Sibiri, Utikalo tile 7 san 2010 nɛgɛɲɛ 16 ka taa se nɛgɛɲɛ 18 ni sanga 30 ma, siɲɛtaba dɔ kɛra Hipodɔrɔmu ntolatankɛnɛ kan Bamakɔ. Siɲɛta in bilala sen kan Mali Siɲɛta Sinsin Jɛkulu fɛ ani Sotelma-Malitel, o min kɛra u dɛmɛbaa jɔnjɔn yen nin ko in sabatili la.
Siɲɛta ye farikoloɲɛnajɛ ye, nka, an ka laadala kokɔrɔ dɔ fana don Farafinna. An y’o bɛɛ faamu fana kɛnɛ kan bi wula in na. Siɲɛtala ninnu, n’u kɔgɔ cogo n’u kolo donko ɲuman ye, bɛɛ y’i sinsin i ka fɛɛrɛ n’i dɔnkow kan kelen kelen walasa k’i sina kunbɛn. Ntolatankɛnɛ tun fallen bɛ tewu nin farikoloɲɛnajɛ in lajɛbaw la, n’o tun binna ka tunun dɔɔni dɔɔni Mali la. Mali siɲɛta sinsin jɛkulu haminako de ye k’o kokɔrɔ in lakurakuraya k’a bɛn bɛɛ nafalan ma.
Ka bɔ nɛgɛɲɛ 16 ka s’a ɲɛ 18 ni sanga 30 ma, an ye siɲɛta dumanba lajɛ min gɛlɛyara kosɛbɛ siɲɛtala ŋana dɔw ni ɲɔgɔn cɛ, nka, sebaw kelen kelen bɛɛ y’u jansa sɔrɔ. Kelenya, badenya ani Farafinna ka donɲɔgɔnna hukumu kɔnɔ, an balema Senegalikaw tun bɛ nin siɲɛta kɛnɛ in kan ka kow tɔ sankɔrɔta.
Nin siɲɛta in jansa kuruba sɔrɔla Anda La fɛ, n’o ye Mali siɲɛtala ŋana dɔ ye.
Nin farikoloɲɛnajɛ in, n’o ye siɲɛta ye, o min y’an ka kokɔrɔw dɔ ye, o ko sabatili ye hakilina ɲuman ye min ka kan ka dɛmɛ.
Kakɔrɔ; siɲɛta tun bɛ kɛ an ka duguw kɔnɔ. Demisɛnw ka hadamadenya sabatili kalansen dɔ tun don. A kun tun ye ka demisɛn hakili labara, I n’a fɔ farikoloɲɛnajɛ tɔ, k’a kolo don ka ɲɛ ani ka badenya ni jɛɲɔgɔnya jiidi demisɛnw ni ɲɔgɔn cɛ.
Nin masala kunkurunnin in b’o bɛɛ sɛmɛntiya:
Siɲɛta tun ye laadakɔrɔ ye na ka dugu kɔnɔ, nka dunan kamalenni walima dunan npogotigi dɔ nali dugu kɔnɔ, o tun bɛ kɛ sababu ye, dugu cɛmisɛnw walima dugu npogotigiw ka siɲɛta dɔ kolokolo walasa k’a ka dɔnko hakɛ dɔn siɲɛta la ani k’a dɔn a ka kan ka fara kulu min kan dugu kɔnɔ a ka dunanya waati kɔnɔ.Duguw janya o janya ɲɔgɔnna, balemayasiraw, teriyasiraw, furusira, laadasiraw tun bɛ kɛ sababu ye, cogoya bɛɛ la, ka duguw kala ɲɔgɔnna na, ka bɔnye sabati duguw demisɛnw ni ɲɔgɔn cɛ. Ni dunan kamalenni walima dunan npogotigi nana dugu kɔnɔ, diyagoya a bɛ don kulu dɔ la. A ka ca a la, a yɛrɛ tɛ a si hakɛ dɔn, wa a bangebaw tɛ yen walasa k’a si hakɛ fɔ. O la, demisɛnw bɛ siɲɛta dɔ kolokolo u ni dunan in cɛ walasa k’a dɔn a ni kulu min ye kokɛɲɔgɔn ye.
O kow tun bɛ kɛ nin cogo in na:
Dondɔ, cɛmisɛnw walima npogotigiw bɛ taa dunan cɛmisɛnni walima dunan npogotigi diyatigi ma: “An nana i ka dunankɛ walima i ka dunamuso nɔfɛ, an bɛ taa an tulonkɛ dɔɔni”. Dutigi bɛ diɲɛ n’o ye, a b’a dɔn a kun ye mun ye.O la, u bɛ taa n’a ye jirisun dɔ kɔrɔ dugu kɔfɛ. A ka ca a la, a bɛ kɛ sisun dɔ kɔrɔ f’u b’a f’o ma ko dunanbugɔsinin.
Dugu demisɛnw ni dunan kamalenni walima dunan npogotigi bɛ siɲɛ ta kelen kelen ka bɔ dɔgɔ kunda ka taa kɔrɔ kunda. U b’a bɔ dafɛ, jɛkulu jɛkulu fɔ ka taa a kɛ dunankɛ walima dunanmuso ni dɔ ka dɛsɛ ɲɔgɔnna pewu walima k’a kɛ filanin bin ye. N’o kɛra, o kɔrɔ ye ko ani o jɛkulu ye si hakɛ kelen, wa u ka demisɛnya dɔntaw bɛ taa ɲɔgɔn na. O la, a bɛ don o jɛkulu la, a n’o jɛkulu mɔgɔw bɛ kɛ kokɛɲɔgɔn ye fɔ ka taa se a taadon ma. Jɛkulu minnu ka kɔrɔ n’o jɛkulu ye, olu bɛ k’a kɔrɔw ye, a ka jɛkulu ka kɔrɔ ni minnu ye, olu bɛ k’a dɔgɔw ye.
Ni jɛkulu sɔrɔla min ka hami ye nin kokɔrɔ in donni ye bɛrɛ la, ka jɛɲɔgɔnya, donɲɔgɔnana, ni balemaya sabati jamanaw ni ɲɔgɔn cɛ i n’a fɔ an balema Senegalikaw tun bɛ yan cogo min na nin tulon kɛ in senfɛ, n hakili la, o ye koɲɛnɛmaba ye min ka kan ka dɛmɛ kosɛbɛ.
