Հարձակում ՊՊԾ գնդի վրա. Պավել Մանուկյանն ու որդին վիրավորվել են
03:20 Խորենացի փողոցում այս պահին գրեթե ոչ ոք չի մնացել՝ բացի ոստիկաններից ու լրագրողներից: Բոլոր քաղաքացիները բերման ենթարկվեցին, այդ թվում սովորական անցորդներն ու ուղղակի տարածքում կանգնածները:
03:10 ԱԺ պատգամավոր Նիկոլ Փաշինյանն Էրեբունի հիվանդանոցում է։ Այնտեղ բազմաթիվ ոստիկաններ կան, գրեթե բոլոր մուտքերը փակ են։ Ներսում վիրահատում են Սասնա ծռեր խմբի վիրավոր անդամներին։
03:09 ՀՀ ոստիկանության լրատվության եւ հասարակայնության հետ կապերի վարչության պետ Աշոտ Ահարոնյանը հայտնում է եւս մի քանի վիրավոր ապստամբների մասին:
Ըստ Ահարոնյանի` իրավապահների տվյալներով՝ զինված խմբի ևս երկու վիրավոր անդամ գտնվում են ՊՊԾ գնդի տարածքում: Բանակցություններ են ընթանում. իրավապահները փորձում են համոզել, որ նրանց նույնպես բուժօգնություն ցուցաբերվի, բայց վիրավորների ընկերները, ըստ Ահարոնյանի, մերժում են:
Նա նաեւ հիշեցնում է, որ հենց առաջին օրվանից գնդի տարածքում է ևս մեկ վիրավոր, ու չնայած իրավապահները բազմիցս հորդորել են թույլատրել, որ նրան նույնպես բուժօգնություն տրամադրվի, զինված խմբի անդամները մերժել են առաջարկը:
02:45 Էրեբունի ՊՊԾ-ում փոխհրաձգության հետեւանքով վիրավորվածներն այս պահին վիրահատվում են:
Այս մասին մեզ հետ զրույցում տեղեկացրեց ՀՀ ոստիկանության լրատվության եւ հասարակայնության հետ կապերի վարչության պետ Աշոտ Ահարոնյանը՝ այլ մանրամասներ չհաղորդելով:
02:18 «Սասնա ծռեր» խումբը հայտարարությամբ է հանդես եկել.
«Քիչ առաջ ոստիկանները հարձակում են գործել գնդի տարածք, վիրավորվել են Պավել Մանուկյանը, Արամ Մանուկյանը, Գևորգ Իրիցյանը եւ հավանաբար խմբի այլ անդամներ: Ոստիկանները առևանգել են Պավելին, Արամին, Գագիկ Եղիազարյանին եւ խմբի ևս մեկ անդամի»:
01:45 Ոստիկանության լրատվության եւ հասարակայնության հետ կապերի վարչության պետ Աշոտ Ահարոնյանը ֆեյսբուքյան իր էջում գրել է. «ՊՊԾ գնդի տարածքում իրավապահներին են հանձնվել զինված խմբի անդամներ Գագիկ Եղիազարյանն ու Արամ Հակոբյանը:
Տեղի է ունեցել փոխհրաձգություն, որի հետևանքով վիրավորվել է իրավապահներից մեկը, ինչպես և Պավել Մանուկյանն ու նրա որդին՝ Արամը: Երեքն էլ անմիջապես տեղափոխվել են հիվանդանոց:
Այս պահին հրաձգությունը դադարել է և ընթանում են բանակցություններ՝ զինված անձանց հանձնվելու գործընթացն ավարտին հասցնելու համար»:
Հիշեցնենք, որ ավելի վաղ Ահարոնյանը հայտնել էր, որ ՊՊԾ գնդի տարածքից կրակոցներ են հնչում:
