11.2013, 18:06 По двегодишна пауза повторно на Детски евросонг
Барбара во Kиев ќе пее за Охрид
Барбара Поповиќ (13) со песната „Охрид и музика“ ќе се обиде да ја освои европската публика на Детската евровизија, која ќе се одржи на 30 ноември во Kиев, Украина. На изборот ќе се претстават 12 држави, а Македонија ќе настапи петта. Таа е комплетен автор на евровизиската композиција. Македонската радио-телевизија, носител на проектот, ја избра нашата претставничка на аудиција.
Атрактивен настап
Барбара е осмоодделенка во скопското училиште „Kочо Рацин“. Со музика се занимава од својата шеста година. Завршила нижо музичко училиште во МБУЦ „Илија Николовски Луј - отсек пијано. Пее во хорот „Пиколо“ а компонира од осмата година.
- Песната е певлива и имаме убав сценски настап. Очекувам да ја освојам европската публика и да обезбедам висок пласман. Пеам за Охрид и за убавините на нашата татковина во која многу се пее и се танцува. Немам трема, постојано вежбам и верувам дека нумерата ќе ја испеам на најдобар начин. Музиката е мојот живот. Верувам дека со овој настан ќе почнат моите први професионални чекори на македонската сцена - открива Барбара.
Љупчо Мирковски првиот човек на евровизискиот проект, го појаснува начинот на изборот на нашата претставничка.
- Објавивме аудиција за детски хор кој го формиравме во рамките на Македонската радио-телевизија. Прво ги одредивме децата кои ги исполнија нашите критериуми. Потоа ја одбравме Барбара за наш евровизиски претставник, бидејќи таа ги исполнува нашите стандарди за детски претставник во Европа - вели Мирковски.
Можност за промоција на земјата
По двегодишна пауза Македонија повторно ќе биде дел од учесниците на Детскиот евросонг. Со овој потег Македонската радио-телевизија, организатор на националниот избор, се приклучува во промовирање на нашата земја преку музиката.
- Сметаме дека овој настан кој се емитува во многу европски земји, претставува шанса да се промовира Македонија. Манифестацијата му овозможува на секој учесник и на земјата од каде што доаѓа соодветен третман и голем простор за презентација како на музиката така и на нејзините убавини - вели Раде Спасовски, шеф на македонската евровизиска делегација.
Организаторот најавува спектакуларна манифестација, а изборот во Kиев ќе го водат Злата Огневиќ, која ја претставуваше Украина на годинашната Евровизија и Тимур Мирошниченком. Тој беше водител на овој избор и во 2009 година.
Ќерката на Kастратовиќ ќе танцува на сцената
Нашата претставничка на сцената ќе ја придружуваат танчарите од балетското студио „Еурека“: Огнен Анѓушев, Емилијана Јовковска и Сара, ќерката на Зоран и Индира Kастратовиќ, тренерот на женскиот ракометен клуб „Вардар СЦБТ“.
- Сценскиот настап ќе биде многу динамичен, активен и разигран, кој ни за миг нема да ја остави публиката рамнодушна. Kореографијата е во хип-хоп и шоу- денс стил, кои се најпопуларни и децата веднаш ги прифаќаат. Во сценскиот настап нема да употребиме никакви реквизити, туку ќе се обидеме да направиме вистинско денс-шоу. Да ~ покажеме на Европа дека сме талентирана нација во пеење и во танцување - открива кореографката Јана Андрејевиќ.
Соња АЛЕКСОСКА-НЕДЕЛКОВСКА # |