Татьяна Маторкина чачсь 1986-це иень якшамковонь 25-це чистэ Орданьбуень Орозбие велесэ.

Прядызе Н.П. Огарёв лемсэ МГУ-нь филологиянь факультетэнь эрзянь отделениянть. Важоди «Эрзянь правда» газетань редакциясо. Сёрмады миниатюрат, ёвтнемат.

*****

Миниатюрат

ВЕЧКЕМАНЬ ВАЛДО

Ансяк панжовсть автобусонь кенкштне, ломантне мельга-мельцек капшазь совасть ардомапелентень ды мукшнызь эсь таркаст. Меельцекс совась од тейтерь. Марявсь, ардыцятнень юткс понгсь алкуксонь чипайне. Совамозо ульнесь валдонь кондямокс: сеске сыргозтинзе нувсиця, свал мезде-бути арсиця ардыцятнень. Маней менель сельмензэ цитнесть кенярксов мизолкссо.

Тейтересь кирдсь кедьсэнзэ розань пусмо. Сон ютась се пелев, косо ломантнеде седе аламольть, стамбаркине витизе мазыйдеяк мазый якстере пусмонть, кепедизе мештезэнзэ, аволизь мерька ардыцятне. Таго варштась цецятнень лангс, мизолдозевсь: улема, ледстявсь тензэ сынст казицясь.

Весе ардыцятне вансть тейтеренть ёнов, ансяк сон васололь сындест.

— Озадо, — стясь вакссонзо цёрась, сонсь сельмень апак сае вансь лангозонзо.

— Сюкпря, — сэтьместэ мерсь тейтересь.

Сонзэ мазычись мольсь косто-бути потсто, ойместэ. Мизолксто пешксе сельмензэ варштасть вальмава, косо цят якшамось капшавтсь ломантнень. Кода ладясь сонензэ те вадря ёжось: кенярксов, уцяскав! Марявсь, натой ардыцятненьгак токшинзе кодамо-бути лембе, цецятнеяк каштансто аштесть кедьсэнзэ.

Гайгезевсь тейтеренть телефонозо.

— Кунсолан, — сэтьме, чевте вайгельсэ мерсь сон. — Монгак тонь вечктян. Учан. Вастомазонок.

Автобуссо ардыцятне мизолдозевсть. Весе чарькодсть, мейсэ тевесь: чамасонзо невтезель виев ёжо, певтеме чансть, конань пелькскетне, улема, токасть эрьванть.

Тейтересь седеяк кеместэ лепштизе мештезэнзэ цецянь пусмонть. Цецятнеяк мерят маризь вечкемань лембенть, кивчкаезевсть мазый тюссост. Автобусонть келес сравтовсь кенярксонь кандыця валдо — вечкемань валдо.

 

ЛОВОНТЬ ЧАЧОНЗО

Талай сёксь. Якшавтсь. Прянть кепедьсак верев: пельтне -- теке кевть. Шкань ютазь састо, виздиця эйкакш ладсо, вейтень-вейтень кармить певереме ловтештинеть. Мейле, теке верев ёртозь тодовсто толгат, сынь ушодыть прамо тустосто. Аламонь-аламонь модась вельтяви ашо коцтсо...

Ловось яла пры. Пачканзо уш а неяви шабрань кудось, вальмало калесь. Истямо покш мель лисемс ушов! Чият кузтемпес, венстьсыть кедеть, бажат кундамс ловтештинеть. Ловось истямо чевте ды аволь кельмеяк! Сон шождасто озы кедеть лангс ды сеске солы. Кодамо кеняркс пешти седеенть те шкане! Те ловось учовикс. Сон маряви сехте мазыекс, сехте чевтекс, сехте ашокс…

Мазый ловось якшамо чистэ! Чипаенть каршо истя цитни! Лиясто цитневкстнэ теке кончтнить, кенярдыть теть. Ожосо, якстересэ, пижесэ, сэньсэ палыть… Ёвксокс маряви те ловось. Сельметь а саевить лангстонзо. Сы мель мадемс те чевте ацавксонть лангс оймсеме…

Кандылов шкане ловось лия. Азарсь вармась тей-тов юхаи эйсэнзэ. Ютамс истямо шкане стака, секень вант, прат пильге лангсто. Каршот ливтить чова-чова салмукст, пупить, пицить -- истя а вечкеви! Маряви, пицить аволь чамат, седеетькак…

Тунь лиякстоми ловось тундо ёнов. Озы, ашочизэ лавшоми. Учат, учат, зярдо солы, — сон валске таго пры. Ансяк ней уш а цитни чинть каршо, а невтни мазычинзэ, а кенярдовты седей. Налкставсь сон…

Пек ламо ашо ловонть чачонзо. Мон кенярдан: несынь сынст весе.

 

ЛОВНЕ

Ютась сундерьковось. Ванан вальмава: икелень раужо мода, лопавтомо чувтот. Увны вармась, моры сёксень нусманя, тарьксэв морыне.

Ванса: чувтотнень юткова ливтнить ашо нимилявнеть. Те шкане?! Мон а сеске чарькодинь: те пры лов. Алкукс, алкукс! Ловне пры. Весе пертьпельксэнть вельти ашо-ашо пухсо.

Аламос аштезь, чамам таго педявтыя суликантень. Мезе неинь! Чувтотне мазылгадсть, одкстомсть. Модась вельтявсь ашо-ашо велькссэ! Марявсь натой: чевте ловнесь вельтизе весементь.

Седеемгак те шкане, кода сёксень вармась, морась а чарькодевикс моро: каня нусманя, каня оймавтыця.

 

СИЯНЬ АРТОВКС

Кувака вестэнть увнось виев варма. Валске ёнов сон оймась, менельсэнть цитнезевсть тештеть. Якшаматясь теевсь ушосонть алкуксонь азорокс.

Мон стинь, зярдо кудось ульнесь валдо. Варштынь вальмантень. Мезе неинь суликанть лангсто! Телень вирь: сиянь чувтот, сиянь палясо кузнэть... Вейке кузнэсь венстевсь верев, чипаенть каршо сиязо цивтёргадсь, налксезевсь. Лангсонзо хрусталень урнэ  — налкси сиянть марто. Кузнэнть вакссо — куракш. Сон истя жо наряжазь бриллиантсо. Ламо тюссо цитнить. Лангозонзо ливтясь озяз, куракшонть алдо венстни нернензэ ривезь — ваны ёжовсто, апак пеле. Сонзэ поназояк цитни сиясо.

Марявсь, якшамось арась ваксозон.

Седеем токнозевсь, чарькодинь: те ёвкс, конань викшнизе вальмазон телесь. Сиянь ёвкс.

 

Ёвтнемат

СЁКСЕНЬ КАШТАЗ

Менельсэ сырнень тештекс сравтовсть лопатне моданть ланга. Чись налксезь налксесь мартост. Ков а варштат — весе пертьпельксэсь артозь кумболдыця тештесэ, мазый лопасо. Ушосонть истямо лембе, прок аволь сёксень шка, кизэ юты. Ансяк мон эзинь кеця вадря чинтень, эзинь ванкшно эрьва ёнга, эзть лотксе сельмень мазычинть лангс.

Ютынь апак эрязкале. Капшамс тень а ков. Авардевлинь — сельведтне  арасть. Истяяк эрси — ули мелеть авардемс, ансяк кода иля снартне, а лиси. Мезень кисэ? Сядоксть кевкстнинь: мезень кисэ весе те монень? Мекс истямо пайстомо, уцяскавтомо ломанян? Ютынь больницясто. Сельмепесэнь а неевлия те тарканть! Верень анализэнь саинь: аволь вадрят, стака ормань. Кодамо орма?! Мон оштё одан! Кода улемс? Ков молемс? Мезе теемс? Марсинь, истямо орма марто ломантне кувать а эрить. «Кенярдовтымизь», а мезть кортамс. Ялатеке эзинь кеме. Паряк, весе те аволь монь марто? Паряк, те он?

Арсематнестэ таргимим телефонось. Кие-бути ледстимим. Саша. Вечкевиксэм.

— Шумбрат, тейтернем. Косат? Мон ёмавтытинь, тонсь а гайневтят.

— Шкам арасель, Саша, нолдык чумом. Ансяк ней ютан больницясто.

— Кода тосо тевтне?

— Вадрят. Чокшне карман учомот, сат — кортатано. Вастомазонок.

Мекс-бути ёмась мелем вастовомс цёранть марто. Кода ёвтамс тензэ кулянть? Паряк, а ёвтамскак? Мезекс стяко ризнэвтемс ломаненть? Те монь апарось, монь ормась, ды кияк лия а чарькодьсамам. Киненьгак а содави ёжом. Ансяк кирди-арась седеесь? Таго арсематне куродызь прянть.

Ломанть, кудот, чувтот… Прок васенцеде неинь эйсэст. Зяро кенярксов чамат ютасть вакскан! Мизолксовт. А сельмест, сельмест! Сеедьстэ эряви ансяк варштамс ломаненть сельмес, ды сеске несак, кодамо ёжозо: паро эли берянь, уцяскав эли, мекевланг, пайстомо. Мезе сестэ неить ломантне монь сельместэ? Мелявкс, апаро, киненьгак а содавикс ёжо… Кинень ёвтнемс зыяндонть? Лиятнень улить малавикс раськест, патяст-сазорост, леляст-ялаксост, ояст-ялгаст, конат свал лездыть стака шкасто. Кинень пшкадема монень? Монь тесэ кияк арась. Ськамон те покш ошсонть. Ули ансяк Саша… Кода ветямс прянть сонзэ марто?

Окойники пачкодинь. Совинь чаво кудос, косо кияк эйсэнь эзь учо. Ёртынь панжоматнень, оршамопелень, стакасто озынь. Вановтом лоткась каршо стенасонть вишка тешкскенть-точкиненть лангс. Эрьва кодат арсемат, певтеме ледстнемат даволокс ютасть пряван. Зярс истя аштинь, а содан, стявтымим кенкшс гайневтемась. Ушосонть чоподаль. Молинь панжомо. Панжия — икелень Саша.

— Мекс кувать а панжат? — кевкстимим сон.

— Кода кувать?

— Колмоцеде теть гайневтян, — мерсь Саша.

— Алкукс колмоцеде? Мон мекс-бути эзинь маряяк. Ютак… Симат чайде?

— Нуртяк.

Саша вейкине ломань те масторлангсонть, кона а стувтни эйсэнь, свал эрси вакссон, ды сонзэ улемазо максы тень вий. Мезе теевлинь сонтемензэ?

— Мезе ёвтасть больницясо? — кевкстимим Саша.

— Од мезеяк эзть, весе текесь, весе вадря.

— Эно мекс чамат нусманя, вайгелеть сэтьме? Мизолксоткак ков-бути ёмась. Паряк, теевсь мезеяк? Тон ёвтак, мон лездан, эрявиндеряй, — эзь кеме сон.

— Сизинь, Саша. Кортамскак виень арасть.

— Паряк, сы таргостонть ардтано инжекс велев?

— Ардтано, варштасынек, — кемевтия Сашань.

Омбоце чистэнть ёжом пек берякадсь. Толокс пицесь рунгом, прям сэредсь, эль кепедевиль тодовонть лангсто. Ланган мерят то лакиведьсэ, то лисьмань кельмесэ кайсильть. Ансяк учовсь валскесь, туинь больницяв.

Кода пачкодинь, парсте тень а ледстявияк. Сыргозинь палатасо. Ниле стенат перькан, ды мон ськамон. Вальмантень чакась пиземе, увнось варма. Прям стакадояк стакаль, прок кев. Саимим истямо апаро, лиссть сельведень, кирьгапарезэнь ал кеверсь. Ледстия Сашань, неемс бу сонзэ. Таргия телефоном ды сёрмадынь тензэ: «Мон больницясан. Инескеть, бути ули шкат, совак варштамон. Монень пек берянь». Учинь, содынь: сон кадсынзе весе тевензэ ды сы. Чудсть сельведень, эзть лоткавтово. Конинь сельмень. Матедевинь.

Зярыя шкань ютазь кие-бути вачкодсь кенкшентень. Совась Саша, прясто пильгс начко, кедьсэнзэ астрань пусмо, сельмесэнзэ кевкстема: «Мезе тон тесэ теят?».

— Саша!!! — кенярдозевинь мон. — Мекс истя кувать?

Астрань тантей чинесь пештизе палатанть. Мон пек вечксынь неть цецятнень. Ули  эйсэст мезе-бути лембе, вадря, чевте, мезесь паролгавты ёжонть. Ней эрьва цециненть лангсо цитнесть пиземень байгинеть.

— Кода кувать? Сеске сыргинь, чиезь чиинь теть. Мезе мартот?

— А содан, Саша. Мень-бути орма, нать, стардымим. Кода кенярдан, сыть варштамон. Саша, кортавлинь мартот.

— Кунсолан, — озась малазон.

— Саша, миненек эряви явомс.

— Кода явомс? Мезть кортат? — абунгадсь сон.

— Саша, мон сэредян. Мезекс тонеть сэредиця тейтересь?

— Вечкевиксэм, тон пичкат. Течи тонь ёжот берянь, секс прязот сыть а эрявикс мельть, — мерсь цёрась.

— Саша, саты! Вешнек эстеть лия!  Шумбра, паро ломань! Нать, а неят, кодамо мон берянян?!

— Мезть кортат?! Монень тондеть башка кияк а эряви!

— Тон ялатеке кадсамак, Саша. Аволь течи — ванды. Мезть стяко…

— Мон а туян эйстэть, а яван мартот, куш панть эйсэнь, куш иля.

— Саша, тон а эряват монень! — пижакадынь зяро ульнесть виень. — Азё ваксстон, монь арась мелем тонь неемс, — меринь сельведень пачк.

— Ёвтак, ансяк апак манче, тон вечкат лиянь?

— А вечкан, киньгак лиянь а вечкан, ансяк  тонь…

— Сестэ мекс панят эйсэнь? Бути вечксамак, мекс явовлить мартон?

Велявтыя прям вальманть ёнов. Авардинь, менелесь ушосо — седеяк. Минь вейсэ авардинек, прок кавто паро ялгат, ансяк арасель виенек лездамс вейке-вейкенень.

— Инескеть, ёвтак тень, мезе лиссь? — саизе кедезэнзэ кедем.

Сонзэ покш ды кеме кедьстэнть, марявсь, мольсь кодамо-бути вий.

— Саша, эряви явомс… Монь ормам пек стака. Сонзэ марто кувать а эрить. Курок карман содамо, мезе алкукс теевсь. Анализтнэ невтьсызь...

— Монь арась мелем кадомс тонь  ве минутаскак, аламо-

шкаскак. Чарькодят? — вечкевикс вановтось лоткась сельмезэнь.

— Учосынек, мезе ёвтыть врачтне, — меринь мон.

— Мезекс учомс, зярдо тон эрямосон аштят васенце таркасо? Мон эрян тоньсэть, кемат? Тонтеметь мон кияк, нать, а чарькодеви?..

— Чарькодеви. Мон истя жо тонтеметь а эрян те эрямосонть...

— Зяро шказо? — Саша варштась часонзо лангс. — Кемень курок, капшан важодема таркав. Туян. Кода мелеть, ёман аламос. Ансяк иляк стувто: мон велявтан мекев.

Стямсто палымим, кенкшенть видьс пачкодезь варштась лангозон ды мерсь:

— Пичксек, тейтернем, вастомазонок.

Пекставсь мельганзо кенкшесь. Вай, мезе теинь!

Зяро авардинь се вестэнть! Ансяк монсь содан ды прям ало пайстомо тодовось.

Кавто чинь ютазь нолдымизь. Ёжом, видьстэ меремс, стакаль. Мезеяк тень эзь эряво, мелем мольсь те оштонть, ломантнеде, кошттонть, весемеденть. Пурнынь нулан-валан ды сыргинь инжекс патянень, велев. Оргодинь тестэ.

Монень а стувтови, кода лембестэ вастымизь. Тосо эрямсто бажинь а арсемс ормадонть, анализтнэде, больницядонть. Ёжом пароль-пароль, чинь перть налксинь колмо каткалевкстнэнь марто. Патям пейдсь:

— Покшат, яла налксят, прок вишка эйкакш.

— Мон вечксынь сынст, — сэтьместэ меринь каршонзо.

Весе шканть перть вейкеде арсинь — Сашадо. Чинь-чоп мельсэнь-превсэнь ульнесь: «Кода сон ней ськамнензэ? А паряк, лия тейтерь марто ашти?». Эрьва ве неинь эйсэнзэ онстон. Гайневтевлинь,  стувтыя ошс неень шкане сехте эрявиксэнть — телефононть.

Прялевсь таргось. Ульнесь шка велявтомс мекев ошов. Арасель мелем, ансяк эрявсь саемс анализтнэнь. Меельце вестэнть неинь истямо он. Аштян кодамо-бути покш ды пиже паксясо, вакссон ава. Коды цецясто каштаз. Сон сась малазон ды путызе мазыйдеяк мазый каштазонть прязон, мизолдозевсь, вадяшизе прям ды… сыргозинь. Эряви пурнамс килангов. А содан мекс, те онось кодаяк эзь туе прястон, сон истямо лия ёнов а молицяль, а чарькодевиксэль.

Ошось вастымим певтеме ломаньсэ, конат малав весе капшасть: кие тонавтнеме, кие важодеме… Мон жо чиинь больницяв, анализтнэнь мельга. Седеем истя токнось, прок бажась лисемс мештестэнь.

Совинь эрязкадозь, вешинь конёвон, молинь покш вальманть ваксс. Кедень сорность, эзть кунсоло. Окойники панжия конвертэнть ды ушодынь ловномо… Зяроксть ловныя  —  а содан, а ледстяви. Кодаяк эзинь кеме сёрмадозентень, букватне кирнявтнесть, ёмсесть, чамаван тундонь васенце чудикерьксэкс чудсть сельведть. Ансяк аволь апародонть, мекевланг. «Анализэнк вадрят. Тынк арась истямо орманк». Пульзявинь масторов, ёмасть весе валон. Те весе монь марто? Пурнынь эрявикс конёвтнень ды  ношкстынь врачонтень. Сонгак кенярдозевсь кисэнь.

Больницясто лисемстэ маринь кавто важодицятнень кортамост: келя, исяк панизь вейке од важодицяст, кона допрок эзь топавто эсь тевензэ, мезеяк эзь машто, тонадомояк эзь бажа, тапсесь анализтнэнь…

Вана кие чумось?! Вейке а паро ломанде аламо кармась те больницясонть.  А паряк, сон сырги важодеме лия лецямо таркав? Зяро мелявкст, зяро апак удо веть, зяро сельведть валозь! Кияк а соды…

Капшинь кудов, эрявсь муемс телефононть, муемс Сашань. Кода мизолдсь се чистэнть чипаесь, кода эждсь! Мон покш мельсэ пандынь чинтень истя жо мизолкссо, кецинь: «Мон шумб-

ран, чипай, шумбран!». Лопатне каштордсть пильгалон, марявсь, сыньгак кецясть мартон, кадык эрястькак меельце чить.

Кудосо васенцекс саия телефононть. Сон пешксель сёрмадовксто, гайневтемадо. Весе Сашань пельде. Ёмавтымим таргос. Ансяк зяроксть эзинь гайневте цёрантень, мезеяк эзь лисе. Сонзэ телефонозо чатьмонсь.

— Саша, монь истямо покш кенярксом, ков тон ёмить? — кортынь эсень марто.

Учомс седе тов арасель вием. Сёрмадынь тензэ: «Туинь велев, бабанень. А кулан, карман эрямо».

Умок араселинь бабань кедьсэ. Тердсь эйсэнь, ды яла аютколь ардомс. Чокшне ёнов ансяк пачкодинь велев. Тошнакадсь кисэнь а ёвтавияк кода. Монгак истя жо, паряк, седеяк пек. 

Эзинь кенере совамо, кармась эйсэнь каванямо. Сонзэ столь лангсто понгсь кедезэнь книгине, «Жития святых» лемезэ. Панжия, ванкшнан. Сельмень лоткасть вейке лопанть лангс. Тосо аштесь… авась, кона онстон казизе тень каштазонть.

— Бабай! Бабай! Сака курок тей! — тердия сырькаень.

— Мезе теевсь? Мекс истя пижнят?

— Бабай, те авась сакшнось тень онстон, каштаз казсь…

— Каштаз,  мерят? Тейтернем, сон арсесь теть паро, а эряви тень стувтомс. Путт церьковасо штатолнэ сонзэ лемс.

— Путан, кода эно, а стувтса.

Пелевес седейга кортынек бабань марто. Кортазь матедевиньгак.

Валске марто совась тенек кудонь сэрьсэ цёраломань. Саша.

— Вантака, кие сась! — кенярдозь мерсь бабам.

Чиинь Сашанень, прынь кирьгазонзо.

— Мон тонь зярдояк а кадтан, Саша! Нолдык чумом, марят? Тосо манявсть, больницясонть! Кодамояк орма арась, мезеяк арась, Саша!

— Лоткак, лоткак… — тошказевсь цёрась ды псистэ палымим.

 

ИЛЬВЕДЬКС

Даша озадоль вальмалангсо. Сон кувать вансь пертьпельга, алов, менелев, се кинть лангс, кона туиль сынст ошсто ды ветиль ков-бути паксяв, васов, лия ошов. Те кияванть чинек-венек певтеме ардсть машинат. Ков? Мезекс? Дашамезень этажось кеменце, секс сонзэ сельме икеле сравтовсь певтеме пертьпельксэсь. Ломантнеяк марявить вишкинекс, весе ков-бути капшить-чиить. Оно, юты Веруш шабраст. Кода свал, канды зярыя юдмат. Даша стакасто таргизе оймензэ: «А мезть шканть таргсемс. Меельцеде варштан мазычинть лангс ды — икелев!», —  мерезевсь сон эськанзо.

Кенкшесь чикордозь панжовсь, поровтонть лангсо аштесь авазо. Сон васня эзь чарькоде, мейсэ тевесь, сэтьместэ кевкстсь:

 — Тейтернем! Чивалдынем! Ойминем! Тон мезекс тозонь кузить?

 Зярдо авась неизе — тейтерензэ пильгетне нолдазь ушо ёнов,  чувтомсь тарказонзо… Вейке-кавто секундат… ды сон кирнявты алов… Кеменце этаж… Эйстэнзэ мезеяк а кадови!

 — Аштека, кунсолока…. Тон чарькодят, мезе теят? — Авась эскельдясь тейтерензэ ёнов.

— Иля са ваксозон! Нейке кирнявтан! — пижакадсь Даша.

Авась пупставсь, сон чарькодсь: тейтерезэ алкукс анок кирнявтомо. Вановтозояк ульнесь прок аволь эсензэ, теке а ломаненьгак. Авась содылизе тувталонть, кона пачтизе тенень тейтерензэ.

— Даша, марят…

— Иля са малазон!

— Чипайнем, мон эрян тонь кисэ! Тон — шожда варминем пси шкасто,  коштом, конасонть лексян, тон — весе эрямом.  Валгт, кунсоломак! Адя, варштак чавачамос. Варштык, кодамо тон одат, мазыят. Тонеть визькс туемс эрямостонть эсь олясот. Тонеть ансяк кемгавксово иеть! Весемесь икеле…

— Авай, мон аволь…

— Пазось кучинзить монень казнекс. Кучинзить  эрямо, валдо тевень тееме, вечкеме…

— Иля корта монень вечкемадо! — таго пижакадсь Даша.

— Вечкемась эрямосонть саи пек покш тарка, — кортась седе тов авазо. Вечкемасто тон чачитькак. Сяткинем, те цёрась аволь тонь. Кода ульнесь ламо тейтерень кирдицякс, истямокс кадовияк. Сы шка, ды тон вастсак алкуксонь вечкемат. Весемесь икеле. Содат, зяро паро учи эйсэть?

— Мон а кеман парос…

— Даша, те цёранть кондят масторсонть певтеме, тонь кондят — арасть. Кие тосо учи эйсэть? Тосо, ков пурныть? Пазось а вечксынзе сетнень, кить туить эрямостонть эсь олясо. Велявтт ёнон, сяткинем, арсек ёвтазенть лангсо. Пазось сонсь соды, зярдо саемсат эстензэ менелев. Сонензэ кочкама, аволь тонеть.

Даша яла вансь ушов, шкань-шкань налксесь пильгесэнзэ. Сэредьксэсь эзь пота, сон пезназь пезнась оймезэнзэ. Вечкевикс ломанезэ миизе, манизе, кадызе, пейдизе. Дашадо башка, секе  шкастонть вастневсь лия марто. Даша, паряк,  теде а содавольгак, бути а вастовлинзе сынст ошонь куншкакуросто. Аштесть кутмордазь, палсесть. Тейтересь таймазкадсь ды кодаяк эзь кеме неезентень. Сон мольсь кутморицятнень малас ды эль марявикс вайгельсэ шумбракстнесь. Вадим эзь тандадо, прок истя эрявськак. Шумбракстнеськак та-кодамо стяконь, нулгодькс мизолкс марто, мейле ёртсь: «Даша, теевть содавиксэкс вечкевикс тейтерем марто, сонзэ лемезэ…».

 Даша эрязасто велявтсь ды тусь, чийсь сонськак а соды ков, весе ошканть…

— Даша марто ве классо тонавтнинек, — ёжовсто манчесь лия тейтеренстэнь цёрась.— А чарькодян, мекс истямо ладсо тусь, сонсь васенцекс пшкадсь тенек…

…Чокшнень перть сестэ авась оймавтсь тейтерензэ. Теде мейле ютась зярыя шка, марявсь, сэредьксэсь потась. Ды тесэ вана, кузсь вальмалангс, арси кирнявтомо кеменце этажсто.

— Даша, тейтернем, мезе мон карман тееме ськамон, тонтеметь? Зярдо чавовсь тетят, тон монень ульнить идемакс, валдокс, чипаекс. Монь эрямом — тон. Тонтеметь кинень панжса оймем, ёвтаса сэредьксэм? Лисни, монгак чуман — тон кузить вальмалангс ды анокат туеме, лисни, стяко кортангак… — Аванть чамава чудезевсть ризксэв пси сельведть, валонзо маштсть.

Даша варштась аванзо лангс, сонзэяк сельмензэ пешксельть сельведте.

— Авай, авинем, нолдык чумом, те ильведькс ды… — тейтересь велявтсь аванзо пелев.

Тона ёртовсь вальмантень, каподизе тякинензэ, кутмордызе, ушодсь псистэ палсемензэ.

— Авай, нолдык чумом, мон а видестэ теиксэлинь, мон а кадтан тонь, свал улян вакссот, карман мартот, — ильсесь Даша.

Вейс-вейс лекшкадозь, ават-тейтерть аштесть озадо киякссо ды авардсть. Неть сельведтне эзть сэпшкавто, эзть пулта оймест-седеест, сынь макссть од эрямонтень кемема.

 

ВАСТОВОМА

Те лембе маней валскестэнть Наташань туртов весемесь ушодовсь лиякс, аволь кода свал. Васняяк, сон аламодо седе куватьс удовсь, мейле стувтынзе машинань панжоманзо, велявтнесь мекев кудов. Седе тов седеяк покш тамаша лиссь: пелекилангсо, светофор маласо, апак учне тесьмадизе икелензэ аштиця машинанть. Тейтерьавась истякак капшась, тесэ оно мезе! Наташа гайневтиксэль мирденстэнь, мелезэнзэ ледсь —  тона лия ошсо, кучизь важодемань коряс… Вана икельце машинастонть лиссь азорось ды уш васолдо ушодсь:

—  Эй, матедевить руленть экшс эли ардтнеме эзить тонадо?! — Сон сась Наташань ваксос, ды чачозо валовсь кеняркссо: — Наташа!

Наташань вановтозояк чевтемсь, сон содызе умонь вечкевиксэнзэ, Сергеень.

—  Серёжа! Тон? А содаваткак.

—  Мон. Стувтымик, нать? Мезе, ардтнеме тонавтнят?

—  Аволь, аволь, мон уш умок ардтнян. Капшан важодеме. Ванан, кивчкадсь якстересь, мон лоткамо истя, ды сеске эзь лисе, эйзэть тесьмадевинь… Пек тапитинь?

—  Варштама. —  Сергей мольсь машинатнень юткс, вешкстазевсь, вансь-тейсь ды мери: — Тевтне берянть, Наташа, тонсенть эряви пачтямс витнема таркав.

—  Ков?

—  Автосервисэв. Мон тосо важодян. Тон азё мейсэяк пачкодть важодема таркав, минь оянь марто паньсынек машинанть. Иля мелявто, витневи. Вана те адресэнть коряс мусамизь мейле. —  Сергей венстизе Наташанень визитканзо.

Тейтерьавась сыргась автобусонь лотксема таркантень, молемстэ велявтызе прянзо ды серьгедсь:

—  Сюкпря, Серёжа. Мон сован важодемадо мейле.

Наташа чоп мелявтсь машинанзо кисэ. Вадря се, Серёжа понгсь, лия марто «палавольгак», ки соды, кода весемесь араволь. Тунь апак учне лиссь те вастовомась. Малав кавксо иеть эзть нее вейкест-вейкест. Тесэ -- вана, килангсо. Мезе ульнесь ютксост, весе кадовсь шожда ледстнемакс.

Наташа эскелясь автосервисэв ды ледстнесь од шканзо. «Кадык, — арсесь сон, — весемесь лиссь вадрясто. Мон ней аволь ськамон, свал ули кинень пшкадемс, кинь лавтовс нежедемс стака шкасто —  мирдень, вечкевикс Сашань».

—  Наташа, сыть уш? Совак эно, —  мерсь Сергей.

—  Кода тосо тевтне, Серёжа? —  ульнесь Наташань васень кевкстемазо.

—  Ардомапелентень алкуксонь витнема эряви.

—  Кодамо витнема?.. Сон аволь пек умок рамазь, —  тандадсь Наташа.

—  Иля ризнэ, мерькавксось витеви. Тонсь рамик? — пшкадсь Сергей.

—  Косто монсь? Пейдят, нать, лангсон. Мирдем казизе.

—  Вадря истямо мирдесь — машина казсь.

—  Вадря, а мезть пеняцямс лангозонзо.

—  Вай, кодамо тон кармить! —  Наташань чачосто сельмень апак сае, мерсь Сергей.

—  Кодамо? Берянь?

—  Мекс сеске — берянь. Мекевланг, мазыйдеяк мазыят, седеяк вадрялгадыть, —  седейшкава мерсь Сергей.

—  Мон икелеяк истямолинь, —  мизолдозевсь Наташа.

—  Сестэяк паролить, а мезть кортамс. Эно ёвтнек, кода эрят-аштят? Умок эзинек вастовкшно.

—  Умок, Серёжа, кавксошка иеть. Сестэ студентэлинек. Кода эрян?.. Кода ламот. Мирденень лисинь, цёра чачтынь, важодян вечкевикс таркасо. Тонсь кода?

—  Прядыя университетэнть, саимизь армияв. Служинь ие.

—  Куш вестешкадо сёрмине кучовлить…

—  Тонсь содат, Наташа, а вечкса бизаксамонь тевенть, кудовгак чуродо весть сёрмалинь. Самодо мейле вастыя сонзэ… Урьвакстынь. Ней вана тейтернем школав туи. Важодян тесэ, ардомапельть витнян. Пандомс пандыть, ансяк ярмактне ялатеке ковгак а сатныть. Наташа, мон нейгак ванстан тонь фотографиянть, сёрманть.

—  Нейгак? —  дивазевсь Наташа. —  Вай, Серёжа, мон арсинь, умок пултыть-ёртыть.

—  Эзинь. Сехте валдо ледстнемакс кадовить.

—  Седе валдот эзть кадово? —  пейдезевсь Наташа.

—  Эзть. Кемемак...

—  Сергей, туемс тень эряви. Саик номерэм, кода витневи машинам, гайневтть. Карман учомо.

—  Гайневтян, кода эно, —  мерсь Сергей. Моликсэль аванть ильтеме, тердизь мезень-бути кандомо.

Таргонь перть Сергей аволь якась, ливтнезь ливтнесь, мизолдсь весень каршо, седеезэнзэ мерят тундо совась. Кудосояк полавтовсь, ней эзь педсе эсензэ «инегуентень»: тень аволь истя теик, тонань… Нись сонськак а чатьмониль. Стака мартонзо эрямс, ды а ков молемс, вейсэнь тейтерь кастыть.

Чинек-венек Сергей арсесь Наташадо. Од шкасто зняро эзь арсе, кода ней. Икелензэ аштесть ашназа-сэнь сельметне, чевте мизолксось, пилесэнзэ гайгсь седейс токиця вайгелесь. А мако турватне… «Вай, мезе мартон?! —кундылизе прянзо цёрась. — Сон мирдень кедьсэ, мон урьвакстозян. Мезе учан?» Кенярдовтсь Сергеень вейкесь: курок витневи машинась, ды Наташа сы мельганзо. Сон ёвты тензэ одс гувкадезь вечкемадонзо, корты мартонзо ды таго карми вайсеме мазый сельметнес.

Эль учовсь цёрантень шкась. Ды вана Наташа сась машинанзо мельга.

—  Шумбрачи, Серёжа!

—  Наташа! Шумбрачи! —  кенярдозевсь цёрась. —  Ули шкат? Кортавлинек аламос…

—  Шкам?.. Зярс мирдем эзь са мельган, ули, —  мизолкссо казизе энялдыцянть Наташа.

—  А содангак, кода ушодомс кортамонть…

—  Серёжа, —  пейдезевсь тейтерьавась, —  мезе тень истямо ёвтавлить, бути визделгадыть, прок од цёрынька?

—  Да, виздемась ули эйсэнь, а мезть сёпомс. Наташа, мон пек ламо арсян тондеть, ледстнян эйсэть. Содазь, шкась ламо ютась, ансяк вана ней чарькодия: теинь ильведькс. Явовинек кода-бути апак учо ды… ней уш а велявтсак се шканть. Кода вастытинь ютазь таргостонть, седеем толокс кирвазсь.

—  Мерят, умонь куловтнестэ толпандине сыремсь оймесэть?

—  Мон меревлинь -- пандошка толпандя. Паряк, пейдезеват, ансяк мон тонь вечктян, Наташа…

—  А пейдян, Серёжа, кеман теть. Мон сеске редия, кода ванат лангозон, ды таргонь перть секе тев гайневтнить тень. Чарькодтян, ансяк превс а саеви: мезекс весе те зняро шкань ютазь? Косолить икеле, зярдо мон арсинь тондеть, зярдо учинь эйсэть чить ды веть? Паряк, ледстясак, максния теть од адресэм, тон алтнить самс. Эзить са. Марявсь, седеемгак лазови. Ванынь вальмава ды учинь, ознынь — савлить. Сестэ чаволь потмот, арасель вечкемань байгинеяк. Улема, каштанчись эзь нолда эйсэть. Эно куш кода ялга савлить...

—  Мон васня эзинь сыргаво, мейле адресэть ёмавтыя…

—  Ней мезть пиштемс! Пек стакаль стувтомс тонь. Чить бажинь а ледстнемс тондеть, ветнестэ жо… Эрьва вене неилитинь онстон, косо свал ульнинек вейсэ. Мезеяк, ютась шкась, эзинь синдеве, эрян. Вешнинь уцяска, ды муия. Тонгак иля тално, весемесь юты.

—  Монень маряви, те ёжось а юты…

—  Серёжа, мон вечкса мирдень ды кияк лия тень а эряви. Тонь ёжось кирвазсь ламо шкань ютазь, ней мезеяк а теят, мезеяк а полавтат.

—  Кодамо превтемелинь, Наташа! Велявтомс бу мекев се шканть!

—  Мезесь ютась, се зярдояк а сы одов. Оно мирдемгак, окойники, сы. Кеж иля сае, Серёжа. Эрямось истямо: мезе ансяк а неят, а марят, ков ансяк а понгат, —  чевтестэ мерсь Наташа.

—  Сюкпря, кунсолымик. Тон сехте, сехте вадрят... —  ёвтась Сергей ды нолдызе прянзо.

Мирдесь уш васолдо редизе, кодамо вановтсо а содавикс цёраломанесь вансь нинзэ лангс. Те ки истямось? Вансы: цёрась венстизе кедензэ Наташань кедьс. Тона ноцковтызе кедензэ. Саша, киньгак лангс апак вано, ёртозь ёртовсь нинстэнь педсиця цёранть лангс, кундызе сиведе.

—  Мекс токшат нинь?! Тон кият тензэ?!

Сергей кодаяк эзь мене Сашань виев кедтнестэ.

—  Мезе теть теинь? Мейсэ чумом? Нолдамак!

—  Мейсэ чумот, кевкстнят?!

Саша, паряк, мокшнанзояк тевс нолдавлинзе, бути Наташа шкастонзо аволизе оймавто:

—  Саша, Саша, те ломанесь машинам витнизе, инескеть, лоткак! Ломанть ваныть, оймак, мезеяк берянь эзь тееве…

Мирдесь теке ансяк ней неизе нинзэ, варштась ёнонзо, аламодо энгамсь. Ёжос сазь, мерсь:

—  Адя тестэ, те идемевсесь салатанзат оштё.

— Мезть кортат? Сергей витнизе машинанть, а тон мокшнасо аволят. Мезе мартот?

— А содан. Кода неинь ваксстот а содавикс цёра, весе рунгом соракадсь. Монськак а чарькодян, мезе теевсь мартон...

—  Вана истя, иля ардтне командировкава! Машинантькак тонсь кармат витнеме, ды кодамояк идемевсь а педи тень, — пейдезевсь мирдензэ каршо Наташа. Мейле кундызе Сашань кавалалдо, ды сынь вейсэ сыргасть машинанть саеме.

Сергей чувтомозь вансь мельгаст. «Те уцяскав цёранть таркасо улемаль монень», — арсезевсь сон.

Туицятнень вановтсост ульнесь алкуксонь виев вечкема, кона мейсэяк а мадстеви, а куловтови…

 

ТУНДОНЬ ТОШКАМО ШКАСТО…

—  Простямак, те мон гайневтян, — ушодовсь телефонга кортамось.

—  Мезе таго? — а мельсэ кевкстсь цёрась.

—  Мезеяк… Вайгелеть мариксэлия… Мон ламо шка а салан. Ансяк ёвтан: мон туян, туян эрямо Питерэв.

—  Ды мезе, туят... Тосо кияк учи эйсэть? — кевкстизе цёрась.

—  Монь тесэяк кияк ды мезеяк а кирди. Тосо лелям, алтасть паро важодема тарка, учить, келя… Тей а велявтан. Кеман, тосо ушодови од эрямом. Иля мелявто, а карман тонь налкставтомо, а карман эрямозот эцнеме, — сэтьместэ, апак капша кортась Юля. — Мелетькак, койсэнь, мольстия, — тейтеренть вайгельсэ марявсь мизолкс.

—  Ды паро, мезть уш… Паз марто эно, сыргак, уцяска теть од эрямосо… — мельде-валдо мерсь Алексей.

Ков седе ламо шка ютась, тов Алексей седеяк сеедьстэ ледстнесь, чаравтнесь пряванзо те кортнеманть. Нама, ней уш мезентькак а велявтсак. А сестэ… Сестэ сон кода маштсь нарьгась тейтеренть лангсо. Чуросто ледстниль эйсэнзэ, чуросто гайневтниль, манчиль. Юлянь кондятнэде сонзэ ламольть: течи — те, ванды — лията.

Весть Юля тердизе Алексеень ушова ютамо. Ансяк-ансяк ушодовкшнось тундось.

—  Мезе ушосонть эзить нее?

—  Вай, тосо истямо паро! Тундось элякали! Марясак, кода тошкить од лопатне? Марясак, кодамо коштось? Ансяк тундонь тошкамо шкасто сон эрси истямо — экше ды теке шкане чевте ды лембе…

—  Кодат тундот? Монень а зярдо якамс мазычинь ванномо!

—  Монь марто вастовомскак арась мелеть?

—  Юля, а колавлия ёжот, ансяк…

—  Содан, содан, нолдык чумом, кеман — важодемат ламо. Мольтяно лия чистэ, — мерсь Юля.

—  Эно паро, вастовомас! — ёртызе телефононть Алексей, шождасто лекстясь ды цяхазевсь: — Теемс тень а мезе — тонь марто ушова лыйнемс…

Ней Алексей молевель куш ков — ансяк кияк эйсэнзэ а терди. Ды а пачкодить Юлянь пельде ойместэ молиця валтнэ: «Ну, кода тевтне, кода эрят? Мон истя тошнакадынь кисэть…». Те тейтересь, паряк, ськамонзо модамасторонть лангсо алкукс вечкилизе. А мезе несь-марясь каршо? Ансяк манчемат ды стяконь валт. Юля марто меельце кортнемась эзь туе Алексеень мельстэ-превстэ. «Кеман, тосо ушодови од эрямом…»  Мекс сестэ истя кежейстэ кортась мартонзо? Юля истя бажась од эрямос! Учось туема шканть, кемсь — тосо сонзэ весемесь карми лиякс, аволь кода тесэ.

Питерэв аламодо апак пачкоде Юлямезень машинаст эйс эртевсь покш КАМАЗ, конань ветицязо матедевкшнесь. Теде Алексей марясь ансяк шкань ютазь, секс калмамояк эзь понго.

Кортыть, Пазось саи эстензэ сехте паро ломантнень — валдо ойметнень, паронь арсицятнень, эрямонь вечкицятнень. Юля ульнесь самай истямо…