Links impurtants
Navigatur: cumenzament
Navigatur: fin
Rument: infurmaziuns
Adina dapli rument vegn rimnà en moda separada per al reutilisar, entant che la quantitad dal rument che vegn ars u che vegn deposità sa reducescha. Brischar rument en il liber è generalmain – cun paucas excepziuns – scumandà en Svizra.La quantitad da rument po gia vegnir reducì a la funtauna. En quest connex vali da resguardar tscherts criteris cun far las cumissiuns:
- Eleger products che pon vegnir utilisads ditg: products che han ina lunga durada da vita e che pon vegnir reparads, reutilisads u rechargiads.
- Preferir products cun uschè pauc emballadi sco pussaivel.
- S'acquistar la savida davart il ciclus dals products: fabricaziun, utilisaziun e moda da dismetter.
Tar l'uffizi federal d'ambient (UFAM) survegnis Vus infurmaziuns detagliadas davart il tema "rument".
Rimnar e separar rument gida a mantegnair las resursas natiralas ed a proteger l'ambient, cunquai ch'i vegn evità da derasar substanzas contaminantas en la natira. Tscherts ruments pon vegnir reutilisads, entant che auters ston vegnir tractads en moda speziala per evitar donns da l'ambient. Las vischnancas rimnan il rument chasan ed al transportan als dretgs indrizs d'elavuraziun.
Tar var in terz dals products vegn la reutilisaziun finanziada cun la taxa dismessa anticipada (TDA). La TDA è – ensemen cun l'obligaziun da restituziun – in instrument ideal per organisar la dismessa d'ina part dals bains. Quai vala p.ex. per products cun ina durada da vita limitada sco battarias, emballadis da bavrondas u tar apparats da l'electronica da divertiment.
La reutilisaziun prolunghescha la durada da vita d'objects e distgargia la chadaina da dismessa. Questa procedura schanegia las resursas natiralas e reducescha il consum d'energia. La reutilisaziun da rument è pia interessanta tant dal puntg da vista economic sco er ecologic.
Enavos tar la survista Infurmaziuns
