La canera dal traffic sin via, da la viafier, dals aviuns, da l'industria e dal mastergn sco er la canera da tir èn las funtaunas da canera las pli impurtantas. Questas funtaunas da canera vegnan reglamentadas da l'ordinaziun davart la protecziun cunter canera (OPC). Mesiras e directivas reglan la collavuraziun tranter ils singuls acturs en cas dal cumbat cunter canera. La canera dal mintgadi è difficila da reglamentar; pervi da quai vegn ella cumbattida per regla directamain a la funtauna.

La protecziun cunter la canera vegn vesida en emprima lingia sco protecziun da la sanadad e sco meglieraziun da la qualitad da viver. Umans ch'èn vegnids deliberads da la canera, èn per regla en cas da prestar dapli. I vegn procedì tenor differents princips: princip da giudicament, da funtauna, da prevenziun, da sanaziun, da chaschunadra u da chaschunader e da cooperaziun.

Mintga singula persuna po cooperar en moda activa tar in cumbat effectiv cunter canera.
La SUVA s'occupa en emprima lingia dal sectur da la canera a la plazza da lavur, l'uffizi federal da sanitad (UFS) è cumpetent per occurrenzas (discos, concerts e.u.v.), chaussa da l'uffizi federal d'ambient (UFAM) è – ensemen cun autras autoritads executivas da la confederaziun e dals chantuns – la direcziun dal cumbat cunter canera tar implants sco er dal sectur "vibraziuns e canera transmessa da corps solids".