Hispana Esperanto-Muzeo (HEM) posedas unu el la plej riĉaj kolektoj de esperantaj gazetoj kaj periodaĵoj en la mondo. Laŭdire pli ol 45.000 jarkolektoj de pli ol 12.000 titoloj, krome ĉ. 8.400 libroj kaj broŝuroj en kaj pri Esperanto plus miloj da diversaj esperantaĵoj konsulteblas en tiu ĉi trezorejo. Ĝi ekestis kiel privata kolekto de la apotekisto Luis Hernandez Yzal (1917-2002) de 1966. La 5-an de majo 1968 ĝi estis inaŭgurita, komence en la apoteka domo de Hernandez. En 1974 okazis translokiĝo al la nuna nova domo same privata, nur malmultajn paŝojn de la loĝejo de ĝia fondinto. Post la morto de sinjoro Hernandez multaj ŝatantoj de Esperanto-kulturo timeme demandis, kio okazos pri tiu unika kolekto. Kontrakto inter la muzeo, la loka turisma institucio kaj Kataluna Esperanto-Asocio post multaj prepar-laboroj ebligis denovan malfermon en aprilo 2010. La oficiala retejo ĝis nun estas nur en la kataluna, sed ĝia nuna prizorganto, nia Ipernity-amiko Karulo jam ekpreparis esperantan version (vd. la ekran-skanaĵon).
Kune kun aliaj fervoraj kolektantoj, inter ili precipe la hungaro d-ro Árpád Máthé, sinjoro Hernandez fondis la "Rondon Takács", nomita memore kaj honore al la hungara kolektanto József Takács (1890-1944), kiu helpe de la germano Paŭlo Tarnow (1881-1944) verkis faman bibliografion de Esperantaj periodaĵoj (1934). Kune ili eldonis "bibliografian organon" nomitan "Periodaĵoj" kaj interŝanĝis kaj registris ĉiuspecajn esperantajn gazetojn.
Ilia granda verko ĝis nun tamen ne jam aperis: Kompleta bibliografio de ĉiuj iam ajn aperitaj Esperanto-periodaĵoj. Ĝi enhavos ne malpli ol 12.000 titolojn. Ja aperis provizora eldono en 1992 (kaj datum-bazo kun ĝia enhavo), la ĉi-apuda "Inventaro", kiun ornamas bela ekslibriso de sinjoro Hernandez. Laŭdire ĝi fine estu preta en ĉi tiu 2010 - sed tion ni jam aŭdas de kelkaj jaroj. Intertempe la plej grava helpilo por trovi Esperanto-periodaĵojn restas la datumbazo Trovanto de Internacia Esperanto-Muzeo Wien (IEMW).
Koran gratulon al la katalunaj amikoj, ke ili sukcesis savi la vivo-verkon de tiu elstara persono kaj ebligis la uzon de kaj aliron al la kolektego por nuntempaj interesatoj. Fotojn kaj filmetojn pri HEM vi trovos en la retejo de la turisma institucio. Tie vi ankaŭ povas lasi mesaĝon gratulante pro la malfermo. Simple skribu en Esperanto kaj eble aldonu tradukon en via nacia lingvo.
Preu entrada / eniro: Donatiu de 2 euros.
Adreça/ adreso: Museu d' Esperanto de Subirats.
C/ Dr. Zamenhof, 12 (Sant Pau d’Ordal) 08739 Subirats
E-mail / e-mesaĝoj: info@museuesperanto.org
Web / retejo: http://www.museuesperanto.org
i també a / kaj ankaŭ ĉe http://www.turismesubirats.com/blog/?cat=21
Telèfon / telefono: 93 899 34 99 (Patronat de Turisme de Subirats)
Bernardo has replied to StanislavoMiaopinie HEM elstariĝas precipe pro siaj jar-kolektoj de Esperanto-gazetoj, eĉ ne pro la libroj. Tiuaspekte ne plu estas multaj aliaj kompareblaj kolektoj, nur Vieno, Roterdamo, Budapeŝto, eble Londono (nuna stato?) kaj Kortrejko (nuntempe formetita en kelo) kaj La-Chaŭx-de-Fonds. Ĝi koncentriĝu sur tiu forto. Plej urĝas rete alirebla katalogo, ideale en la retejo de iu ekzemple universitato aŭ kataluna akademio aŭ io simila ne-movada, renoma organizo.
Bedaŭrinde mi ĝis nun ankoraŭ ne trovis iun fakan artikolon pri la estontaj planoj pri HEM, ĝia jura statuso, la demando de financado ktp., nur kelkaj el la ĝenerala gazetaro kataluna. Eble Karulo baldaŭ povos diri ion pli precizan.
Stanislavo has replied to BernardoBedaŭrinde tio koncernas multajn (eble plej multajn) regionajn muzeojn. Moderna ekspozicio kostas sufiĉe multe. Mi partoprenis kelkajn pli-mapli interesajn projektojn (inkluzive tiun en Moskvo) kaj ĉiufoje mendinto pagis dekojn da miloj da eŭroj. Ekzemple nun ni aranĝas ekspozion, dediĉitan 65-jaran jubileon de la Venko de nia lando en la Dua mondmilito. Post grandaj reduktoj ĝia kosto konsistigis 3,5 milionojn da rubloj (ĉ. 90 450 eŭrojn). Nu, estas bone, ke tiu muzeo entute ekzistas kaj ties kolektoj estas konservataj kaj alireblaj. Pliboniĝo eblas ĉiam.
Oni devas trovi ĝustan "monujon" (programon-fondaĵon) "en Bruselo", kunigi institutojn aŭ organizojn el sufiĉa nombro da EU-landoj (aŭ kunlaborantaj nemembroj, ekzemple Norvegajo), elpensi iujn projektocelon, labormetodon kaj manieron disigi la rezulton, kiuj konvenas al celoj de tiu EU-a programo, skribi monpeton kaj ensendi en ĝusta dato. Prefere organizu tion iu kiu similan jam faris, ĉar EU-aj administraj postuloj pri monricevantaj projektoj povas esti malsimplaj. Sed indas provi, se tiel eblus pagi kelkajn espojn kiuj dum kelkaj monatoj tuttempe kaj pagate okupiĝos pri la afero.
Normale EU pagos iun certan procenton de kostoj, partoprenantoj pagos ceteron. Sed oni povas transkalkuli ankaŭ sian labortempon als monon. Espereble tiel ankaŭ niaj espaj organizoj povus partopreni.
Ĉu kunlabora EU-projekto inter eŭropaj esperanto-muzeoj?
antau ĉio dankon Bernardo pro via informado en Ipernito pri la muzeo, ĝi estas bele ilustra.
Nu, mi estas la prizorganto de la muzeo de antaŭ apenaŭ unu monato kaj mi ne multe konas pri ĝi sed mi povas informi ke ĝi temas pri privata familia propietaĵo. Kvankam jes vere, iom amatore Lluís kolektis la materialon, li baldaŭ en la tempo zorgis pri klasado kaj enkomputilado de la envenanta materialo.
Kvankam li konstruis specifan domon kun tiu ideo, la domo ne estis planita muzeocele sed pli bibliotek-arĥivece. Probable li sentis sin iom superŝutita de la tasko kaj fine ne estis facile distribui la spacojn kontentige. Ni memoru ke li estis apotekisto kaj devis dividi sian tempon kaj fortojn.
Lluís mortis en 2.002 kaj kun li malaperis la "vivanteco" de la muzeo. Lia familio akurate gardadis liajn trezorojn kaj sporade helpis al interesiĝantoj ĝis nun.
Ĉijare ekis kampanjo de la lokaj vilaĝanoj por peti al la koncernaj departementoj de la kataluna registaro la starigon de grava biblioteko kiu servu la regionon. La ĉefinstiganto de la kampanjo konceptis la muzeon kiel pluso por meritigi la bibliotekon, do, li proponis al la familio de Lluís deponi la materialon de la muzeo, aŭ parto, al la estonta muzeo.
Tria agento intervenis por plifortigi tiun kunlaboron, la Turisma Municipa Patronaro, kiu proponis revigligi la muzeon kun helpo de Kataluna Esperanto-Asocio, tra kiu mi mem engaĝiĝis.
Do, se iam ajn estonta biblioteko prizorgos la muzeon, kredeble la tuta afero povos atingi pli profesian nivelon.
Intertempe la homfortoj kaj la financrimedoj estas minimumaj kaj la privata karaktero de la esperanta kolekto malhelpas la integriĝon en kelkajn instituciajn retojn kaj havigon de stipendioj.
Interesatoj ankaŭ rigardu la artikolon en Vikipedio: http://eo.wikipedia.org/wiki/Hispana_Esperanto-muzeo.
La flandro Roland Rotsaert, kiu iom okupiĝas pri la simile fama, frata kolekto de Kortrijk, afiŝis - teknike iom primitivan - version de la katalogo de HEM en Excel (xts), kies bildon ("Inventaro") vi vidas supre: http://babelserver.org/babelx?url=63
Eble iuj ŝatas iom tra-abelumi la 10.000 plus X titolojn. Mi vetas, ke pri plej multaj titoloj plej multaj legantoj neniam eĉ nur aŭdis (almenaŭ ĉe mi estis tiel).
Please sign-in to write a comment.