【東方新地】熱播劇《城寨英雄》中，好多配角令人眼前一亮，除了演身世孤苦鑫鑫嘅林穎彤及賤惡霸夏滿嘅李嘉之外，鑫鑫個衰老竇都睇到人咬牙切齒，而佢名字叫魏惠文！魏惠文笑言廿年來都撈茄哩啡，不但冇諗過退出，反而認為茄哩啡都係演員，只要堅持先可以捱出頭！
52歲魏惠文入行廿年，原來佢係90年演藝學院畢業生，同屆有李婉華、劉玉翠、陳錦鴻等。畢業後，曾去馬來西亞做配音員，到96年先加入TVB，多年來大多演衰人或老闆角色，不過通常發揮唔多，更談不上係三、四線，雖然只係大茄， 但佢唔介意：「記得有次搭巴士坐上層，有個妹妹落車，突然講：『阿媽，我見到電視嗰個死茄哩啡。』喺電視台都聽到唔少人叫自己做茄喱啡啦，但我唔理，喺好多人眼中我只係茄嘢啡，覺得我小角色唔重要，但如果連茄哩啡都做唔好，你唔好叫自己做演員。我亦唔想侮辱自己間學校，我從來冇當過自己係茄哩啡，我當自己係演員！」
執三灘演衰老竇
眼見同期冇耐彈起，自己仍演路人甲乙丙冇人識，但佢依然樂天說：「當年我老師毛俊輝講過呢行好奇怪，多勞未必多得，有啲人一出來就萬千寵愛，好快做男女主角，有啲人一個機會要等20年，或者有啲人一世都冇機會，可能我係後者，其實我呢個《城寨英雄》衰老竇角色係執三灘，如果當日我做幾年見冇成績就走，今日都冇呢個機會。一定要好鍾意演戲，你先可以捱到！」
撈企堂維生
由於做茄哩啡收入有限，為幫補生計，魏惠文曾於石硤尾南山邨茶餐廳當樓面，但佢仍不放棄：「讀書時聽過好多荷里活巨星未紅前，都會去咖啡店做part time，嗰時覺得好過癮，估唔到自己都有機會，哈哈，做樓面時，《怒火街頭》播緊，我係做衰老公，當時有食客認得我，仲讚我做得好。」
