馬國明今年初被傳同黃心穎暗撻，再被爆連環約會，馬明同心穎大方承認o依家了解中，直到最近有指佢哋喺橫店拍外景，令感情升溫，大隊煞科返港後，馬明負責推行李，二人更坐同一架的士離開機場。(新聞連結：http://bit.ly/2uOHX7I)
噚晚馬明現身《深宮計》嘅煞科宴，不過未見心穎嘅蹤影，聽講佢因為有活動在身，中途先出席。問到佢哋係咪拍拖兼拍劇，馬明話：「我係去開工拍戲喎，唔係媾女，不過了解多啲囉，知佢食得辣，我自己唔食得辣，大家互相就吓喇！」不過就算馬明堅持了解中，但係大家已寫心穎係「女朋友」，佢話：「其實都係了解緊，了解吓先喇，就算我點樣答，有啲雜誌已經寫咗，我又唔係好介意。」講到胡定欣話見到你哋喺橫店開工好sweet兼送上祝福，馬明話：「唔係呀，定欣都好sweet，好開心呀！佢唔使開工同馬仔(馬浚偉)、煒哥(陳煒)去按摩同食嘢。我都祝福佢快啲搵到個好男仔，唔好淨係喺事業上搏殺！」咁你自己又有冇計劃成家立室呀？佢話：「冇咁快啦！起碼未去到一齊睇傢俬嘅地步！嗰間屋唔關我事，係佢自己買啫，又唔係同佢共同嘅Project！我o依家未有諗到咁長遠嘅問題，隨緣喇，我覺得結婚同年紀冇乜關係，只要大家啱啱timing，而且又適合嘅話就會結，但係我哋未研究呢個問題呀！」」馬明話因為大家都有嘢做，所以唔打算一齊去旅行再加深了解，於是有人問佢係咪對到厭咗？馬明話：「咁又唔會，我對住阿媽40年都未厭！」
