蜂鳥音樂嘅張丹湊住「宇宙漿」搞到神憎鬼厭,連粉絲團都喺微博撰文力數張丹不是。不過,原來娛樂圈仲有個神級經理人,搞到上緊位嘅歌手好似依家嘅GEM咁剋人憎,嗰歌就係「B餐Kay」嘅經理人夏森美。
嗱嗱……今日(4月5日)就有網友搞咗個「最屎經理人公投」,公咩投丫?人選都係得嗰兩個,不過一班網友分析就相當獨到。雖然夏森美嘅麻煩嘢都唔少,例如怒插Eric Kwok唔作歌俾阿Kay真係好小家同小器,或者鬧爆無綫等,不過一班巴絲打就力撐佢係純粹應對技巧唔好,唔涉及個人性格。
相反,網友就表示「張丹本身係有錢仔,所以講嘢永遠都有種睇唔起你嘅感覺」。覺得自己同旗下藝人(其實都係得GEM一個)高高在上之餘,仲會無理要求其他人,搞到同商業夥伴出現「劇烈嘅磨擦現象」,個藝人有幾掂都冇用啦!
形勢就分析咗,但有結果都唔代表「宇宙漿」擺脫到張丹,份約嘅問題……外人都係幫唔到啲咩,阿漿都係好自為之啦!