Solidariteit se private Afrikaanse universiteit, Akademia, het vanjaar groot vordering getoon en is steeds bedrywig met beplanning vir uitbreiding in die toekoms.
Akademia gee aan studente toegang tot bekostigbare graad- en ander universiteitskwalifikasies deur die vestiging van na-uurse klaskontaksessies in sewe sentrums regoor Suid-Afrika. Daar word bykomende sentrums in ander gebiede vir 2017 beplan.
Hierdie inisiatief van die Solidariteit Beweging bevorder die idee om te studeer terwyl jy werk – so doen jy waardevolle ervaring op en verwerf jy ‘n kwalifikasie sonder om baie studieskuld te laat oploop. Akademia is ook op die voorpunt van tegnologie. Deur middel van ‘n hoogs gesofistikeerde videokonferensiestelsel word klaskontaksessies vanuit ’n ateljee in Pretoria na al die sentrums gelyktydig uitgesaai.
Kwalifikasies
Akademia bied tans die volgende programme aan:
- BCom-graad in Bestuursrekeningkunde
- BCom-graad in Ondernemingsbestuur
- Hoër Sertifikaat in Rekeningkunde
- Hoër Sertifikaat in Kantooradministrasie (Algemeen of Projekadministrasie)
Daar word deurlopend ondersoek gedoen om te bepaal wat toekomstige studente se behoeftes is sodat nuwe programme moontlik ontwikkel en aangebied kan word. Dit is ʼn proses wat tyd verg, want programme moet eers geakkrediteer word voordat dit aangebied kan word.
Drie nuwe studierigtings word vir die nadere toekoms beplan: Verpleegkunde, BCom Ekonomie en Regte; en BCom Finansiële Beplanning. Na verwagting sal Akademia in 2016 sowat 500 studente hê wat vir een van hierdie kwalifikasies geregistreer sal wees.
Nuwe gebou
Die Boufonds het dit vanjaar vir Akademia moontlik gemaak om na ‘n nuwe kampuskompleks in Centurion te verskuif. Hierdie stap dra daartoe by dat Akademia tot ’n volwaardige Afrikaanse universiteit uitgebou kan word.
Lede van Solidariteit (van enige ouderdom) en hul afhanklike kinders tot op die ouderdom van 21 jaar kwalifiseer om aan die kompetisie deel te neem.
Drie beurse word uitgegee, wat die volgende insluit:
- Alle klasgelde
- Studiegidse en handboeke (handboeke vir graadkursusse uitgesluit)
- ’n Tabletrekenaar
Akademia en eNuus Elite-beursprogram
Hierdie program het vyf Elite Beurse uitgegee ter waarde van ongeveer R250 000 elk vir studies in BCom Ondernemingsbestuur. Wat hierdie beurse uniek maak, is dat studente gedurende hul studie blootstelling kry aan die wêreld van werk deur ’n vooraf georganiseerde internskapprogram.
Die beurs sluit in:
- Drie jaar se volle studiegeld by Akademia (insluitend klasgelde, boeke, studiegidse, tabletrekenaar, eksamens en registrasiekoste);
- Drie jaar se studiementorskap
- Drie jaar se uitkomsgebaseerde werkservaring
- Persoonlike ontwikkelingskursusse
- Blootstelling aan verskeie bedryfs- en denkleiers
- Sakgeld per maand
- ’n Oorsese studie- en blootstellingsreis in die derde jaar
Op die foto ingesluit is 2015 se beurswenners saam met hulle programkoördineerders.
Die nuwe beurswenners vir 2016 is intussen ook bekendgemaak en sluit in; Darcia Bench, Ruan Pieterse, Jean-Pierre Erasmus, Andrea Erasmus en Simoné Kapp.
Helpende Hand-studiehulp
Reeds meer as R73 miljoen is uitbetaal om 4 300 studente te help om te studeer, maar daar word beplan om oor vier jaar R100 miljoen per jaar aan studiehulp te gee.
Daar word beoog om meer as R1 miljard oor die volgende vyf jaar in Afrikaanse opleiding te belê; dit strek van kleuterskoolvlak tot ’n privaat Afrikaanse universiteit.
Die geleentheid om ’n studiefonds te stig, word bevorder deur Helpende Hand se Studiefondssentrum wat die beursfonds namens die individu of maatskappy bestuur en administreer.
Solidariteit-lede kry 20% afslag op studies by Akademia en het toegang tot rentevrye studielenings wat deur Helpende Hand aangebied word. Jy hoef slegs die bedrag terug te betaal wat jy leen, en jy hoef dit eers terug te betaal nadat jy jou studies voltooi het. Dit bly egter die betrokke donateur se reg om te besluit of ʼn rentevrye studielening wel later dalk in ʼn studiefonds omskep kan word.
Akademia Entrepreneur – Sakeplankompetisie
Die Akademia Sakeplankompetisie is ʼn nie-winsgewende inisiatief van Akademia wat spesifiek begin is met die doel om bestaande sowel as voornemende besigheidseienaars te help om volhoubaar sake te bedryf, hul eie besigheid te begin of hul huidige onderneming ’n hupstoot te gee. Die kompetisie is in twee kategorieë verdeel – nuwe besighede en bestaande besighede.
‘n Sakebestuurwerkwinkel is tydens die kompetisie aangebied, ’n paneel deskundiges het die deelnemers se sakeplanne beoordeel en ‘n proses van mentorskap is deur die kompetisie se mentorskapvennote behartig.
In die afdeling vir nuwe besigheid het Jaco Ferreira met sy konsep Revolutionfit gewen, terwyl Elize Lourens met haar Villiers Padstal die kategorie vir ʼn bestaande besigheid gewen het. Die wenners het hul deel van meer as R1,475 miljoen in prysgeld ontvang. Pryse sluit onder meer ’n jaar se mentorskap, bemarkingshulp, finansiële hulp, regshulp en ’n kontantkomponent in.
Akademia fokus nie net op sy eie studente nie en het vanjaar ‘n twee dae lange wiskunde-winterskool vir graad 12’s aangebied om hulle vir die rekord- en eindeksamen voor te berei, teen slegs R200.
Hiermee wil ons aantoon dat Akademia nie stilstaan nie en vanjaar vele prestasies behaal het. Verdere ontwikkeling sal plaasvind met die oog op die verwagting van 2 000 studente en 24 sentrums wat reg oor die land beplan word
