靚女「蝨王欣」力撼馮檢基
新一屆區議會選舉上周五開始報名，深水埗麗閣區是今屆的焦點選區之一。上屆經「超級區議會」入立法會的民協馮檢基，計劃再戰麗閣這個地盤，不過選情可能危危乎，皆因建制派使出美人計，派出年僅廿五歲的「小花」陳穎欣，跟他硬撼。
英文名叫Joephy的陳穎欣，首日已經掛住民建聯同工聯會的雙牌頭報名，據知佢後台都幾勁，父親是工聯會副理事長陳志光，民建聯蔣麗芸亦不時陪佢落區出席活動，撐到出面。
廿五歲「小花」陳穎欣，在深水埗麗閣區力撼紮根多年的馮檢基，不容易也。
民建聯蔣麗芸不時陪陳穎欣出席活動，幫她鋪路吸票。
她對本刊話，早兩年遙距讀倫敦大學法學學位期間，已經開始落深水埗服務，她相信自己優勢係夠年輕，「馮檢基畢竟服務多年，我可為居民帶來新思維，所以口號都改埋『新希望來了！』」
話說Joephy成日幫街坊捉蝨，所以有個花名叫「蝨王欣」。除捉蝨外，佢透露最近仲跟進緊區內水壓低的問題，「有街坊投訴水力不足，要花半小時洗頭，要儲三個鐘才儲滿一機水洗衫，我已跟房署傾緊改善措施。」
「處女參選」就要狙擊紮根多年嘅馮檢基，當然不是易事。有傳九四年曾在該區當選的獨立人士黃仲棋都會加入選戰，一番撕殺在所難免。至於長遠有冇興趣向立法會邁進，Joephy就話太遙遠，始終後生漫漫長路喎。
