Sektor Industria no Kooperativa Halo Parte Importante Iha Dezenvolvimentu

Published by Media on 09 Novembro 2015 Kategoria | Industria no Kooperativa

Indústria no Kooperativa sai hanesan sektor ne’ebé importante iha dezenvolvimentu ekonomia nasaun nian. Atu dezenvolve sektor ne’e presiza entidade tomak nian partisipasaun. Maibé Governu kontinua estimula sektor privadu ba investimentu iha sektor rua mak temi, ne’ebé bele fornese oportunidade empregu no mós hala’o di’ak liu aktividade ekonomia iha nasaun ne’e.

Iha sorumutu ho emprezáriu sira iha Munisipiu Ermera, Vise-Ministru MCIA Nino Pereira husu, emprazáriu timoroan sira liuliu iha Ermera tenke hanoin ona oinsá bele investe iha sektor rua refere.

“Sektor privadu mak tenke partisipa ativa iha prosesu dezenvolvimentu ekonomia nasaun nian. Maibé sektor públika mós sei fó impulsu ne’ebé pozetivu, haforte partisipasaun sektor privada tanba sektor privada hanesan sektor xave ba dezenvolvimentu ekonómiku.” Vise-Ministru MCIA Nino Pereira hatete iha enkontru ho CCI Ermera (15 Outobru 2015).

Vise-Ministru MCIA Nino Pereira mós enkoraja emprezáriu sira iha Munisipiu Ermera atu investe iha iha sektor indústria. Tanba indústria hanesan sektor ida-ne’ebé bele oferese oportunidade empregu no mós kontribui maka’as ba dezenvolvimentu ekonomia nasaun nian.

“Emprezáriu sira la bele hein de’it projetu husi Governu. Uza didi’ak orsamentu ne’ebé hetan husi projetu governu nian hodi halo buat seluk. Investe fali iha sektor indústria, se lae imi depende nafatin ba projetu, la iha hanoin halo buat seluk.” Vise-Ministru ne’e hateten tan.

Prezidente CCI Ermera Luis Alves Tilman mós preokupa ho emprezáriu Ermera oan sira, ne’ebé depende maka’as ba projeitu Governu nian. Tuir Tilman, emprezáriu sira tenke halo esforsu hodi investe mós iha sektor indústria, tanba sektor ne’e importante iha dezenvolvimentu ekonomia nasaun nian.

“Ha’u mós husu ba maluk emprezáriu sira, ita tenke hanoin didi’ak ho konstruksaun ne’ebé depende ba projeitu Governu nian. Ita tenke hanoin hodi utiliza ka aproveita orsamentu ne’ebé mai hosi projeitu ne’ebé ita manan, halo fali investimentu iha área indústria.” Tilman hateten tan iha ninia diskursu. “Tanba ne’e ita presiza halo revolusaun mentál ba iha sektor privadu, liu-liu emprezáriu sira par abele hateke ba oioin dook liu.”

Iha sorumutu ne’e mós administradór munisipiu Ermera afirma, emprezariu timoroan barak mak iha kapasidade finanseiru atu investe iha área hirak ne’e. Maibé mentalidade timoroan sira ne’e sai preokupasaun boot duni, tanba barak sei depende hela ba orsamentu estadu nian.

Hafoin dialogu, vise-ministru hamutuk ho ninia ekipa no prezidente CCI Ermera halo vizita ba grupu kooperativa no grupu indústria kiik sira iha munisipiu Ermera. Tuir observasaun, grupu indústria sira ne’e maioria halo atividade prosedusaun bloku, karpintaria, kripik, sumu, tua husi sebraka no mós saus tomate, no grupu kooperativa sira maioria halo atividade kreditu no produsaun.

Media/VCMCIA (Rozer)