Të Fundit COVID - 19: FA vijonë angazhimin me forca dhe mjete për përballimin e situatës së krijuar nga Covid-19.
Vijon angazhimi i Forcave të Armatosura, të cilët janë ndarë në qarqet e prekura nga COVID -19, për të mbështetur Policinë e Shtetit me monitorim/patrullim, për të disiplinuar të gjithë ata qytetarë të cilët nuk respektojnë fashat orare të vendosura në kuadër të masave të marra për parandalimin e përhapjes së këtij virusi.
Efektivët e Forcës Tokësore, vijojnë të jenë në terren me automjetet e blinduara të pajisur me efektivë dhe njësi patrullimi. Konkretisht: Batalioni I në qytetet Shkodër dhe Lezhë, Batalioni II në Tiranë, Durrës dhe Vlorë, Batalioni III në Lushnje, Berat dhe Fier, ndërsa Batalioni i Mbështetjes me Luftim në qytetin e Elbasanit.
Forca Ajrore vijon patrullimin me grupe në rrugët kryesore të Tiranës si Rruga e Dibrës, Medreseja, Qyteti i Studentit, 21 Dhjetori, Astiri, Laprakë dhe Kombinat. Zona ku patrullojnë dhe efektivët e AISM.
Forcës Detare i është atashuar Policisë së Shtetit në qytetin e Durrësit me grupe patrullimi.
Komanda e Doktrinës dhe Stërvitjes patrullon në qytetin e Tiranës ku është angazhuar dhe me vendosjen e sinjalistikave për respektimin e distancës nga qytetarët.
Policia Ushtarake është angazhuar me postblloqe në qytetet Tiranë, Durrës, Korçë, Burrel, Bulqizë, Peshkopi dhe në Kukës. Efektivët e Policisë Ushtarake patrullojnë me mjete të rënda taktike në Tiranë dhe në orarin 05:00-13:00 janë të angazhuar në mbështetje të Policisë Bashkiake në tregjet e fruta - perimeve.
Komanda Mbështetëse, vazhdon patrullimin nëpërmjet DMR në qytetet Dibër, Mat, Burrel, Kukës, Korçë dhe Gjirokastër.
Operacioni i Forcave të Armatosura do të vazhdojë dhe për ditët në vijim.
