東華三院王胡麗明幼稚園校長被指好大喜功，下令全校教師通宵留校做手工充當「學生作品」佈置校園，以恭迎東華高層及捐款人到校參觀。有該校前老師向《蘋果》透露，事發2016年底正值15周年校慶，校長林燕敏「好似慈禧要修築頤和園後花園咁」，全體教師須連續3個月放學留校佈置至深夜，甚至凌晨12時才能離校，學期結束後近半教師辭職。
記者 鄧力行
該校2016年底15周年校慶，東華時任主席陳家歡、學務總主任吳奇壎，以及該校的捐款人王忠桐、王胡麗明夫婦及其兒子兼東華時任副主席王賢誌等都有到校參觀。曾於該校任教的鄺老師（化名）向《蘋果》憶述，籌備校慶期間，校長嫌學生作品不夠好，要求老師代為佈置校園，「東華三院好多總理過來巡學校，睇你周年做成點，但事實上啲嘢係咪小朋友整呢？唔係，全部都係老師扮小朋友嘅手作。」鄺批評，東華屬校幼稚園間不斷「互鬥」，教師被迫做很多無教育意義的門面工夫，影響日常教學。幼兒班（K1）小朋友年紀太小，小肌肉尚在發展，畫工無可能滿足校長要求，結果「小朋友畫作唔夠靚就會收埋，由老師操刀，寫小朋友個名」。
「好似慈禧要修築頤和園後花園咁，我哋就好似一個宮女咁，要聽佢支笛。」鄺老師表示，在校慶前的三個月，老師每天都要花很多時間製作紙雕，學校六間房都須用紙造手工按不同主題佈置，幾乎全部出自老師之手。佈置時間本已非常緊迫，又因校長迷信而浪費更多時間：「佢話紅色就唔旺佢，總之我哋用咗紅色，一朵花係紅色咁先算啦，佢就要換晒佢。嗰啲全部都係我哋嘅心血，我哋嘅心機做出嚟，真係要花好多時間，又唔一早講！」
《蘋果》獲得一份該校教職員的打卡出勤紀錄，顯示2016年12月14日當晚大部份教師均在接近凌晨12時才離校。鄺老師指，籌備校慶期間每晚只能睡2至4小時，幾乎每晚都發惡夢，翌日清晨又要起床上學。該學期結束後，校內14名教師當中有6人辭職離校。
鄺老師表示，即使不計周年校慶工作，平時工時亦長，每天工作12至13小時是平常事。校長要求學生參加比賽要獲獎，否則便會要求老師寫「反思」，老師不時要在午休時間跟學生練習而無時間吃飯。鄺又稱，校內老師每月只有一個周六可以休息，其餘所有周六全體老師都要回校朝九晚五開教案會，即使老師已做好教案，也會不斷被挑剔和「打回頭」，要求老師解釋。
當年有份參觀校慶，現任東華三院主席的王賢誌接受《蘋果》查詢時表示，事隔兩年「我其實真係唔係好記得喎，呢兩年發生咁多嘢，再加上今年我每日都有咁多活動，我亦都不停出席我哋中、小學、幼稚園嘅咁多咁多活動。突然間講番某一個幼稚園嘅某一年嘅校慶嘅某一個活動，我又驚講錯。」王續稱，相信同事一定會為校慶出力，但背後用了多少時間他真的不清楚，「多謝佢哋咁努力囉」。
東華三院發言人覆稱，五年一次的「特別慶典」活動曾因籌備工作「偶一需要超時工作，但絕非常態」。發言人引述該校林校長稱，每位學生都是獨特的，勞作手工有差異是正常的，「絕對不會因為校慶展覽而要求老師留校做手工」。
發言人稱，該校教師上班日包括星期一至五及星期六，如星期六沒有工作便無須上班，全年不用上班的星期六約有23天。院方稱不會將幼稚園劃分等級，亦不會比較各校表現，「反而會透過培訓及支援活動，為幼稚園提供所需協助，減輕校長及老師的工作壓力」。
教育局發言人表示，沒有接獲有關投訴，局方會向學校了解情況。
-----------------------------
免費訂閱《蘋果動新聞》， 無懼霸權橫行！立即登記！
https://hk.adai.ly/bXz2v29BrV
-----------------------------
《動腦Q》周末主題夜
追加星期六、日 9:30 pm
星期一至五 10:30 pm
Day Day Q the money!
https://hk.adai.ly/veCxssynnV
