Durant la gravidanza surpiglia l'assicuranza fundamentala obligatoria ils custs per las controllas medicinalas preventivas che vegnan fatgas da rutina. Ultra da quai paja ella ina contribuziun als custs dals curs per preparar la pagliola. La naschientscha vegn er surpigliada da la cassa. L'assicurada po tscherner, sche la naschientscha duai succeder a l'ospital, en la chasa da naschientscha u a chasa. Suenter la naschientscha surpiglia la cassa da malsauns ina controlla posteriura ed ina contribuziun per la cussegliaziun per mammas che tezzan. La cassa da malsauns da la mamma surpiglia ultra da quai ils custs da la dimora en l'ospital suenter la naschientscha da la poppa u dal pop saun. L'ordinaziun davart las prestaziuns da l'assicuranza obligatoria per la tgira da malsauns cuntegna ina glista da las prestaziuns ch'èn cuvridas. Dapli infurmaziuns davart las prestaziuns da la cassa da malsauns en cas d'ina gravidanza chattais Vus tar l'uffizi federal da sanadad publica (UFSP). En cas da dumondas individualas As drizzai per plaschair a la cassa da malsauns.

L'uffant novnaschì sto vegnir annunzià tar ina cassa da malsauns il pli tard trais mais suenter la naschientscha. La garanzia tras l'assicuranza cumenza a partir da la naschientscha.

La reproducziun assistida medicinalmain po gidar a conjugals che na survegnan senza atgna culpa nagins uffants ad ademplir il giavisch d'avair uffants. Las dumondas, tge praticas ch'èn permessas sut tge premissas, vegnan regladas en la lescha davart la medischina da reproducziun. Scumandadas en Svizra èn numnadamain la donaziun da cellas d'ov e la donaziun d'embrios sco er la maternitad substitutiva. L'applicaziun da proceduras da reproducziun è colliada cun ina permissiun chantunala. Ils centers svizzers per la medischina da reproducziun (partiziuns dals ospitals universitars, dals ospitals chantunals u da clinicas privatas sco er da praticas privatas) èn per regla affiliadas a la FIVNAT (gruppa da lavur da la societad svizra da fertilitad, da sterilitad e da planisaziun da famiglia). Pèrs cun problems da fertilitad chattan qua cussegliaziun. Ina infurmaziun detagliada e conscienziusa (motivs, proceduras, ristgas e.u.v.) dals pèrs è prescritta da la lescha. En quest connex sto tranter auter er vegnir rinvià ad autras pussaivladads per ademplir il giavisch d'uffants (adopziun). Er ils posts chantunals da cussegliaziun per dumondas da gravidanza pon esser ils posts da consultaziun. Savens porschan quels er ina cussegliaziun en cas d'ina sterilitad. Pèrs pertutgads chattan plinavant sustegn tar las organisaziuns da pazientas e da pazients correspundentas (p.ex. tar l'uniun "giavisch d'uffants").

Mo ina part dals tractaments en connex cun il giavisch d'uffants vegn surpigliada da la cassa da malsauns. L'assicuranza fundamentala surpiglia numnadamain l'inseminaziun. Las proceduras da la fertilisaziun in vitro ston ils pèrs dentant pajar sezs.