由韓國女神全智賢、「長腿Oppa」李敏鎬主演嘅SBS新劇《藍海傳說》將於聽晚播出第3集,今日劇組就公開新預告相。
之前預告已經講人魚全智賢自己一個去咗首爾街頭,而今日公開嘅相中,全智賢身穿白色T恤及運動褲,左手攬住個貝殼,右手拎住傳單,一時企喺路邊望吓途人,一時又企喺街邊檔前,似乎畀啲食物吸引住,但女神一臉迷茫嘅表情,好似係因為去咗陌生嘅地方而感到不知所措,唔知會唔會又係「啱啱遇着剛剛」,畀李敏鎬發現到佢呢?另外,根據TV話題性分析機構Good Date Corporation於14號至20號期間做嘅調查,結果發現《藍海》以24.97%話題佔有率成為電視劇部門冠軍,力證劇集嘅高人氣。有見及此,劇組方面今日稱日前播出嘅《藍海》150分鐘嘅導演版,將於韓國時間聽日晏晝12點半再次播出,以示感謝劇迷嘅支持。而劇組今日唔止公開劇照,更公開咗全智賢、李敏鎬拍攝婚禮一幕時嘅花絮相。相中身穿白色單肩婚紗嘅女神,蹺住李敏鎬隻手,同佢深情對望,真係好似真正行禮咁,好Sweet。
2016年11月22日