有「小惠妹」（張惠妹）之稱嘅樂壇新人羅藍亞（Lana）唱歌嘅聲浪澎湃就係人都知，但係小小So仲知道佢原來有個好出名嘅表弟，就係靚仔台灣藝人胡宇崴（George）！George喺近排香港熱播嘅台劇《愛就宅一起》入面做個傻傻哋暗戀楊丞琳嘅男仔，拍完套劇之後，佢仲同劇中演員楊丞琳、汪東城做咗好朋友添！
小小So：你同George係咪由細玩到大？
Lana：以前我住喺洛杉磯，佢住喺紐約，我哋一得閒就會去探對方。
小小So：佢有冇介紹啲台灣型男畀你識？
Lana：咁又冇！不過有一次我同佢喺台灣食飯嘅時候，有個戴住黑超嘅男仔走埋嚟同George打招呼，我嗰時仲問George點解佢個朋友咁怪，日光日白都戴黑超，後尾我先知道原來佢就係飛輪海嘅汪東城！
Lana仲話佢哋依家就算分隔兩地，都會日日用MSN聯絡，有時George嚟香港做宣傳，Lana都會帶佢周圍去玩，雖然George喺香港未必個個人都識，但係見到佢咁靚仔，都會特登擰轉頭望吓佢，Lana仲話佢由細到大都係咁，已經慣晒喇！