神隱32年的景黛音應ViuTV邀請復出拍劇，今次她與姜濤合作拍新劇《退休女皇》飾演兩母子。景黛音淡出娛樂圈已經有一段日子，不過她對鏡頭的靈敏度依然十分高、除了電話不離身之外，身邊總會有一塊鏡，每次影相前都會照一照鏡、確保自己在最佳狀態。而這塊鏡同樣是姜濤的恩物，兩母子輪流「互照」，人前人後相處儼如母子。不過在埋位前夕，姜濤曾經擔心身邊會多一個花姐而感到害怕，但相處過後，姜濤坦言有所得着。
景黛音和姜濤日前在九龍灣接受訪問，姜濤直言今次比想像中輕鬆：「其實啱啱接呢套劇嘅時候，係比賽嘅中途，嗰陣喺度諗，又有一樣嘢令我分心，覺得呢樣嘢似乎幫唔到我去比賽。點知最後呢套戲竟然係令我減壓。」他還說：「初初都擔心戲內同戲外都會有一個花姐，點知一埋位發現劇組嘅人個個都好隨和，大家都好專注去拍劇，同我想像中係好大分別！」景黛音亦笑說：「初初同金生（ViuTV製作部副總裁金廣誠）講，今次要搵啲我唔識嘅人合作，大家都係由零開始，對大家嚟講都係最好最舒服，千祈唔好話以前係點樣，我哋大家都係新人嚟㗎！」
笑問初出茅廬的感覺，景黛音說：「我冇乜特別感覺喎，好OK呀，佢哋個個都好nice，係好開心嘅一件事，我一直都對住好多年輕人，我個女今年都18歲，所以我都當自己係18歲，唯一係唔習慣天氣太熱！」見到姜濤在旁「陰陰嘴」笑，景黛音即說：「做人要保持心境輕鬆嘛，你唔係笑我呀？」正如景黛音所講，大家都以新人的關係相處，所以說起話來，當然不需要有太多繁文縟節，很自然道出對對方的感覺，她說：「其實出嚟做嘢，你點對人，人哋自然會點對你，我一直對人都係抱住真誠嘅態度，所以真係唔適合喺娛樂圈。」她望着姜濤說：「但係你唔同，你仲後生，要做好自己應該做嘅事，好好享受每一刻，要珍惜機會。」
姜濤亦表示：「我都試過同佢講，唔係好識同參賽者相處，不過佢就話叫我唔使理人，只要唔係做虧心事，做番自己咪得，人哋唔鍾意你，係佢嘅事。」景黛音再說：「因為我覺得做人一定有人鍾意同有人唔鍾意，冇可能係全世界都鍾意，就算你幾完美，都一定有人睇你唔順眼，所以何必去計較呢啲嘢？只要過得自己，又唔係做傷天害理嘅事，開心咪得，每個人都有權去揀鍾意定唔鍾意，呢個係佢嘅選擇，我咪自己選擇過自己快樂嘅人生。」
《退休女皇》已經正式播出，問到兩人會否有期望時，姜濤表示當然希望知道觀眾對他首次拍劇的評價，但景黛音坦言：「冇喎，一定有人話好，亦都有人話唔好，所以根本唔需要睇，只要自己盡咗力，做好自己就得，唔使太介意，始終有好多嘢唔係一個人可以控制，而且我發覺而家啲人睇嘢好奇怪，專係睇人哋唔好嘅嘢，唔識得用欣賞角度去睇，所以如果唔鍾意睇咪熄機，唔好睇囉，唔使講咁多！」至於會否再拍劇，景黛音說：「冇諗過，不過我自己反而鍾意試新嘢！」
採訪：何慧斯
服裝提供：BEAMS@I.T（姜濤）
-----------------------------
你撐蘋果 我捐$1
支援反送中抗爭者
