隔牆有耳：阿人感受耶穌受洗

工黨主席李卓人上星期去咗約旦開會，開完會之後玩番幾日，旅程最後一日去咗耶穌受洗地約旦河，本身係基督徒嘅李卓人模仿耶穌，走入條河感受吓；當佢走入水中，即時因為水深而半身濕晒，好似受洗咁。

缺席立會認抵打

水深仲係其次，導遊教阿人，呢條河係分隔以色列同約旦嘅邊界，兩岸居民水火不容，所以叫佢千祈唔好貪得意向對面揮手，否則後果自負，更加唔好游到對面岸，因為一上岸，以色列會當你係敵人即時打靶。為咗條命仔，阿人咪落條河浸一浸水影張相就算囉。阿人呢次去約旦出席國際職工會聯盟嘅全球執委會，令上星期嘅立法會內務委員會以兩票之差，通過唔到成立研究全民退休保障嘅小組委員會，阿人都自認抵打，惟有喺事務委員會再戰。