Sogndal Fotball og Fana IL Fotball er samde om ein utlånsavtale for Fredrik Flo. Avtalen startar 21/7, og strekkjer seg ut sesongen 2016.

Fredrik har hatt ein veldig positiv utvikling i tida etter at han signerte kontrakt. Han har lært masse og fått ein profesjonell treningskvardag under huden. Han har vore i ein utfordrarposisjon som spiss, med sterke "konkurrentar", og fått for lite spel på førstelaget. 

Som eit ledd i vidare utvikling, har den sportslege leiinga i klubben ved Flo og trenar Eirik Bakke beslutta at det no er best at han får moglegheit for speletid på eit høgre nivå.

I Fana får han Førdeguten Rune Vindheim som trenar. Vindheim har mellom fleire andre klubbar, også spelt for Sogndal på tidleg 90-tal.

- Me har i lang tid hatt eit veldig godt samarbeid med Fana, og når me skulle finne ein utviklingsklubb for Fredrik, var det viktig for oss at han kjem til ein rett klubb, seier sportsleg leiar, Håvard Flo.

For Fredrik vil det vera fint å kome til ein 2. divisjonsklubb der han kan få spela kampar resten av sesongen.

- Då er det viktig for oss at me har kjennskap til Rune og Fana, slik at me er trygge på at Fredrik får ein god oppfølging. Me trur han vil gjera nye steg dette halvåret i Bergen, avsluttar Håvard Flo.

- Eg ser fram til denne moglegheiten for spel på eit høgre nivå, og gler meg til å ta fatt i Fana, fortel Fredrik frå Bergen.

Unge Flo er veldig motivert, og ser på dette som ein viktig del av utviklingsløpet sitt.

Allereie laurdag kan Fredrik få debuten sin for Fana, her i eige fylke. Då er det kamp mot Førde på Førde Stadion.

Me ønskjer Fredrik masse lukke til i Bergen!

Stao pao!!