דער פאָרשטייער פון שב”ס (שירותי בתי הסוהר), יעקב גננות און דער אַדאַוואַקאַט פון דער מדינה, ערן שנדר, האָבן דעם דינסטיק אינדערפרי געשאָנקן רשות צו דער מערדער פון פּרעמיער יצחק ראַבין ע”ה, יגאל עמיר, צו ברענגן אַ קינד צו דער וועלט.
יגאל עמיר האָט, זייענדיק אין טורמע, חתונה געהאַט מיט לריסה טרימבובלער. די חתונה איז דורכגעפירט געוואָרן אונטער דער אויפזיכט פון אַ רבנישן בית דין. אָבער די מדינה האָט, בהתאם צו די טורמע געזעצן, זיי נישט געלאָזט האָבן אַ קינד.
עמיר און זיין פרוי האָבן פּרעזענטירט אַן ערעור אויף דעם אורטייל. דעם דינסטיק האָבן זיי ענדלעך באַקומען זייער וואונטש, אָבער נישט אינגאַנצן. כאָטש די מדינה אַסרט עמיר און זיין פרוי צו לעבן צוזאַמען, האָבן זיי אָבער מתיר געווען עמיר’ן איבערגעבן זיין זרע כדי עס זאָל איינגעפלאַנצט ווערן אין זיין פרוי’ס קערפּער.
די ישראל פּרעסע גיט איבער אַז די פּאָרפאָלק האָט באַגריסט דעם באַשלוס, אָבער האָבן געזאָגט אַז זיי וועלן פאָרזעצן קעמפן אַז זיי זאָלן קענען זיך מתייחד זיין כדרך כל הארץ.
“אויב מיר וועלן קענען ברענגן אַ קינד צו דער וועלט אויף דעם אופן, איז ברוך השם”, האָט לריסה געזאָגט. “אָבער מיר וועלן קעמפן ווייטער צו קריגן רשות זיין צוזאַמען”.
במשך פון די נעקסטע טעג וועלן מעדיצינישע עקספּערטן באַשליסן ווי דורכצופירן דעם קאָמפּליצירטן מהלך.
|