提起馮英倫,大家會諗起邊個,會唔會係梁振英?吓,點解係CY,唔係舒淇???如果有呢三個大問號,大家就要停一停、諗一諗,因為八方係講緊英倫而唔係德倫,前者係政助而唔係藝人,賞識佢嘅伯樂係前特首梁振英。雖則名叫英倫,但好愛國,喺港大搞學生會時,已經帶隊北上!
1983年出生嘅英倫(Allen)由梁班子過渡至新政府,續任發展局政助。Allen有個細佬細佢8年,由細到大住喺香港首批居屋之一嘅何文田俊民苑(家仲住緊㗎!),小學讀領島、中學讀迦密,由細到大讀書都係自動波,「屋企人對我啲功課都唔使點理」。
佢直言真係鍾意讀書,「上堂抄notes抄到好厚」,中學特別like中國文學,文科嘅佢亦愛歷史同經濟。讀好書有乜秘訣?「我係打爛沙盆問到篤嗰隻,未讀通時係都要讀到通為止」,自詡記性差背嘢唔叻,好在仲會融會貫通。高瘦斯文型嘅佢唔係運動健將,中學搞過學生報同劇社嘅幕後工作,「但都粉墨登場過一次,演福音劇。」
因為姑姐嘅影響,令佢自小都想入港大讀書,最終殺入呢間香港高等學府主修歷史政治,仲上莊做過國事學會,04至05年任學生會外務副會長,因為帶團破冰訪京交流惹爭議,成為當時「紅人」,卻因頻頻喺傳媒亮相解畫,惹嚟時任行會召集人嘅梁振英青睞,「佢話覺得呢個仔都有啲自己諗法,未畢業就搵我做助理,我未搵過工就做嘢咯。」
其實Allen嘅Daddy搞過酒樓,但佢最終從政而冇從商,相信都係個性使然。喺梁班子任職期間,佢小登科做老襯,Allen嘅太太原來係澳門人,雙方喺Wine Dinner認識,佢有時都會港、澳兩邊走,探下太太屋企人。羡唔羡慕太太成日獲澳門政府派錢?Allen不以為然,直指覺得派錢冇乜意義。