Кызыт Марий Эл Республикын Вуйлатышыже –
Леонид Игоревич Маркелов.
Леонид Игоревич Маркелов 1963 ий пеледыш тылзын 25-ше кечыштыже Москва олаште шочын. Руш. Ешан. Эрге ден ӱдыржӧ уло. Кӱшыл шинчымашан юрист. 1986 ийыште СССР Аралымаш министерствын Йошкар тистан военный институтшым тунем лектын. Философий шанче кандидат. 1986 ий гыч 1992 ий марте Марий Эл Республик кундемыште военный прокуратурышто службым эртен, прокурор да следствий паша дене тӱрлӧ должностьым шуктен: 56680 в/ч-ын следовательже, кугырак следовательже, военный прокурорын полышкалышыже.
1992 ийыште армий гыч кайымек, адвокатлан ыштен. 1995 ийыште Россий Федераций Кугыжаныш Думын депутатшылан сайлалтын. 1995 ий гыч 1997 ий марте Россий Федераций Кугыжаныш Думын Шанче да туныктымаш шотышто комитет Председательын алмаштышыже лийын. 1997 ий гыч 2000 ий марте – Россий Федераций Кугыжаныш Думын Бюджет, налог, банк да финанс шотышто комитет член.
2001 ий шорыкйол тылзын Л.И.Маркелов икымше гана Марий Эл Республикын Президентшылан сайлалтын. 2004 ий теле тылзын 19-ше кечыштыже «Единый Россий» политике партийын полшымыж дене кокымшо жаплан сайлалтын. Сайлымашын икымше турыштыжак сеҥен, 56,86% сайлышын йӱкшым налын.
2009 ий теле тылзын 29-ше кечыштыже Россий Федерацийын Президентше Д.А.Медведев Марий Эл Республик Президент полномочийым кумшо гана шукташ Л.И.Маркеловын кандидатурыжым Марий Эл Республикысе Кугыжаныш Погыныш каҥашаш луктын. 2010 ий шорыкйол тылзын 15-ше кечыштыже Л.И.Маркелов товатмутым пуэн да должностьыш официальнын шогалын.
Л.И.Маркеловын Марий Эл Республик Президент должностьышто пашам ыштымыж жапыште кундемысе экономикыште да мер илышыште сай вашталтыш-влак лийыныт, калыкын илыш кӱкшытшӧ ятырлан кушкын.
Л.И.Маркелов IV степенян «Шочмо эл ончылно надырлан», Келшымаш орден-влак, Руш Православий Черкын да Российысе министерстве ден ведомство-влакын медальышт, суап знакышт дене палемдалтын.
Марий Эл Республикын Вуйлатышыже – Марий Эл Республикын эн кӱшыл должностян еҥже, Марий Эл Республик Виктерын Председательже.
Марий Эл Республикын Вуйлатышыже:
- Марий Эл Республикыште граждан-влаклан права да эрыкышт дене пайдаланаш йӧным ышта, республикын лӱдыкшыдымылык ден кундем тичмашлыкше, закон шуктымо да права шотышто порядкым эскера;
- Марий Эл Республикысе Рӱдӧ сайлымаш комиссийын пел ужашыжым палемда;
- Марий Эл Республикысе Кугыжаныш Погын дек республикысе положений шотышто ий еда посланий дене лекташ праван;
- Марий Эл Республикысе пунчалым шуктен шогышо кучем орган-влакым вуйлата да нунылан Кугыжаныш Погын дене вашкылым ышташ полша;
- Марий Эл Республикын Конституцийжым да законжо-влакым шуктен шогымым эскера;
- Марий Эл Республик Вуйлатышын Администрацийжым чумыра да Марий Эл Республикысе пунчалым шуктен шогышо кучем орган-влакын структурыштым палемда;
- Марий Эл Республикысе Кугыжаныш Погын дене каҥашен, Марий Эл Республикын Виктержым чумыра. Тудын радамышкыже вашталтышым пурта;
- Марий Эл Республикын бюджетшым ямдыла да Марий Эл Республикысе Кугыжаныш Погынлан ончаш пуа. Темлыме бюджет почеш пашам виктара, тидын нерген палдарен шога. Марий Эл Республикысе Кугыжаныш Погынлан Виктерын паша лектышыже шотышто ий еда отчётым ышта, тыгодым Кугыжаныш Погынын йодышыжо-влакланат вашешта;
- кугыжаныш кучем федерал орган, Россий Федераций субъектласе кугыжаныш кучем орган да верысе шкевиктем орган-влак дене пырля пашам виктарыме да вес элла дене экономике кылым ыштыме годым республик нерген палдара, ойпидышеш республик лӱм дене кидым пышта;
- республикын полномочиян ӱшанъеҥже-влакым ойыра;
- кугыжаныш награде да чаплӱм дене палемда;
- Россий Федерацийын Конституцийже, федерал закон, Марий Эл Республикын кызытсе Конституцийже да законжо дене келшышын моло полномочийымат шуктен шога.
Кыл кучымо нерген увер:
Вашпӧлем: (8362) 64-15-25
E-mail: glava-rme@gov.mari.ru
Адрес: 424001, Марий Эл Республик,
Йошкар-Ола, Ленин проспект, 29-ше пӧрт