Nizami Muradoğlu (Məmmədov)

Mən, Məmmədov Nizami Murad oğlu 1955-ci il aprel ayının 2-də Naxçıvan MR-nın Ordubad rayonunun Əylis kəndində anadan olmuşam. 1962-ci ilin sentyabr ayında Əylis kənd orta məktəbinin birinci sinfinə gedib, 1972-ci ildə həmin məktəbin onuncu sinfini bitirmişəm. 1972-ci ildə ak. Y.Məmmədəliyev adına Naxçıvan Dövlət Pedaqoji İnstitunun tarix-ədəbiyyat fakültəsinin Azərbaycan dili və ədəbiyyatı ixtisası üzrə birinci kursuna qəbul olub, 1976-cı ildə həmin institutu orta məktəbdə Azərbaycan dili və ədəbiyyatı müəllimi ixtisası üzrə bitirmişəm.

1976-cı ilin oktyabr ayından 1977-ci ilin noyabr ayınadək hərbi xidmətdə olmuşam.

1978-1986-cı illərdə Naxçıvan MR-da komsomol təşkilatlarında çalışmışam. 1987-1994-cü illərdə təhsil sahəsində çalışmışam.

1994-cü ilin may ayından 1996-cı ilin noyabr ayınadək Ordubad rayon icra hakimiyyətində icra başçısının müavini, 1996-cı ilin noyabr ayından 2002-ci ilin aprel ayınadək icra başçısı vəzifəsində işləmişəm.

2010-cu ilin noyabr ayından AMEA Folklor İnstitutuna elmi işçi vəzifəsinə qəbul edilmişəm. 2011-ci ildən “ Məmməd Araz yaradıcılığında folklor motivləri” üzrə dissertant kimi çalışmağa başlamışam. 2013-cü ildə müdafiə edib, 16 aprel 2014-cü ildə AAK-ın 11- nömrəli qərarı ilə filologiya üzrə fəlsəfə doktoru adı almışam.

AMEA Folklor İnstitutu Elmi Şurasının 17 0ktyabr 2014-cü il tarixli 6 saylı qərarı ilə elmlər doktoru proqramı üzrə dissertanturaya qəbul edilmişəm. Dissertasiya mövzusu “Müstəqillik dövrü Azərbaycan şeiri və folklor” adı ilə təsdiq edilmişdir.

Azərbaycan Respublikasının Prezidenti Yanında AAK-ın 16 iyun 2016-cı il tarixli (protokol nömrə 15 - k) qərarı ilə mənə folklorşünaslıq ixtisası üzrə dosent elmi adı verilmişdir.

Azərbaycan Yazıçılar və Jurnalistlər birliklərinin üzvüyəm. 10 kitab, 70-dən artıq elmi məqaləm çap olunubdur.

Ailəliyəm, üç övladım vardır.