【明報專訊】港鐵早喺2013年已經提出要為東鐵線月台安裝幕門，事隔10年，近日終於有第一道門出現喇！港鐵近日喺馬場站1號月台裝咗第一度自動幕門，民建聯立法會議員陳恒鑌、陳克勤噚日就獲邀到馬場站視察進度，其中陳克勤引述港鐵話，東鐵線沿線有35個月台，工程相當有難度，但為咗盡早有幕門用，港鐵會喺完成測試後採取「隨安裝隨使用」方法，即係日間行車時間會出現一半月台有幕門運作，另一半就未有嘅情况，港鐵屆時會加派職員到場協助乘客。
港鐵早前預計今年中起為東鐵線安裝月台幕門，當中因為大埔墟站同馬場站比較畢直，所以會裝先，目標出年全線完成。陳恒鑌噚日視察後話，樂見拖拉10年後港鐵終於開工，期待全線工程盡快完成，保障候車乘客安全。佢又引述港鐵話，為咗方便監察乘客出入，每道幕門都安裝咗鏡頭，至於幕門底部嘅感應裝置，就可以防範小動物誤衝路軌範圍。