ՀՀ արտաքին պարտքը ծախսվում է գործող ոլորտների գոյատևումն ապահովելու համար. նոր շուկաներ չեն ձևավորվում, ինչը կհանգեցնի երկրի հուսալիության նվազմանն ու տնտեսության անկմանը. Կարեն Ադոնց

Կանխատեսվում է համախառն ներքին արդյունքի մոտ 5 տոկոսի չափով անկում: Երբ ՀՆԱ-ի ծավալները նվազում են, միաժամանակ արտաքին պարտավորություններն ավելանում են, և դրանց հարաբերակցությունն սկսում է բարձրանալ, հետագայում սա բերելու է երկրի հուսալիության մակարդակի նվազման, և պարտքերը լինելու են կա՛մ ավելի թանկ, կա՛մ դրանց ստացումը՝ ավելի դժվար: Այս մասին Tert.am-ի հետ զրույցում ասաց տնտեսագետ Կարեն Ադոնցը՝ պատասխանելով հարցին, թե ինչ ռիսկեր կան նրանում, որ ՀՀ պետական պարտքը հասնում է 8 մլրդ դոլարի շեմին:

Նա ընդգծեց, որ ՀՀ պետական պարտքի մեծ մասը կազմում է արտաքին պարտքը, իսկ վտանգն այն է, որ տնտեսությունն իրականում չի աճում, իսկ վարկերը, արտաքին պարտավորությունները մշտապես աճում են:

«Այդպիսով, կգա մի պահ, երբ վարկերի ծավալը հարաբերակցելով տնտեսությանը՝ մակարդակը շատ կմեծանա, ու կկորի երկրի հանդեպ վստահությունը: Պարտատուները, չտեսնելով տնտեսության հեռանկարը, կսկսեն լրացուցիչ պարտավորություններ չտալ, ինչին էլ կհետևի տնտեսության անկումը»,-պարզաբանեց Ադոնցը:

Վերջինս ընդգծեց՝ մինչև նոր շուկաներ չձևավորվեն, բոլոր վարկային ռեսուրսները, միջոցներն անարդյունավետ են լինելու, քանի որ մի ոլորտում կարճաժամկետ ակտիվացում են ապահովելու:

«Այսօր մեր վարկային ու տնտեսական քաղաքականությունը զարգացման միտված չէ, միտված է եղածը պահպանելուն, ակտիվացնելուն: Մենք, օրինակ, ճանապարհներ ենք կառուցում, բայց դրանք հետագայում ուղղակի արժեք չեն ստեղծում: Դրա հետ մեկտեղ պետք է նոր զարգացման հնարավորություն ստեղծել: Մենք դեմ չենք ճանապարհաշինարարությանը. խնդիրն այն է, թե հետո ինչ ենք անելու: Եթե նոր արտադրանք, ոլորտներ, շուկաներ չձևավորենք, տնտեսության անկումը շարունակվելու է»,-ասաց տնտեսագետը:

Նրա խոսքով՝ վերջին 30 տարիներին ՀՀ-ն մասնավորեցրել է մի շարք կարևոր ընկերություններ, գործող շուկաներ, բայց փոխարենը նորերը չեն ստեղծվել: «Մենք տարեկան վերցնում ենք մոտ 1 մլրդ դոլար պարտք, որևէ նոր շուկա չենք ստեղծում, այդ գումարը դնում ենք շրջանառության մեջ՝ ճանապարհների շինարարություն, պետական համակարգի աշխատակիցների աշխատավարձերի վճարում. պահպանում ենք եղած շուկայի գոյատևումը, ակտիվ գործունեությունը: Եթե չլինի այդ պարտքը, կունենանք մոտ 20 տոկոս անկում և կմնանք այդ մակարդակին: Մեր խնդիրն է ստեղծել նոր շուկաներ: Դրանք ստեղծվում են երկու տարբերակով՝ կա՛մ նոր արտադրանքի ստեղծում՝ այն արտահանելով նոր շուկաներ, կա՛մ գոյություն ունեցող արտադրանքի համար նոր շուկաների բացում»,- ասաց նա՝ ընդգծելով, թե դրանցից որևէ մեկը չի կատարվում:

Ադոնցի դիտարկմամբ՝ Կառավարության ու վարչապետի՝ կորոնավիրուսով պայմանավորված ճգնաժամը որպես հնարավորություն օգտագործելու հայտարարությունները պոպուլիստական են, քանի որ հստակ չէ, թե այդ հնարավորությունը տնտեսության որ ոլորտներում, ինչպես ու ինչ գործիքակազմով է օգտագործվելու: