Biografia Ministro

CONSTÂNCIO DA CONCEIÇÃO PINTO

Ministru Komersiu, Industria i Ambiente Timor-Leste

Sr. Constânco Pinto hahu ninia knar iha Ministeriu, Komersiu, Industria i Ambiente Timor-Leste iha Fevereiru 2015 nudar Vise-Ministru. Molok ne’e Sr. Constâncio Pinto assume kargu nudar Vise-Ministru Negosius Estranjeirus i Kooperasaun hahu husi Agustu 2012 to’o Fevereiru 2015.

Iha tinan 2002 depois de restaurasaun independensia Timor-Leste, Sr. Constâncio sai Diplomata Senior RDTL ba dahuluk ne’ebe hala’o knar iha Washington D.C. nudar Ministru-Consilheru i Engkaregadu Negósius. 

Iha tinan 2009, Sr. Constâncio Pinto nomeadu nudar Embaixador Extraordinariu i Plenipontesiariu Timor-Leste nian ba Estadus Unidus Amerika, Mexico i Kanada to’o tinan 2012.

Iha tinan 2008 to’o 2009 Sr. Constâncio hetan fiar hodi asume kargu Diretor Jeral ba Assuntu Relasaun Eksterna iha Ministériu Negosius Estranjeiru i Kooperasaun Timor-Leste.

Sr. Constâncio Pinto dedika nia aan i enerjia ba independensia i auto determinasaun Timor-Leste nian. Wainhira nia iha tinan 14, Sr. Constâncio  hahu involve iha prosesu luta ba independensia Timor-Leste hanesan kombatente i enfermeiru. Iha tinan 1989 Sr. Constâncio Pinto i nia maluk seluk ba dahuluk organiza protestu ba dame durante vizita Amu Papa João Paulo II iha Timor-Leste. Iha tinan 1990 Sr. Constâncio eleitu nudar Sekretariu Ezekutivu ba Conselho Nacional Resitência Maubere (CNRM) iha movimentu klandestina nian. Nudar Lider importante ida ba movimentu klandestiba, Sr. Constâncio hamutuk ho Komité Ezekutivu organiza protestu 12 Novembru 1991 nebe rezulta juventude  271 sai vítima massakre iha rate Santa Cruz.

Sr. Constâncio simu premiu US Congressional Achievement nebe rekonhese ninia aten barani hodi luta ba justisa sosial, polítika no ekonomia iha Timor-Leste.

Sr. Constâncio Pinto hasai ninia Masteradu ba area Relasaun Internasional husi Columbia University, Eskola ba assuntus Internasional i Publiku (SIPA) iha Nova Iorke, i lisensiadu ba estudu Dezenvolvimentu husi Brown University iha Providência, Rhode Island, EUA.

Sr. Pinto fluente iha lian Tetum, Portuguse, Indonesia i Ingles.
Sr. Constâncio Pinto kaben ho Sra. Gabriela Pinto i iha oan rua, naran Tilson i Tima.