歌手黃妍（Cath）首度為電影《白日之下》獻唱的主題曲《日光漂白》今日推出，歌曲遠赴意大利羅馬的舉世知名錄音室錄製配樂。影片改編自殘疾院舍黑幕的多宗真實事件，Cath看過電影後，有很深感受說：「睇完套戲好難平伏心情，因為有睇過呢單新聞，作為一般市民唔知當中細節，但呢套戲用受害者同記者角度去講返成件事，令我好大感受。」
導演簡君晋知道Cath曾修讀新聞系亦做過見習記者後，馬上敲定她就是演唱主題曲的不二人選。Cath表示：「我十分明白接觸到一件社會事件後，好想發掘核心事情或問題的心情，所以好明白余香凝的記者角色所面對的處境，我亦攞住呢個感受入錄音室，灌錄呢首電影主題曲。」填詞周耀輝當年亦有留意這一宗新聞，他說：「片中嘅記者，傻更更唔理阻力追尋真相，嗰一種天真係一樣好珍貴嘅嘢。而作為電影主題曲，好希望觀眾睇完電影，唔單只帶著憤慨離場，同時亦希望大家有被鼓勵、有一道溫柔嘅力量繼續行落去嘅感覺，因為世上仲有呢啲傻更更嘅人，要行，就一齊行落去。」
接過耀輝的詞，Cath備受感動說：「耀輝嘅詞令件事昇華咗好多，睇歌詞時要控制住自己情緒先唱到。呢次係一次夢寐以求、好夢幻好驚喜嘅合作，自己一向好鍾意睇電影，好想唱到電影嘅歌曲，因為通常睇到電影最後就會有首歌去Round Up成套戲，電影中最精彩最深刻嘅影像就會浮現，係一個俾你重溫返成套戲嘅好好時機，今次第一次可以唱到電影歌曲，好開心，因為自己可以有份成為其中一分子，同觀眾分享觀映後嘅呢份情緒、感覺。」