返內地賺奶粉錢 趙哲妤湊女得心應手

        去年尾在大馬產女的趙哲妤（Uny）因為BB太細不敢帶她坐飛機，便一直留在當地。早前女兒Natalie足兩個月大，Uny便急急回港。返嚟唔夠一星期，她便到珠海出席活動賺奶粉錢。她坦言現時要努力養家，嚟緊會繼續做活動嘉賓、司儀和登台騷，還會拍戲和出新歌。工作雖忙，卻不會像以前搏殺，她稱夠用就可以，因要專注湊女，難得這位新手媽媽餵奶、換片和幫BB沖涼樣樣掂，係餵夜奶冇得瞓辛苦啲。

        由於在大馬多時，Uny已習慣當地的和暖天氣，故今次到珠海工作，天氣得攝氏11、12度都幾涷，仲要着低V高叉裙兼長期在室外，但為了BB都要頂硬上。只見Uny身形好Fit，她稱餵母乳是最好的自然修身方法，但想回復以前的體重都要做產後操，「我生完嗰日開始，日日分早午晚做，又用腰封同勤力搽Cream同油，等個肚Firm啲，o依家着露腰衫都無人覺得我啱啱生完。」她以前的衫全部啱身，係上圍升了Cup要換過晒啲Bra。

餵夜奶真係好攰

　　提到為何留在大馬咁耐？Uny解釋：「因為BB太細個，耳膜同肺都好薄，唔敢畀佢坐飛機，機上氣壓又驚令BB唔舒服，所以等到o依家先返。」幸好呢幾年她經常到大馬工作，這段時間多得當地藝人的照顧，她還在月子中心認識了一班新手媽咪交流心得。現時她已學識湊B，亦有請工人姐姐幫手，但因女兒愛黐着她，所以基本上餵奶、換片和幫BB沖涼都由她一手包辦。由於BB未戒夜奶，所以她每晚都要起身2至3次，她坦言有點攰，但為了女兒都是值得的。

撰文：李佩儀