Ditën e sotme u nda nga jeta në moshën 66 vjeçare legjenda e futbollit shqiptar, ish futbollisti i kombëtares, Shkëndijes e Dinamos, Vasillaq Zëri.
Sakaq, ka reaguar menjëherë kryeministri Rama i cili kujton me nostalgji emrat e futbollistëve që kanë shkruar historinë e futbollit tonë.
“Pernaska - Zëri - Ballgjini ishte treshja sulmuese më spektakolare në historinë e futbollit tonë dhe ndarja nga jeta e Llaq Zërit, është ndarje me një pjesë të pandashme të asaj historie të gjallë për ne, përveçse edhe humbja e një miku gjithnjë të buzëqeshur.
Lamtumirë Llaq dhe qoftë i paharruar kujtimi yt, një ngushëllim i veçantë për të afërmit, shokët dhe admiruesit e tu të panumërt”, shkruan Rama.
Vasillaq Zëri vuante prej kohësh nga një sëmundje e rëndë së cilës nuk mundi dot t’i mbijetojë.
Zëri ka marrë titullin “Nderi i Futbollit Shqiptar” nga Federata Shqiptare e Futbollit.