29.04.2010, 10:59 ДУРИ 9 ГОДИНИ ПО ОД ЕДНО ОД НАЈГОЛЕМИТЕ ЗЛОСТОРСТВА ВО ВОЕНИОТ КОНФЛИКТ
Поставена спомен-плоча за масакрираните кај Вејце
Со поставување мермерна плоча и положување свежо цвеќе, вчера околу пладне, за прв пат по 9 години им беше оддадена должната почит на осумтемина специјалци од АРМ и од МВР, ѕверски убиени во судирот со припадниците на ОНА, во заседата поставена од ОНА кај Вејце. Четворицата припадници на специјалната единица "Волци" при АРМ Роберт Петковски од Бунарџик, Скопје, Бобан Трајковски од Куманово, Игор Костески од Скопје и Миле Јаневски од Македонска Каменица, како и четворицата припадници на единицата "Тигри" при МВР Маријан Божиновски од Битола, Кире Костадиновски и Бошко Најдовски од Горно и Долно Оризари, Битолско и Илче Стојановски од Породин, на 28 април 2001 година беа пресретнати со нивните џипови во месноста Бреза, пред свијокот за селото Вејце, и масакрирани, а дел од нив биле и запалени, иако сe уште биле живи. Вчера кај Вејце не се појави никој од државните органи и институции. (С. Т.) |