Mahnı, musiqi qədər, incəsənət, mədəniyyət qədər insanları bir-birinə heç nə bağlamır. İncəsənətin, mədəniyyətin, xüsusən də, mahnının, musiqinin oynadığı rolu heç bir vasitə oynaya bilməz.

HEYDƏR ƏLİYEV

1309

Azərbaycanlı tenor Yusif Eyvazov “Don Karlos” operasında baş rolda çıxış edəcək

1309

18.01.2018

18.01.2018 09:07

Martın 1-dən 4-dək Rusiya Dövlət Akademik Böyük Teatrında Cüzeppe Verdinin “Don Karlos” operası nümayiş etdiriləcək.

Səhnə əsərində Don Karlos obrazını martın 2-də və 4-də Azərbaycanın Əməkdar Artisti Yusif Eyvazov (tenor) canlandıracaq.

Karyerasına İtaliyanın teatr və konsert zallarında başlayan Y.Eyvazov 2008-ci ildə Milanda Opera Müğənniləri Beynəlxalq Müsabiqəsinin Qran-Pri mükafatına layiq görülüb. O, 2012-ci ildə Bakıda Vokalçıların Bülbül adına VI Beynəlxalq müsabiqəsinin qalibi olub. Y.Eyvazovun adı “Dünyanın ən yaxşı tenorları” kitabına daxil edilib.

XƏBƏRLƏR

27.05.2021 12:37

Mədəniyyət Nazirliyi ilə Mədəniyyət İşçiləri Həmkarlar İttifaqı Respublika Komitəsi arasında sahə sazişi imzalanıbAzərbaycan Respublikasının Mədəniyyət Nazirliyi və Mədəniyyət İşçiləri Həmkarlar İttifaqı Respublika Komitəsi arasında 2021-2023-cü illər üzrə (üç illik müddətə) sahə sazişi imzalanıb. ..

27.05.2021 11:54

"Səhnədən səngərə" layihəsi çərçivəsində təqdim olunur: Şəhid Əliağa Məmmədov Azərbaycan Respublikasının Mədəniyyət Nazirliyi “Səhnədən səngərə“ layihəsinin ikinci buraxılışını təqdim edir. Layihə çərçivəsində hazırlanan növbəti videoçarx 44 günlük Vətən müharibəsi müddətində gedən qızğın döyüşlər zamanı savaş yoldaşlarının həyatını qurtarmaq üçün özünü sipər edərək, qəhrəmancasına şəhidlik zirvəsinə ucalan igidimiz Əliağa Məmmədovun əziz xatirəsinə həsr olunur. Videoçarxda 19 yaşında əbədi işığa doğru yol alan Əliağa Məmmədovu dərin kədər, həmçinin böyük qürurla xatırlayan valideynləri, iş yoldaşları qəhrəmanımızın ən böyük arzusundan, teatra olan sonsuz sevgisindən, şücaətindən söz açıblar. ..

26.05.2021 16:18

Üzeyir Hacıbəyli adına Bakı Musiqi Akademiyasının 100 illik yubileyinin keçirilməsi haqqında Azərbaycan Respublikası Prezidentinin Sərəncamı2021-ci ildə Üzeyir Hacıbəyli adına Bakı Musiqi Akademiyasının yaradılmasının 100 illiyi tamam olur. Bakı Musiqi Akademiyası müsəlman Şərqinin yeni tipli ali musiqi təhsili ocağı kimi dahi bəstəkar Üzeyir Hacıbəylinin təşəbbüsü ilə fəaliyyətə başlamışdır. Hələ ilk illərdən tədris prosesində Şərq musiqisinin çoxəsrlik ənənələrini və Avropa musiqi təhsilinin qabaqcıl təcrübəsini vahid məcrada birləşdirən, peşəkar musiqiçi kadrların hazırlanmasına və klassik musiqi irsimizin sistemli öyrənilməsinə xüsusi diqqət göstərən Akademiya ötən müddət ərzində nailiyyətlərlə zəngin böyük bir inkişaf yolu keçmiş, üzərinə düşən vəzifələrin öhdəsindən həmişə layiqincə gəlmişdir. Azərbaycan mədəniyyəti tarixinə parlaq səhifələr yazan, musiqi sənətimizi ölkəmizin hüdudlarından xeyli uzaqlarda da uğurla təmsil edən və yaradıcılığı Azərbaycan musiqisinin qızıl fonduna daxil olan görkəmli sənətkarların, tanınmış ifaçıların bir neçə nəsli məhz Bakı Musiqi Akademiyasının məzunlarıdır. Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq, Azərbaycan musiqi mədəniyyətinin inkişafında və professional musiqiçi kadrların yetişməsində mühüm rol oynamış Üzeyir Hacıbəyli adına Bakı Musiqi Akademiyasının 100 illik yubileyinin qeyd olunmasını təmin etmək məqsədilə qərara alıram: 1. Azərbaycan Respublikasının Təhsil Nazirliyi Azərbaycan Respublikasının Mədəniyyət Nazirliyi ilə birlikdə Üzeyir Hacıbəyli adına Bakı Musiqi Akademiyasının 100 illik yubileyinə dair tədbirlər planı hazırlayıb həyata keçirsin. 2. Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin. İlham Əliyev Azərbaycan Respublikasının Prezidenti Bakı şəhəri, 26 may 2021-ci il ..

26.05.2021 15:59

Mədəniyyət naziri İslam Əməkdaşlığı Gənclər Forumunun nümayəndə heyətini qəbul edib Azərbaycan Respublikasının mədəniyyət naziri Anar Kərimov mayın 25-də İslam Əməkdaşlıq Təşkilatına (İƏT) bağlı beynəlxalq qurum – İslam Əməkdaşlığı Gənclər Forumunun (İƏGF) rəhbəri Taha Ayhanın başçılıq etdiyi nümayəndə heyəti ilə görüşüb. Nümayəndə heyətinin tərkibinə İƏGF-ın baş direktoru Rəsul Ömərov, təşkilatın Avrasiya üzrə Regional Mərkəzinin baş direktoru Elməddin Mehdiyev və başqaları daxildir. Nümayəndə heyətini salamlayan Anar Kərimov İslam Əməkdaşlıq Təşkilatı ilə Azərbaycan Respublikası arasında sıx əlaqələrin qurulduğunu, bunun İslam həmrəyliyinin təbliğinə və möhkəmləndirilməsinə də zəmin yaratdığını məmnunluqla qeyd edib. Müsəlman ölkələrinin gəncləri üçün mədəni inkişafın əhəmiyyətindən söz açan nazir bu məqsədlə birgə fəaliyyətin, İƏT ölkələri gənclərinin əməkdaşlığına yönəlmiş layihələrin vacibliyini vurğulayıb. Səmimi qəbula görə təşəkkürünü bildirən İƏGF rəhbəri Taha Ayhan gənclərdən ibarət geniş hədəf kütləsinə xitab edən təşkilatın fəaliyyəti barədə məlumat verib, Azərbaycanın Mədəniyyət Nazirliyi ilə yaxından əməkdaşlıq etmək niyyətini diqqətə çatdırıb. O, Vətən müharibəsində Azərbaycanın əldə etdiyi tarixi Qələbəyə həsr olunan layihələrin, Qarabağ Zəfərinin gənclərin gözü ilə tanıdılması, Qarabağın mədəni irsi, mənəvi dəyərlərinin təbliği ilə bağlı sərgi və digər tədbirlərin, mədəniyyət festivalının keçirilməsi barədə təkliflərini səsləndirib. Azərbaycanın tarixi Qələbəsinə, Qarabağın zəngin mədəni irsinin təbliğinə həsr olunan layihələrə dair fikirləri dəstəkləyən nazir Anar Kərimov gənclər arasında mübadilənin əhəmiyyətini qeyd edib. Prezident İlham Əliyevin sərəncamı ilə Şuşa şəhərinin Azərbaycan mədəniyyətinin paytaxtı elan edilməsindən bəhs edən nazir bu ilin yanvar ayında İCESCO rəhbərinin ölkəmizə səfəri zamanı Şuşanın “İslam mədəniyyətinin paytaxtı” elan edilməsi ilə bağlı təşəbbüslə çıxış etdiyini də diqqətə çatdırıb. Eyni zamanda TÜRKSOY təşkilatının Şuşanın 2023-cü ildə “Türk dünyasının mədəniyyət paytaxtı” elan edilməsi barədə təklifindən danışan Anar Kərimov bunun Türk-İslam dünyasının Azərbaycanın qədim şəhərinin mədəni zənginliyinə diqqətinin göstəricisi olduğunu deyib. Azərbaycan torpaqlarının Ermənistanın işğalı altında olduğu otuz ilə yaxın müddətdə mədəni və təbii irsimizin vandalizmə məruz qaldığını və məqsədyönlü şəkildə dağıdıldığını deyən Anar Kərimov əlavə edib ki, bu siyasət, həmçinin bir əsrdən artıq dövrdə Ermənistan ərazisindəki, o cümlədən qədim Azərbaycan şəhəri olan İrəvandakı tarixi abidələrimizə, Türk-İslam mədəni irsinə qarşı həyata keçirilib. Nazir bu həqiqətlərin dünya ictimaiyyətinə, ələlxüsus İslam ölkələrinin gənclərinə çatdırılmasında təşkilatın vacib rol oynaya biləcəyini qeyd edib. Söhbət zamanı gənclərlə işin əhəmiyyətini xüsusi vurğulayan Anar Kərimov Mədəniyyət Nazirliyi sistemində həyata keçirilən islahatlara toxunub, Azərbaycanın mədəni irsinin qorunması, saxlanılması, mədəniyyətimizin dünyada təbliği, gənclərə milli-mənəvi dəyərlərin aşılanması və gənc nəslin milli ruhda tərbiyəsi işində nazirliyin fəaliyyəti üçün əsas platforma rolunu oynayacaq “Davranış Mədəniyyəti Konsepsiyası” və bu istiqamətdə görülən digər işlər barədə məlumat verib. İslam Əməkdaşlıq Təşkilatı Gənclər Forumu ilə birgə əməkdaşlıq çərçivəsində sadalanan mövzulara dair fəaliyyətin səmərəli nəticələr verəcəyindən əminlik ifadə edilib. Görüşdə Azərbaycanda 2021-ci ilin “Nizami Gəncəvi İli” və Türkiyədə “Bizim Yunus İli” elan edilməsi ilə əlaqədar qardaş ölkə ilə ortaq mənəvi sərvətimiz hər iki mütəfəkkirin irsinin İslam dünyasında və xüsusilə gənclər arasında daha geniş təbliğinə istiqamətlənən tədbirlərin təşkilinin əhəmiyyəti qeyd edilib. Birgə dəyərləri təbliğ etmək, qarşılıqlı əlaqələri gücləndirmək üçün səylərini bundan sonra da davam etdirəcəklərini bildirən İƏGF rəhbəri İslam həmrəyliyinə, gənclərin mədəni inkişafına, mənəvi zənginliyinə istiqamətlənən layihələrin reallaşdırılmasına təşkilat tərəfindən məmnuniyyətlə dəstək göstəriləcəyini bildirib. Görüş qarşılıqlı maraq doğuran məsələlər ətrafında fikir mübadiləsi ilə davam edib. ..

25.05.2021 16:58

“Nizamidən Yunusa: bir olmaq” mövzusunda videokonfrans keçirildiMəlum olduğu kimi, 2021-ci il Türk dünyasının bir neçə dahi şair və mütəfəkkirlərinin əlamətdar ildönümləri yadda qalacaq. Bu ilə dünya poeziyasının günəşi hesab edilən Nizami Gəncəvinin anadan olmasının 880 illiyi münasibətilə Prezident İlham Əliyevin sərəncamı ilə ölkəmizdə “Nizami Gəncəvi İli” elan olunub. Eyni zamanda Türkiyə Prezidenti Rəcəb Tayyib Ərdoğanın imzaladığı sənədə əsasən, Yunus Əmrənin vəfatının 700 illiyi münasibətilə qardaş ölkədə “Bizim Yunus İli” və türkcənin dünya dili kimi təbliğ edilməsi ili elan edilib. Hər iki əlamətdar mədəni hadisə münasibətilə müxtəlif ölkələrdə çeşidli tədbirlər keçirilir. Belə tədbirlərdən biri də mayın 25-də Bakı Yunus Əmrə İnstitutunun təşkilatçılığı ilə gerçəkləşdi. “Nizamidən Yunusa: bir olmaq” mövzusunda keçirilən videokonfransda Azərbaycan Respublikasının mədəniyyət naziri Anar Kərimov, Türkiyə Respublikasının mədəniyyət və turizm naziri Mehmet Nuri Ersoy və iki ölkənin tanınmış elm adamları iştirak edirdi. Konfransı açıq elan edən Bakı Yunus Əmrə İnstitutunun rəhbəri Selçuk Karakılıç bildirdi ki, bu il mayın 7-də Bakıdakı Beynəlxalq Muğam Mərkəzində “Nizamidən Yunusa. Birlik ilə baxmaq” adlı tamaşa təqdim edilib. Bugünkü konfransda bu iki dahinin bəşəri ideyaları yenidən diqqət mərkəzinə çəkiləcək. Yunus Əmrə İnstitutunun (Türkiyə) rəhbəri, professor Şərəf Atəş çıxış edərək konfransı ortaq mədəni mirasımız olan şairlərimizin təbliği baxımından əlamətdar hadisə kimi dəyərləndirdi: “İnsanlığı sevmək, bəşəri ideyaları təbliğ etmək türk coğrafiyası alimləri üçün, mütəfəkkirlərinin hər zaman ilkin mövzusu olmuşdur. Azərbaycan adının özündə belə can sözü keçir və dolayısı ilə bu bizim dünyaya anlada biləcəyimiz önəmli bir dəyərdir. Yunus Əmrə və Nizami Gəncəvi bənzərsiz əsərləri və ideyaları ilə yaşadıqları dövrü adlayaraq böyük şair olduqlarını bir daha sübut ediblər. Nizami “Xəmsə”si ilə dünya ədəbiyyatına yeni bir səs gətirən şairdir. Hər iki mütəfəkkir bizim ortaq mirasımızdır”. “Yunus Əmrə Nizaminin mənəvi varisidir...” Konfransda çıxış edən Azərbaycanın mədəniyyət naziri Anar Kərimov iştirakçıları salamlayaraq mötəbər bir konfransın təşkilinə görə Bakı Yunus Əmrə İnstitutuna təşəkkürünü bildirdi. Türk xalqlarının mədəni birliyi və siyasi həmrəyliyi ideyasının böyük tərəfdarı, Azərbaycan xalqının ümummilli lideri Heydər Əliyevin “Biz bir millət, iki dövlətik” fikirlərini xatırladan nazir dedi ki, Nizami Gəncəvi və Yunis Əmrə kimi dahi söz-sənət adamlarının həyat və fəaliyyəti təsdiq edir ki, bu birlik təkcə siyasi, hərbi, iqtisadi deyil, mədəni sahədə də çoxəsrlik tarixə malikdir: “Xalqlarımız kimi şairlərimiz, şeirimiz, ümumən mədəniyyətlərimizin də taleyi bir-biri ilə qırılmaz tellərlə bağlıdır və çağımızda bu bağlılıq uğurlu gələcəyimizin əsasında dayanır. Nizami Gəncəvi və Yunis Əmrə yaradıcılığı təkcə ədəbi-bədii fakt olmayıb, həm də milli şüurun formalaşmasında bəlli bir mərhələnin göstəricisidir. Osmanlı dövləti Səlcuqlu dövlətinin varisi olduğu kimi, Yunus Əmrə də, əslində, Nizaminin mənəvi varisi idi”. Nazir qeyd etdi ki, milli müəyyənliyin əsas göstəricilərindən biri dildir. Nizami dövrün ənənəsinə uyğun olaraq öz hikmətlər xəzinəsi olan “Xəmsə” və lirik şeirlərini fars dilində, Azərbaycan şairindən bir qədər sonra yaşamış Yunus Əmrə isə türk dilində yazsa da, türkçülük ruhu onların hər ikisinin bədii düşüncəsindən qızıl xətlə keçir: “Nizaminin tanınmış tədqiqatçılarından Yevgeni Bertelsin dili ilə desək, o, türkcə düşünüb, farsca yazırdı və məhz bu daxili dil amili onu türkcə yazıb-yaradan Yunus Əmrə ilə analoji düşüncə məkanına gətirirdi”. Nizami Gəncəvi və Yunus Əmrənin timsalında Azərbaycan-Türkiyə qardaşlığını önə çəkən Anar Kərimov bu ilin mart ayında Türkiyəyə rəsmi səfərində də bu qardaşlığın bir daha şahidi olduqlarını diqqətə çatdırdı: “Hörmətli mədəniyyət və turizm nazirinə qonaqpərvərliyə görə bir daha təşəkkürümü bildirirəm. İnanıram ki, bu konfrans, eləcə də bəlli istiqamətdə ilin sonuna qədər həyata keçiriləcək layihələr xalqlarımızın tarixi-mədəni birliyinin təsdiqi və möhtəşəm nümayişinə çevriləcək. Diqqətinizə görə hər birinizə minnətdarlığımı bildirir, konfransın işinə uğurlar diləyirəm”. “Nizami insanların könül memarıdır” Türkiyə Cümhuriyyətinin mədəniyyət və turizm naziri Mehmet Nuri Ersoy Türk dünyası ədəbiyyatının dəyərli təmsilçilərinə həsr edilən konfransa qatıldığına görə məmnunluğunu ifadə etdi. Dedi ki, bu əlamətdar il bizi bizə anlatmaq üçün bir fürsət yaradıb. Bu konfrans həmin fürsəti dəyərləndirmək üçün atılan addımlardan biridir: “Bu gün geriyə baxsaq, türk dövlətlərinin idarəsi altında olan torpaqların genişliyi qədər mədəniyyətimizin izinin genişliyini də görə bilərik. Çünki biz millət olaraq hər zaman əxlaq, ədalət və firavanlıq kimi ənənələrimizi yaşatmışıq. Bizə elmi ilə, sənəti ilə bunun qapısını açanlar isə heç bir zaman unudulmayacaq qədər dərin fəlsəfi anlama malik mütəfəkkirlərdir. Onları yaşatmaq, təbliğ etmək və gələcək nəsillərə çatdırmaq məsuliyyətini hər birimiz vətəndaş olaraq daşıyırıq. Nizami insanların qəlbinə yol tapmış bir könül memarıdır. Bu gün, təəssüf ki, dünyanın hər yerində insanların qəlbinə kölgə salmaqda olan bir qaranlıq var. Nifrətdən, kindən bəslənən bir qaranlıq. Yunusda və Nizamidə əks etdirilən mədəniyyətimiz bu xəstəliyə daha əsrlər öncə qalib gələ bildi. Bizim ümumbəşəri hisslər aşılayan və sülhə səsləyən mədəniyyətimiz var. Sonda isə Azərbaycanın Mədəniyyət Nazirliyinə konfransa dəstəklərinə görə təşəkkürümü bildirirəm”. *** Azərbaycan Yazıçılar Birliyinin sədri, Xalq yazıçısı Anar çıxışında dedi ki, Nizami və Yunus Əmrəyə həsr edilən illərin iki xalq olaraq bir arada qeyd edilməsi əlamətdar tarixdir. AMEA-nın vitse-prezidenti İsa Həbibbəyli Yunus Əmrə və Nizamini Türk dünyasının ortaq fəxrləri adlandırdı. Vurğuladı ki, Avropa Balzak, Şekspir, Homerlə fəxr etdiyi kimi, Türk dünyası da Nizami və Yunus Əmrə ilə fəxr edir. Türkiyəli ədəbiyyatşünas Mustafa Özçelik bildirdi ki, hər iki şairin ədəbi irsi insanları cəhalətdən elmə çağırır. Videokonfransın sonunda Bakı Yunus Əmrə İnstitutunun rəhbəri Selçuk Karakılıç iştirakçılara öz təşəkkürünü bildirdi. ..

24.05.2021 15:40

Mədəniyyət Nazirliyinin nümayəndə heyəti Rusiyaya səfər edib Azərbaycan Mədəniyyət Nazirliyinin nümayəndə heyəti Rusiya Federasiyasına səfər edib. Nümayəndə heyətinə nazirliyin İncəsənət şöbəsinin müdiri Fərəh Acalova, Kinematoqrafiya şöbəsinin müdiri Rüfət Həsənov və Bakı Xoreoqrafiya Akademiyasının tədris işləri üzrə prorektoru, rektor vəzifəsini müvəqqəti icra edən Əziz Qarayusifli daxildir. Səfərin məqsədi mədəniyyət, incəsənət təhsili və digər sənət sahələrində Rusiya təcrübəsini öyrənməkdən ibarətdir. Səfər çərçivəsində Moskvada nazirliyin nümayəndə heyəti ilə Rusiyada yaşayan azərbaycanlı mədəniyyət və incəsənət xadimləri arasında görüş keçirilib. Qonaqlar görüşün əvvəlində dünya şöhrətli Azərbaycan rəssamı, SSRİ Xalq rəssamı Tahir Salahovun xatirəsini bir dəqiqəlik sükutla yad ediblər. Sonra Heydər Əliyev Fondunun Rusiya Federasiyasındakı nümayəndəliyinin Humanitar proqramlar şöbəsinin rəhbəri, fəlsəfə elmləri doktoru Tamilla Əhmədova qonaqları salamlayaraq Rusiya və Azərbaycan arasında mədəni əlaqələrin davamlı şəkildə inkişaf etdiyini vurğulayıb. Azərbaycanın Rusiyadakı Səfirliyinin mədəniyyət məsələləri üzrə attaşesi Nigar Axundova bildirib ki, Mədəniyyət Nazirliyinin nümayəndə heyəti mədəniyyət, incəsənət təhsili və digər sənət sahələrində Rusiya təcrübəsini öyrənmək üçün Moskvaya səfər edib: “Bu həftədən etibarən bir sıra görüşlər keçiriləcək. İlk görüşümüzə Moskvada yaşayan və mədəniyyət, incəsənət sahəsində çalışan həmvətənlərimizlə başladıq. Bundan əlavə Rusiya Mədəniyyət Nazirliyinin müvafiq şöbələri, o cümlədən “Roskino”, “Roskonsert”, Moskva Dövlət Filarmoniyası, incəsənət qalereyaları, Ümumrusiya Dövlət Kinematoqrafiya İnstitutu, Rusiya Teatr Sənəti İnstitutu (GİTİS), Moskva Dövlət Xoreoqrafiya Akademiyası və digər mədəniyyət qurumları ilə görüşlər planlaşdırılır”. N.Axundova artıq Azərbaycan nümayəndə heyətinin GİTİS-in rektoru ilə ilk görüşünün keçirildiyini qeyd edib: “Olduqca maraqlı və səmərəli görüş keçirildi. Ümid edirəm ki, gələcəkdə də bu cür səfərlər daha çox olacaq. Bizi maraqlı layihələr gözləyir”. Bakı Xoreoqrafiya Akademiyasının prorektoru Əziz Qarayusifli çıxış edərək üç gün ərzində Moskvadakı aparıcı sənət akademiyaları, xüsusən də Moskva Dövlət Xoreoqrafiya Akademiyası, Qnesinlər adına Rusiya Musiqi Akademiyasının rektorları ilə görüşəcəyini vurğulayıb: “Həm Rusiya, həm də Avropa universitetləri ilə müqavilələr imzalamışıq. Əməkdaşlığı intensivləşdirməliyik. Rus balet məktəbi dünyanın aparıcı məktəblərindən biridir və əməkdaşlığımızı genişləndirmək istəyirik. Bunun üçün Moskva universitetləri və akademiyalarının aparıcı müəllimləri tərəfindən ustad dərsləri təşkil etmək lazımdır. Müəllim heyətinin mübadiləsini aparmaq zəruridir. Xoreoqrafiyamızın inkişaf səviyyəsini yüksəltmək üçün təkcə ustad dərsləri ilə kifayətlənməməliyik, həm də qabaqcıl rusiyalı müəllimləri Azərbaycana uzunmüddətli işə dəvət etmək istəyirik”. Ə.Qarayusifli bu cür əməkdaşlığın hər iki tərəf üçün faydalı olacağını bildirib: “Sovet sənət məktəbindən qalan ənənələr də daxil olmaqla, Rusiya ilə ortaq cəhətlərimiz var. Bundan istifadə etməliyik. Düşünürəm ki, birlikdə bir çox faydalı layihələri reallaşdıra bilərik”. Görüş iştirakçılarından Azərbaycanın Xalq artisti, Böyük Teatrın solisti Dinara Əliyeva çıxış edərək Mədəniyyət Nazirliyinin nümayəndə heyətinin səfərinin əhəmiyyətini yüksək qiymətləndirib. “Mədəniyyət xadimlərinin bir araya gəlməsi hər zaman gözəl hadisədir. Bu gün bizi birləşdirən rəhbərliyimizə təşəkkürümü bildirirəm, hər zaman belə tədbirlərdə iştirak etməyə şadam”, - deyə Xalq artisti bildirib. İyirmi ildən çoxdur Moskvada çalışan keramika sənətçisi Qərənfil Qurbanova isə bildirib ki, saxsı emalatxanasında qablar, plitələr, gil vazalar Azərbaycan mədəniyyətinin motivləri əsasında hazırlanır: “İndi bir çox istedadlı gənclərimiz, fəal insanlarımız Rusiya və Azərbaycanın mədəniyyət sahəsində əməkdaşlığını gücləndirmək üçün çalışmağa hazırdır”. ..

24.05.2021 14:08

“Art Management” vebinarlarına start verilirAzərbaycan Dövlət Rəsm Qalereyasının təşkilatçılığı ilə 25 may tarixində saat 20:00-da “Art Management” vebinarlarına start verilir. Layihə rəssamların yaradıcılıq potensialından səmərəli istifadə etmək, onların “art management” (sənət idarəçiliyi) istiqamətləri üzrə hazırlıq səviyyəsini yüksəltmək, mövcud çatışmazlıqları vaxtında aşkar edərək tədbirlər görmək, proseslərin inkişafı üçün yeni bilgi və təcrübə mübadiləsi platformasını yaratmaq məqsədilə reallaşdırılır. Qeyd etmək lazımdır ki, yaradıcılıq sənayesi (“Creative industry”) bütün dünyada inkişaf edir, yeni özünürealizə və məhsul təqdim etmə imkanları yaradır. Bu baxımdan ölkəmizdə əksər rəssamların “art management”in müasir satış bazarında rolundan istifadə etmələri, ənənəvi və rəqəmsal platformalarda özlərini təqdim etmə, bilik, bacarıqları və kuratorluq sahəsində sənətşünasların fəaliyyətinin yüksəldilməsi labüd sayılır. “Art Management” vebinarlarının mühazirəçi qismində sahə üzrə mütəxəssislər və təcrübəli şəxslərin iştirakı ilə keçirilməsi nəzərdə tutulur. Treninqlər “Zoom” tətbiqi vasitəsilə keçiriləcək. Silsilə təlimlərə qoşulmaq istəyənlər Azərbaycan Dövlət Rəsm Qalereyasının rəsmi saytı (www.azgallery.az), “Facebook” və “İnstagram” sosial media hesablarını izləyə bilərlər. ..

24.05.2021 10:14

Tahir Teymur oğlu SalahovAzərbaycan mədəniyyətinə ağır itki üz vermişdir. Azərbaycan təsviri sənətinin görkəmli nümayəndəsi, dünya şöhrətli rəssam, SSRİ və Azərbaycan Respublikasının Xalq rəssamı, Rusiya Rəssamlıq Akademiyasının vitse-prezidenti, Sosialist Əməyi Qəhrəmanı, SSRİ və Azərbaycan Respublikasının Dövlət mükafatları laureatı, Heydər Əliyev Mükafatı laureatı, Azərbaycan Respublikası Prezidentinin fərdi təqaüdçüsü Tahir Teymur oğlu Salahov 2021-ci il mayın 21-də ömrünün 93-cü ilində vəfat etmişdir. Tahir Salahov 1928-ci il noyabrın 29-da Bakı şəhərində anadan olmuşdur. Orta məktəbi bitirdikdən sonra o, 1945–1950-ci illərdə Əzim Əzimzadə adına Azərbaycan Rəssamlıq Məktəbində, 1951–1957-ci illərdə V.İ.Surikov adına Moskva Dövlət Rəssamlıq İnstitutunda təhsil almışdır. Tahir Salahov 1963–1974-cü illərdə Azərbaycan Dövlət İncəsənət İnstitutunda, 1975-ci ildən isə V.İ. Surikov adına Moskva Dövlət Rəssamlıq İnstitutunda pedaqoji fəaliyyət göstərmiş və 1984–1992-ci illərdə həmin institutda kafedra müdiri vəzifəsində çalışmışdır. Tahir Salahov 1979–1983-cü illərdə UNESCO yanında Plastik Sənətlər Assosiasiyasının vitse-prezidenti, 1983-cü ildən fəxri prezidenti olmuş, 1992-ci ildə Rəssamların Beynəlxalq Federasiyasının vitse-prezidenti seçilmişdir. O, bir sıra ölkələrin mötəbər yaradıcılıq qurumlarının fəxri üzvü olmuşdur. Tahir Salahov zəngin yaradıcılığında milli ənənələrlə dünya incəsənətinin ən mütərəqqi dəyərlərinin ahəngdar vəhdətinə nail olmuş və Azərbaycan mədəniyyəti salnaməsinə yeni parlaq səhifələr yazmışdır. Ötən əsrin 60-cı illərinin əvvəllərində Azərbaycanda özünəməxsus milli rəngkarlıq məktəbinin formalaşmasında Tahir Salahovun müstəsna xidmətləri vardır. “Sərt üslub” adlandırılan istiqamətin liderlərindən biri olan, daim yenilik hissi ilə yaşayan novator sənətkarın qrafik lövhələrində, mənzərə və natürmortlarında yaradıcı əməyin romantikası, mənəvi gözəllik, eləcə də yüksək amallı insanın daxili aləmi rənglərin incə çalarları ilə lakonik ifadəsini tapmışdır. Rəssam tariximizin və mədəniyyətimizin unudulmaz şəxsiyyətlərinin portretlərinin geniş qalereyasını yaratmış, bununla Azərbaycan boyakarlığının kamil nümunələrini meydana gətirmişdir. Sənətkarın mövzu və janr əlvanlığı, bədii forma rəngarəngliyi və estetik kamilliyi ilə səciyyələnən, ali məqsədlər naminə humanist fikirlər təlqin edən, hər birində Vətən torpağına sonsuz məhəbbət duyulan ecazkar tabloları mədəni irsimizin qızıl fondunda özünə həmişəlik layiqli yer tutmuşdur. Tahir Salahov eyni zamanda teatr-dekorasiya sənəti sahəsində uğurlu fəaliyyət göstərmiş, məharətli teatr rəssamı kimi səhnə əsərlərinə yaddaqalan orijinal bədii tərtibatlar vermişdir. Tahir Salahovun dünyanın mötəbər muzeylərini, məşhur qalereyalarını bəzəyən və şəxsi kolleksiyalarda saxlanılan əsərlərinin, habelə hər biri hadisəyə çevrilən fərdi sərgilərinin Azərbaycan mədəniyyətinin ölkə hüdudlarından uzaqlarda təbliğində xüsusi əhəmiyyəti olmuşdur. Pedaqoq kimi biliyini, təcrübə və bacarığını gənc fırça ustalarının yetişdirilməsi işinə sərf etmiş Tahir Salahovun misilsiz yaradıcılıq təcrübəsi neçə-neçə yeni rəssamlar nəsli üçün bundan sonra da məktəb rolunu oynayacaqdır. Tahir Salahov, həmçinin ictimai xadim kimi tanınmış, SSRİ Ali Sovetinin və Azərbaycan Respublikası Ali Sovetinin bir neçə çağırış deputatı seçilmiş və ölkənin ictimai-siyasi həyatında yaxından iştirak edərək, mədəniyyət siyasətinin həyata keçirilməsinə töhfələr vermişdir. Çoxsaylı beynəlxalq mükafatlara layiq görülən Tahir Salahovun uzunmüddətli səmərəli yaradıcılığı və məhsuldar ictimai fəaliyyəti hər zaman diqqət mərkəzində olmuş və yüksək qiymətləndirilmişdir. Müstəqil respublikamızın ali mükafatlarından olan “Heydər Əliyev”, “İstiqlal” və 1-ci dərəcəli “Əmək” ordenləri ilə təltif edilməsi doğma Vətənində onun sənətinə və şəxsiyyətinə dərin ehtiramın təzahürüdür. Görkəmli sənətkar, böyük ictimai xadim, əsl ziyalı və səmimi insan Tahir Teymur oğlu Salahovun işıqlı xatirəsi onu tanıyanların qəlbində daim yaşayacaqdır. Allah rəhmət eləsin! İlham Əliyev Mehriban Əliyeva Əli Əsədov Sahibə Qafarova Samir Nuriyev Eldar Əzizov Fərəh Əliyeva Anar Kərimov Fərhad Xəlilov Ömər Eldarov Salxab Məmmədov Ağəli İbrahimov Fuad Salayev. ..

21.05.2021 18:15

Ümumdünya Dialoq və İnkişaf Naminə Mədəni Müxtəliflik Günü münasibətilə beynəlxalq vebinar keçirilib21 may – Ümumdünya Dialoq və İnkişaf Naminə Mədəni Müxtəliflik Günü münasibətilə “Sülh və inkişaf: Müxtəliflik niyə vacibdir” mövzusunda beynəlxalq vebinar keçirilib. “Sülh Əlaqələndiriciləri” (Connectors for Peace) təşkilatının təsisçisi və baş icraçı direktoru Jan Kristof Basın moderatorluğu ilə baş tutan tədbirdə BMT tərəfindən təsis edilmiş bu beynəlxalq gün haqqında məlumat verilərək, onun getdikcə artan aktuallığı nəzərə çatdırılıb. Mədəni müxtəlifliyin dünyada təşviqi istiqamətində birgə səylərin vacibliyindən danışan moderator açılış nitqi ilə çıxış etmək üçün sözü UNESCO-nun Mədəni özünüifadə müxtəlifliyinin qorunması və təşviqi üzrə 2005-ci il Konvensiyasının katibi Tüssan Tiendrebeoqoya verib. Mədəni müxtəlifliyin qorunması və təşviqi istiqamətdə mövcud olan qlobal çağırışlardan bəhs edən T.Tiendrebeoqo bu çağırışlara cavab vermək üçün Konvensiyanın universal alət olduğunu bildirirək bu çərçivədə üzv ölkələrin birgə səylərindən söhbət açıb. Panelçilər arasında ilk çıxış edən Azərbaycanın Respublikasının mədəniyyət naziri Anar Kərimov bu əlamətdar gün münasibətilə hər kəsi təbrik edərək müxtəlifliyin beynəlxalq ictimaiyyət üçün önəmindən danışıb. Şərq və Qərb arasında yerləşən Azərbaycanın tarixən müxtəlif mədəniyyətlərin və dinlərin mehriban birgəyaşayış məskəni olduğunu qeyd edən nazir, mədəni müxtəlifliyin, multikulturalizmin və dialoqun xalqımızın ənənəvi dəyərlərinə çevrildiyini bildirib. Azərbaycanda mövcud olan multikulturalizm dəyərlərinin dövlət siyasətində də öz əksini tapdığını qeyd edən Anar Kərimov, ölkəmizdə Bakı Beynəlxalq Multikulturalizm Mərkəzi kimi müxtəlif strukturların mövcud olduğunu, yerli qanunvericilikdə mədəni özünüifadə müxtəlifliyinin geniş təşviq edildiyini əyani misallarla diqqətə çatdırıb. Ölkəmizin təkcə milli səviyyədə deyil, beynəlxalq səviyyədə də multikulturalizm və mədəniyyətlərarası dialoqun aktiv təbliğatçısı olduğunu vurğulayan nazir Heydər Əliyev Fondu tərəfindən dünyanın müxtəlif bölgələrində yerləşən mədəni irs nümunələrinin təmiri və bərpası üçün görülən işlər barədə ətraflı danışıb. Çıxışda həmçinin, Azərbaycan Respublikasının Prezidenti tərəfindən 2008-ci ildə irəli sürülən mədəniyyətlərarası dialoqa dair “Bakı Prosesi” qlobal təşəbbüsü və bu çərçivədə dünyanın nüfuzlu beynəlxalq təşkilatları ilə birgə təşkil olunan Ümumdünya Mədəniyyətlərarası Dialoq Forumları, eləcə də Bakı Beynəlxalq Humanitar Forumları haqqında məlumat verilib. Mədəni müxtəlifliyin qorunması istiqamətində ölkəmizin beynəlxalq miqyasda fəal olduğunu bildirən Anar Kərimov onu da diqqətə çatdırıb ki, Azərbaycanın 30 ilə yaxın Ermənistanın işğalı altında qalmış ərazilərində mədəni irs planlı şəkildə məhv edilib və bu ərazilərin 2020-ci ildə Azərbaycan Ordusu tərəfindən azad olunmasına qədər mədəniyyətimizə qarşı təcavüz dayandırılmayıb. Mədəniyyətin sülhə dəstək verdiyi kimi, sülhün də mədəniyyətin inkişafı üçün əsas şərt olduğunu vurğulayan Anar Kərimov müharibələrin və vandalizmin mədəniyyəti hədəf seçdiyini, bütün dünyada bunun qarşını birdəfəlik almaq məqsədlə Mədəniyyət Nazirliyi tərəfindən “Mədəniyyət üçün sülh” (#Peace4Culture) qlobal çağırışının və çağırış çərçivəsində “Sülh üçün yarat” (#Create4Peace) kampaniyasının elan edildiyini bildirib. Beynəlxalq vebinarda daha sonra çıxış edən Çinin Kommunikasiyalar Universitetinin Paylaşılan Birgə Gələcək İcması İnstitutunun təmsilçisi Yanqi Janq, Avstraliyanın Mədəni İnfuziya və Müxtəliflik Atlasının təsisçisi Peter Musaferaidis, Almaniyanın Federal İqtisadi İnkişaf və Xarici Ticarət Assosiasiyasının baş icraçı direktoru Maykl Şuman tədbirin mövzusu üzrə müxtəlif aspektlərə toxunublar. Vebinarın sonunda sual-cavab formatında panel müzakirələri keçirilib. ..

21.05.2021 17:25

Müharibədən əziyyət çəkmiş sakinlər üçün mədəni proqramlar təşkil olunurÖlkəmizin Qələbəsi ilə başa çatan 44 günlük Vətən müharibəsindən sonra bütün istiqamətlərdə olduğu kimi, mədəniyyət sahəsində də bir sıra prioritet hədəflər müəyyən olunub. Aktual məsələlərdən biri də keçmiş təmas xəttində yaşayan əhalimizin mədəni-ictimai həyatının bərqərar olunması, mədəniyyət müəssisələrinin fəaliyyətinin effektiv təşkil edilməsidir. Vaxtilə təmas xəttinin mövcud olduğu ərazilərdə müharibə şəraitinin ağır şərtləri altında yaşamış vətəndaşlarımızın mədəni həyatına rəng qatmaq, həmin ərazilərdə əcdadlarımızdan yadigar qalan mədəni irs nümunələrini tanıtmaq və təbliğ etmək, gənclərin mədəni-ictimai fəallığını daha da artırmaq məqsədilə Füzuli rayonunda bir sıra tədbirlər təşkil olunub. Mədəniyyət Nazirliyinin Mədəniyyət üzrə Elmi-Metodiki və İxtisasartırma Mərkəzinin təşkilatçılığı, Kürdəmir Regional Mədəniyyət İdarəsi və Füzuli Rayon İcra Hakimiyyətinin dəstəyi ilə keçirilən tədbirlər proqramı “Nə? Harada? Nə zaman?” intellektual yarışması, “Bir abidə – bir könüllü” layihəsi, gənc mədəniyyət işçiləri ilə görüş, “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2019–2024-cü illər üçün Dövlət Proqramı”nın icrasına dair teatr tamaşasının nümayişini əhatə edib. Mədəniyyət tədbirləri çərçivəsində Füzuli Dövlət Dram Teatrında “Qanadlarıma sığal çək” adlı tamaşa hazırlanaraq onlayn təqdim olunub. Narkomaniyaya qarşı mübarizəyə dair sözügedən Dövlət proqramının icrası məqsədilə səhnələşdirilən tamaşada narkotik maddələrdən istifadə edən bir gənc psixoloqun faciəvi həyatından bəhs edilir. Lentə alınmış tamaşanın narkomaniyaya qarşı mübarizədə təbliğat materialı kimi sosial şəbəkələrdə yayımlanması nəzərdə tutulur. Füzuli rayonunda fəaliyyət göstərən müxtəlif dövlət və özəl təşkilatların mədəniyyət sahəsinə maraqlarının artırılması, gənclərin intellektual potensialının zənginləşdirilməsi, eyni zamanda faydalı biliklərin bölüşdürülməsi məqsədilə mədəniyyət mövzusuna həsr olunmuş “Nə? Harada? Nə zaman?” intellektual yarışması təşkil edilib. Müxtəlif qurumların əməkdaşlarından ibarət komandaların bilik yarışmasında Füzuli Rayon İcra Hakimiyyətinin “Zəfər”, Füzuli Müalicə-Diaqnostika Mərkəzinin “Təbib”, rayon Statistika İdarəsinin “Dəmir yumruq”, Təhsil Şöbəsinin “Xarıbülbül”, “Kapital Bank”ın Füzuli rayon filialının “Bir Bank”, 1 saylı Horadiz şəhər məktəbinin “Ərgünəş” komandaları mübarizə aparıblar. “Qarabağ şikəstəsi”nin sədaları altında başlanan yarışmada gərgin bilik mübarizəsi gedib. Nəticədə “Bir Bank” intellektual yarışın qalibi adını qazanıb. Qaliblərə müxtəlif hədiyyələr və diplomlar təqdim edilib. Digər iştirakçılara isə Elmi-Metodiki və İxtisasartırma Mərkəzi tərəfindən hədiyyələr verilib. Sonda “Xudayar təsnifi” səsləndirilib. Azərbaycanın zəngin mədəni irs nümunələrinin tanıdılması və təbliği məqsədilə gerçəkləşdirilən “Bir abidə - bir könüllü” layihəsi çərçivəsində müxtəlif türbə, məbəd, hamam və s. tikililər barədə maarifləndirici videoçarxların hazırlanması nəzərdə tutulur. Layihəyə öncə Füzuli rayonunda mövcud olan tarixi abidələrdən başlanılıb. Layihənin gələcəkdə işğaldan azad olunmuş ərazilərimizdə davam etdirilməsi planlaşdırılır. Füzuli rayonunda fəaliyyət göstərən mədəniyyət müəssisələrində çalışan gənc əməkdaşlarla görüş keçirilib. Görüşdə mədəniyyət sahəsində qarşıya qoyulmuş məqsədlərə çatmaq üçün birgə fəaliyyətin zəruriliyi diqqətə çatdırılıb. Tədbirlər proqramı çərçivəsində Vətən müharibəsi şəhidi Araz Baxşəliyevin ailəsi də ziyarət olunub. Şəhidin keçdiyi döyüş yolu və göstərdiyi şücaət haqqında söz açılıb. ..

21.05.2021 16:05

Azərbaycan-Böyük Britaniya Hökumətlərarası Komissiyasının iclasında yaradıcı iqtisadiyyatın əhəmiyyətindən bəhs olunubMayın 20-də Azərbaycan Respublikası Hökuməti ilə Böyük Britaniya və Şimali İrlandiya Birləşmiş Krallığı Hökuməti arasında iqtisadi əməkdaşlıq üzrə Birgə Hökumətlərarası Komissiyanın dördüncü iclası keçirilib. Videokonfrans formatında keçirilən iclasda Azərbaycan Respublikası mədəniyyət nazirinin müavini Sevda Məmmədəliyeva iştirak edib. İclas Azərbaycan Respublikasının energetika naziri Pərviz Şahbazovun və Böyük Britaniyanın ixracat naziri Qrem Stüartın açılış nitqləri ilə başlayıb. Müzakirə edilən məsələlər enerji sektoru, kiçik və orta biznes, təhsil, informasiya və kommunikasiya texnologiyaları, habelə digər iqtisadi və sosial sahələri əhatə edib. “Yaradıcı iqtisadiyyat” mövzusunda çıxış edən nazir müavini Sevda Məmmədəliyeva Azərbaycan və Böyük Britaniya arasında əlaqələrin son illər daha da gücləndiyini bildirərək, bunun hər iki ölkənin rəhbərliyi arasındakı etibarlı münasibətlər və güclü iqtisadi əlaqələr sayəsində mümkün olduğunu vurğulayıb. Nazir müavini Azərbaycanın ən qədim və ən qiymətli xalçalarından olan “Şeyx Səfi“ xalçasının hazırda Londonda Viktoriya və Albert Muzeyində saxlanıldığını və sərgiləndiyini də iclas iştirakçılarının diqqətinə çatdırıb. Sevda Məmmədəliyeva, həmçinin Britaniya Şurasının (British Council) həyata keçirdiyi müxtəlif proqramlar və layihələr vasitəsilə iki ölkə arasında möhkəm mədəni əlaqələrin qurulmasında böyük rol oynadığını qeyd edib. İclasda iştirak edən Mədəniyyət Nazirliyinin Beynəlxalq layihələr və innovasiyalar sektorunun müdiri Ramil Abbəkirov Britaniya Şurası tərəfindən ölkəmizdə reallaşdırılan layihələr və Azərbaycanda yaradıcı iqtisadiyyat sahəsinin inkişafı istiqamətində atılan addımlar haqqında danışıb. R.Abbəkirov yaradıcı iqtisadiyyatın dünyada sürətlə böyüyən sahələrdən biri olduğunu qeyd edərək, yerli ÜDM-ə gəlirliliyi və müsbət təsiri maksimum dərəcədə artırmaq məqsədilə dövlət və özəl qurumlar arasında koordinasiya fəaliyyətlərinin gücləndirilməsinə ehtiyac duyulduğunu bildirib. Sektor müdiri, həmçinin, 2017-2018-ci illər ərzində Britaniya Şurasının dəstəyi ilə Azərbaycanda yaradıcı iqtisadiyyat sahəsində hazırlanan bir sıra araşdırma sənədləri haqqında məlumat verib. İclas iki ölkə arasında “Təmiz enerji keçidinə dair Anlaşma Memorandumu”nun və Hökumətlərarası Komissiyanın 4-cü iclasının Protokolunun imzalanması ilə yekunlaşıb. ..

21.05.2021 12:31

Azərbaycan Respublikasının mədəniyyət naziri Anar Kərimov "Xalq qəzeti"nə müsahibə veribMüsahibənin mətni təqdim olunur: Anar müəllim, Prezident İlham Əliyev sizi mədəniyyət naziri təyin edərkən nazirlik qarşısında mühüm vəzifələr qoydu. İstərdik, söhbətimizə videoformatda baş tutan həmin görüşdən başlayaq. – Cənab Prezidentin Azərbaycan dövlətinin mədəniyyət siyasətinin əsas konturlarını əhatə edən həmin çıxışı, bizim gələcək fəaliyyətimizin proqram sənədi kimi çox əhəmiyyətlidir. Dövlət başçısı mədəni irsimizin qorunması və təbliği, “Nizami Gəncəvi ili”ndə dahi şairin yubileyinin ölkəmizdə və xaricdə geniş şəkildə qeyd edilməsi, işğaldan azad olunmuş torpaqlarımızda tarixi-mədəni, dini abidələrin bərpası, yeni mədəniyyət infrastrukturunun yaradılması, Şuşa şəhərinin Azərbaycanın mədəniyyət paytaxtı kimi dünyada tanıdılması, mədəniyyət sahəsinin inkişafı, bu sahədə zəruri islahatların aparılması barədə müvafiq tapşırıq və tövsiyələrini verdi. Ən əsası isə mədəniyyətimizin və milli-mənəvi dəyərlərimizin strateji əhəmiyyətini qeyd edərək bu dəyərlərin gənclərimiz arasında təbliğ edilməsi və milli ruhda tərbiyə məsələsini bir vəzifə kimi Mədəniyyət Nazirliyinə tapşırdı. Dövlətimizin başçısı, həmçinin Azərbaycan dilinin saflığının qorunması məsələsinə, bu sahədə mövcud problemlərə diqqət çəkdi. Mədəniyyət Nazirliyinin digər qurumlarla birlikdə Azərbaycan dilinin qorunması üçün ciddi işlər görülməsi barədə tapşırıqlar verdi. Azərbaycanda bütün dinlərə məxsus ibadət məkanlarının, o cümlədən işğal dövründə Qarabağda ermənilər tərəfindən talan edilmiş, mənimsənilmiş qədim alban xristian irsinin bərpa olunması ölkə rəhbərliyinin diqqət mərkəzindədir. Dövlətimizin başçısı bu istiqamətdə görülməli işləri də nəzərə çatdırdı. Ümumiyyətlə, möhtərəm Prezidentin çıxışı Mədəniyyət Nazirliyinin qarşıdakı fəaliyyətinin əsas istiqamətləri ilə bağlı, müasir dövrün tələbələrinə cavab verən aydın çağırışları ehtiva edirdi. Nazirlik olaraq fəaliyyətimizi də istiqamətlər əsasında qururuq. – Yeni mədəniyyət strategiyasının hazırlanması hansı zərurətdən irəli gəlir? – Bu, ilk növbədə, mədəniyyətimizi yeni dövrün tələblərinə uyğunlaşdırmaq istəyi ilə bağlıdır. Çünki sürətlə inkişaf edən dünyada proseslərdən geri qala bilmərik. Mədəniyyət sahəsinin idarə edilməsinə yanaşmalarda da dəyişikliklərə ehtiyac var. Mədəniyyət Nazirliyinin fəaliyyətinin təkmilləşdirilməsi, iş mexanizmində operativliyin təmin edilməsi, idarəçilik metodologiyasının müasirləşdirilməsi, müəssisələrin iş prinsiplərinin təkmilləşdirilməsi və bütün sistem üzrə koordinasiyanın qurulması məqsədilə “Mədəniyyət Nazirliyinin institusional islahatlarının icrasına dəstək Proqramı” hazırlanıb. Proqram mədəniyyət sahəsinin müxtəlif istiqamətləri üzrə qabaqcıl beynəlxalq təcrübəyə əsaslanan 16 layihədən ibarətdir. – Milli mədəniyyətin inkişaf prioritetləri müəyyənləşib. Bu istiqamətdəki yeniliklər barədə nələri demək istərdiniz? – Milli mədəniyyətin inkişafı ilə bağlı prioritetlər müəyyənləşdirilərkən ayrı-ayrı sahələrlə yanaşı konkret vəzifələr nəzərə alınıb. Bunlar mədəniyyətin bütün sahələrini əhatə edir. Sözsüz ki, fəaliyyətimizdə Azərbaycan Respublikası Prezidentinin müvafiq fərman və sərəncamları, habelə dövlət başçısı tərəfindən təsdiq olunmuş dövlət proqramlarının icrası prioritet təşkil edəcək. Yeri gəlmişkən, qeyd edim ki, mədəniyyət sahəsində qanunvericilik bazasının da yenilənməsinə ehtiyac var. Bu istiqamətdə də müəyyən addımlar atılır. Bu il kino haqqında yeni qanun layihəsini Milli Məclisə təqdim edib müzakirəsini keçirmək istəyirik. Hazırda bununla bağlı müzakirələr aparırıq. Planımızda ilk sırada olan məsələ isə Azərbaycan Respublikasının Kino Agentliyinin yaradılmasıdır. Agentlik publik hüquqi şəxs kimi fəaliyyət göstərəcək. Əsas məqsəd kino sənayesində müasir tələblərə cavab verən şərait yaratmaq, bu sahəyə ölkəmizdən və xaricdən investisiyalar cəlb etmək, özəl sektorla işləri qurmaq və insan resurslarına diqqəti gücləndirmək, bununla da Azərbaycan kinosunun inkişafına nail olmaqdır. Eyni zamanda, kino konsepsiyası çərçivəsində xarici kinostudiyaların Azərbaycanda film çəkilişlərini təşviq edən bir platforma yaradılması da nəzərdə tutulub. Bu bizə imkan verəcək ki, xarici kino şirkətləri öz filmlərini Azərbaycanda çəksinlər. Təbii ki, bu, həm də ölkəmizə sərmayə gətirəcək. – Qloballaşan dünyamızda milli mədəniyyətlərin qorunub saxlanılması üçün hansı məsələlərə daha çox diqqət yetirmək lazımdır? – Çağdaş dünyamızın ən aktual problemlərindən birinə toxundunuz. İnformasiya texnologiyalarının sürətlə inkişaf etdiyi, beynəlxalq iqtisadi və mədəni əlaqələrin daha intensiv xarakter aldığı bir dövrdə milli mədəniyyətlərin qorunması məsələsi daha aktual şəkildə ortaya çıxır. Burada diqqətçəkən məqam ondan ibarətdir ki, qloballaşma kontekstində mədəni inteqrasiya daha sürətli xarakter alıb. Ölkələr arasında mədəni əlaqələrin genişlənməsi təbliğat imkanlarının intensivliyinin artması ilə əlaqədardır. Sadəcə, yaranmış vəziyyətdə real təsirləri düzgün qiymətləndirməli və qloballaşmanın təzadlarını xeyrimizə çevirməliyik. Qloballaşmanın yaratdığı imkanlardan elə istifadə olunmalıdır ki, ölkəmizin yaradıcılıq potensialı və yaradıcı mədəni sənayelər dünya bazarına çıxmaq fürsəti əldə etsinlər. Milli mədəniyyətin qorunması qədər onun təbliği də vacib məsələdir. Bu məsələdə dövlət qurumları və ictimai təşkilatlarla yanaşı, sözsüz ki, ayrı-ayrı fərdlərdən, bütövlükdə ictimaiyyətdən asılı olan nüanslar var. Vətəndaşlarımızın milli-mənəvi dəyərlərimiz, mədəni irsimizlə bağlı dolğun məlumatlı olması vacib məqamdır. Möhtərəm Prezidentimizlə görüşdə dövlət başçısı mədəni irsimizin qorunması, saxlanılması, Azərbaycan mədəniyyətinin dünyaya təbliği, gənc nəslin Azərbaycan mədəniyyətindən, mədəni irsindən xəbərdar olması və milli ruhda tərbiyəsi işində Mədəniyyət Nazirliyinin rolunun yenidən formalaşdırılması ilə bağlı göstəriş verdi. Artıq bu göstərişin icrası məqsədilə “Davranış Mədəniyyəti Konsepsiyası”nın hazırlanmasına başlanılıb. – Azərbaycan mədəni müxtəlifliyin, multikultural dəyərlərin tarixən mövcud olduğu məkandır. Gələcəkdə bu dəyərlərin yaşadılması istiqamətində hansı yeniliklər gözlənilir? – Azərbaycanın sahib olduğu multikultural dəyərlər, tolerantlıq mühiti dünyada örnək kimi qəbul olunur. Möhtərəm Prezidentimizin dediyi kimi, tolerantlıq Azərbaycanda həyat tərzidir. Dövlət başçısı tərəfindən 2016-cı ilin Azərbaycanda “Multikulturalizm ili”, 2017-ci ilin “İslam həmrəyliyi ili” elan olunması ölkəmizin mədəni zənginliyini, tolerantlıq mühitini dünyaya bəyan etməklə yanaşı, bu xüsusda yeni mədəni təşəbbüslərə də zəmin yaradır. Azərbaycan müsəlman ölkəsi olsa da, respublikamızda yaşayan digər inanc sahiblərinin də dini məkanlarının qorunmasına və təmir-bərpasına diqqət yetirilir. Azərbaycan dövləti mənşəyindən asılı olmayaraq, ölkəmizdəki bütün dini miras nümunələrinə eyni dərəcədə qayğı ilə yanaşır. Məlumdur ki, Birinci vitse-prezident Mehriban xanım Əliyevanın rəhbərlik etdiyi Heydər Əliyev Fondu tərəfindən həm Azərbaycanda, həm də bir sıra xarici ölkələrdə qədim xristian abidələrinin bərpası ilə bağlı layihələr reallaşdırılır. Hazırda işğaldan azad edilmiş ərazilərimizdə Ermənistan tərəfindən vandalizmə, saxtalaşdırma və mənimsəməyə məruz qalmış qədim alban xristian irsinin də bərpa və konservasiyası istiqamətində işlər görülür. Bu mənada dünyəvi və multikultural ölkə kimi Azərbaycanın mövqeyinin və sadiq olduğu dəyərlərin beynəlxalq miqyasda düzgün təbliğ olunması çox vacibdir. Azərbaycan Prezidenti cənab İlham Əliyev tərəfindən 2008-ci ildə mədəniyyətlərarası dialoqa dair “Bakı prosesi” təşəbbüsü irəli sürülmüş və 2010-cu ildə BMT Baş Assambleyasında ölkəmizin Ümumdünya Mədəniyyətlərarası Dialoq Forumu keçirmək niyyəti bəyan edilmişdir. 2011-ci ildən etibarən Ümumdünya Mədəniyyətlərarası Dialoq Forumuna ev sahibliyi etməklə ölkəmizin “Bakı prosesi”nin ideyalarına sadiqliyini nümayiş etdiririk. Təsadüfi deyil ki, Birləşmiş Millətlər Təşkilatının Baş katibi 2017, 2018 və 2019-cu illərdə BMT Baş Assambleyasına təqdim etdiyi məruzələrdə “Bakı prosesi”nin əhəmiyyətini xüsusi vurğulayaraq Ümumdünya Mədəniyyətlərarası Dialoq Forumunu mədəniyyətlərarası və dinlərarası dialoq sahəsində BMT-nin əsas qlobal platformalarından biri elan etmişdir. Onu da qeyd edim ki, “Bakı prosesi” və forum UNESCO, BMT-nin Sivilizasiyalar Alyansı, Dünya Turizm Təşkilatı, ICESCO və Avropa Şurasının tərəfdaşlıq etdiyi yeganə qlobal layihədir. Yerli səviyyəyə gəldikdə, Azərbaycan dövlətinin mədəniyyət siyasətinin əsas istiqamətlərindən biri də ölkəmizdə yaşayan azsaylı xalqların, etnik qrupların dilinin, dini inanclarının, adət-ənənələrinin qorunub saxlanılmasıdır. Mədəniyyət Nazirliyi tərəfindən bu istiqamətdə müxtəlif layihələr həyata keçirilib. Buna misal olaraq “Azərbaycan – doğma diyar” devizi altında keçirilən milli azlıqların incəsənət festivallarını göstərə bilərəm. Ötən ilin noyabrında başladığımız və birinci mərhələsi başa çatan “Xristian irsimizi tanıyaq” layihəsi çərçivəsində Azərbaycan ərazisində xristian dininə aid olan və dövlət tərəfindən qorunan məbədlər, kilsə və ibadətgahlara aid qısa videoçarxlar hazırlanaraq yayımlanıb. Ramazan ayında isə “İslam irsimizi tanıyaq” layihəsini təqdim etdik. Bu layihə üzrə ölkəmizdəki İslam mədəniyyəti abidələri – məscidlər, türbələr, xanəgahlar, karvansaralar barədə qısa videoçarxlar hazırlanıb, nazirliyin rəsmi saytı və sosial media hesabları vasitəsilə ictimaiyyətə təqdim olunur. Bu yaxınlarda elan etdiyimiz daha bir layihəni diqqətə çatdırmaq istərdim. Bu, “Mədəniyyət naminə sülh” (#Peace4Culture) adlı qlobal kampaniyadır. Layihənin məqsədi sülh vasitəsilə mədəni irsin qorunması, dayanıqlı sülhsevər cəmiyyətlərin qurulması, eləcə də sülhün əldə olunmasında mədəniyyətin və mədəniyyətin inkişafında sülhün rolunun öyrənilməsidir. – Beynəlxalq əlaqələrdə mədəni əməkdaşlıq əhəmiyyətli məsələdir. Bu kontekstdə UNESCO ilə münasibətlərin hazırkı vəziyyətini necə xarakterizə edərdiniz? – Mədəni irs, incəsənət xalqları, ölkələri tanıdan, insanları birləşdirən əhəmiyyətli vasitələrdən biridir. Azərbaycan dövləti beynəlxalq mədəni əməkdaşlığa xüsusi önəm verir. Xarici ölkələrlə bu sahədə əlaqələri inkişaf etdirmək üçün lazımi addımlar atılır. Ölkəmiz beynəlxalq mədəniyyət layihələrində yaxından iştirak edir, eyni zamanda BMT-nin Sivilizasiyalar Alyansı, UNESCO kimi təsisatları ilə yüksək səviyyəli əməkdaşlıq əlaqələrimiz var. Ölkəmiz BMT-nin aparıcı qurumlarının bir sıra tədbirlərinə uğurla ev sahibliyi edib. Həmçinin bu qurumlar Azərbaycanın təşkilatçılığı ilə keçirilən mötəbər beynəlxalq tədbirlərin tərəfdaşı və dəstəkçisi kimi çıxış edirlər. Azərbaycanın UNESCO ilə əlaqələri ulu öndər Heydər Əliyevin 1993-cü ildə ölkəmizə rəhbərliyə qayıdışından sonra təşəkkül tapıb və inkişaf etməyə başlayıb. Sonrakı illərdə Prezident İlham Əliyev tərəfindən bu münasibətlərə daim böyük önəm verilib. Xüsusilə 2004-cü ildə Mehriban xanım Əliyevanın UNESCO-nun xoşməramlı səfiri seçilməsi ilə ölkəmizin bu qurumla əlaqələrində yeni səhifə açılıb, əməkdaşlığın miqyası daha da genişlənib. Təsadüfi deyil ki, Mehriban xanımın bilavasitə təşəbbüsü və dəstəyi ilə bu gün ölkəmizin 15 qeyri-maddi mədəni irs nümunəsi UNESCO-nun müvafiq siyahılarında yer alır. Üç tarixi-mədəni irs məkanımız isə təşkilatın digər mötəbər reyestrinə – Dünya İrsi Siyahısına daxil edilib. Onu da qeyd edim ki, Bakı və Şəki şəhərləri UNESCO-nun “Yaradıcı şəhərlər şəbəkəsi”nə salınıb. Burada bir məqama da toxunmaq istəyirəm. İşğal altında olan torpaqlarımızı azad edəndən sonra erməni diasporunun və onların havadarlarının təsiri ilə UNESCO regiona missiya göndərilməsi məsələsində ölkəmizə qarşı qərəzli mövqe nümayiş etdirdi və bu bizi məyus etdi. Halbuki tərəfimizdən ilkin mərhələdə missiyanın həyata keçirilməsi üçün işğaldan azad edilmiş ərazilərdə təhlükəsizlik məsələlərinin həll edilməsinin vacibliyi, xüsusilə ərazilərin minalardan təmizlənməsi prosesinin və iqlim vəziyyətinin əlverişli olmadığı bizim tərəfimizdən diqqətə çatdırılsa da, qərəzli yanaşma davam etdi. Artıq işğaldan azad olunmuş ərazilərdə müəyyən təhlükəsizlik tədbirləri həyata keçirilib və ölkəmiz UNESCO missiyasını qəbul etməyə hazırdır. Həmin missiyanı qəbul etməyə hazır olduğumuz haqqında müraciət göndərilib və texniki missiya zamanı işğaldan azad edilmiş ərazilərdə baxış keçiriləcək abidə və mədəniyyət müəssisələrinin siyahısı da təqdim olunub. Onu da qeyd edim ki, Vətən müharibəsindən əvvəlki dövrlərdə də Azərbaycan bölgəyə – işğal edilmiş torpaqlarımıza missiyanın göndərilməsi ilə bağlı UNESCO-ya dəfələrlə müraciət etsə də, müsbət cavab ala bilməmişdir. Ancaq bütün bunlara baxmayaraq, Azərbaycan dövləti ölkəmizin maraqları çərçivəsində öz həqiqətlərini dünyaya çatdırmaq məqsədilə UNESCO ilə əlaqələrin inkişafı üçün əməkdaşlığı davam etdirəcək. – Qarabağın mədəni, dini abidələri, mədəniyyət müəssisələri erməni vandalları tərəfindən yerlə-yeksan edilib. Bu abidələrin bərpası və yenidən qurulması istiqamətində nə kimi işlər görülür? – Ermənilər 30 ilə yaxın işğal altında saxladıqları tarixi yurd yerlərimizdə bütün infrastrukturu, o cümlədən tarixi-mədəni irsimizi məhv ediblər. Qarabağda ermənilərin törətdiyi vandalizm artıq dünya ictimaiyyətinə çatdırılır. Yeri gəlmişkən qeyd edim ki, mədəni irsimizə qarşı törədilən vandalizm aktları ilə əlaqədar Mədəniyyət Nazirliyi tərəfindən UNESCO və ICESCO-ya, BMT-nin Sivilizasiyalar Alyansına və 150 ölkənin Mədəniyyət Nazirliyinə müraciət edilib. İndiyədək dövlət qeydiyyatında olan 313 tarix-mədəniyyət abidəsinin monitorinqi həyata keçirilib. Həmin ərazilərdə yerləşən dövlət qeydiyyatında olmayan tarixi, memarlıq, arxeoloji əlamət daşıyan 113 obyekt aşkar edilib. Baxış keçirilən tarix-mədəniyyət nümunələrinin əksəriyyəti işğalçılar tərəfindən tamamilə məhv edilib. Həmçinin 846 mədəniyyət müəssisəsi monitorinq edilib ki, onlardan 451-i kitabxana, 342-si mədəniyyət evi və klub müəssisəsi, 20-si muzey, 25-i uşaq musiqi məktəbi, 1-i kinoteatr, 2-si teatr, 2-si qalereya, 3-ü kinoklubdur. Bu müəssisələrdən 14-ü ilkin monitorinq nəticəsində aşkar edilsə də, nazirliyin şəbəkəsində yoxdur. Müəssisələrin, demək olar ki, hamısı tamamilə dağıdılmış vəziyyətdədir. Monitorinqlər Şuşa, Cəbrayıl, Füzuli, Zəngilan, Xocavənd, Qubadlı, Ağdam və Kəlbəcər rayonları üzrə aparılıb. Monitorinq davam edir və bu proses yekunlaşandan sonra erməni işğalı dövründə mədəniyyətimizə vurulmuş ziyanın tam mənzərəsini həm ölkə ictimaiyyətinin, həm də beynəlxalq ictimaiyyətin diqqətinə çatdıracağıq. Məlum olduğu kimi, Prezident İlham Əliyev tərəfindən işğaldan azad edilmiş ərazilərin bərpası və yenidən qurulması qarşıdakı dövrün prioritetlərindəndir. Yaşayış məntəqələrində düşmənin vandalizminə məruz qalmış mədəniyyət abidələrinin bərpası təxirə salınmadan aparılacaq və bütün bu işlər bilavasitə dövlət başçısının diqqət mərkəzindədir. İlk növbədə Şuşa şəhərində genişmiqyaslı quruculuq işləri həyata keçirilir. İşğal zamanı erməni vandalizminə məruz qalmış tarixi abidələr, məqbərələr, ev-muzeyləri, məscidlər, eləcə də Qazançı kilsəsi bərpa edilir. Əminəm ki, aparılan təmir-bərpa işləri Şuşanın tarixi-mədəni simasını özünə qaytaracaq, qədim şəhərimizi dünya mədəni irs xəritəsində yeni cazibə mərkəzinə çevirəcək. – Bu günlərdə milli mədəniyyətimizin beşiyi sayılan Şuşada möhtəşəm “Xarıbülbül” musiqi festivalı keçirildi. Prezident İlham Əliyev bu il, həmçinin Şuşada Vaqif poeziya günlərinin keçirilməsi barədə tapşırıq verib. Dövlət başçısının göstərişi ilə Şuşada mədəniyyət abidələrinin və müəssisələrinin bərpası ilə bağlı işlərə başlanılıb. Şuşanın mədəni həyatında daha hansı yeniliklər gözlənilir? – Qarabağın işğaldan azad edilməsi təkcə ölkəmizin ərazi bütövlüyünün bərpası, insanların doğma yurdlarına qayıdışı deyil, eyni zamanda, bu torpaqlara geniş anlamda mədəniyyətin qayıtması deməkdir. Ona görə də bu yöndə layihə və aksiyalarımızı “Mədəniyyəti Qarabağa qaytarırıq” şüarı ilə həyata keçiririk. Biz bu torpaqlara mədəniyyəti qaytarmaqla, oradakı tarixi-mədəni irsi bərpa etməklə dünyaya da göstərəcəyik ki, Qarabağda 30 ilə yaxın vandalizmlə, talanla məşğul olanlardan fərqli olaraq, bu yerlərin əsl və əzəli sahibi kimlərdir. Dövlət tərəfindən həyata keçiriləcək “Böyük Qayıdış” proqramında mədəniyyət xadimlərinin, müvafiq sahələr üzrə mütəxəssislərin, yaradıcı təşkilatların iştirakı ilə bu işə verə biləcəyimiz töhfələr barədə fikirləri dinləmək üçün videokonfrans formatında geniş görüşümüz də olub. Ulu öndər Heydər Əliyevin vaxtilə Şuşa və Qarabağ haqqında dediyi sözlərin tarixi əhəmiyyətini bu günlər yaşadığımız zəfər ruhu ilə bir daha dərindən dərk edirik. Şuşasız Qarabağ, Qarabağsız Azərbaycan tam deyildi, ola da bilməzdi. Biz Şuşasız, Qarabağsız illəri bu inamla yaşadıq, bu itki ilə heç vaxt barışmadıq. Ümummilli lider deyirdi ki, Şuşa bizim mədəniyyətimizin, tariximizin rəmzidir, hər bir azərbaycanlı üçün iftixar mənbəyidir, əzizdir. Amma tək Şuşa yox, bütün Qarabağ torpağı bizim üçün əzizdir. Bu gün əsas vəzifəmiz Şuşamızı, onun tarixi əhəmiyyətini və Azərbaycan mədəniyyətindəki rolunu bərpa etmək, bu qədim şəhərin mədəniyyətimizin, musiqimizin beşiyi olduğunu dünya ictimaiyyətinə çatdırmaqdır. Möhtərəm Prezidentin imzaladığı sərəncamla Şuşa şəhərinin tarixi görkəminin, əvvəlki şöhrətinin özünə qaytarılması və ənənəvi dolğun mədəni həyatına qovuşması, eləcə də Azərbaycanın çoxəsrlik zəngin mədəniyyətinin, memarlıq və şəhərsalma sənətinin parlaq incisi kimi beynəlxalq aləmdə təbliği təmin ediləcək. Mayın 12-13-də dövlət başçısının tapşırığı əsasında Cıdır düzündə keçirilən “Xarıbülbül” musiqi festivalı da mədəniyyətimizin paytaxtına qayıdışımızın möhtəşəm nümayişi oldu. Prezident İlham Əliyevin festivalın açılışında dediyi kimi, biz bütün dünyaya Şuşadan, qədim torpağımızdan mesaj verdik. Bu, sülh, xalqların birgəyaşayışı, mədəni zənginlik, tolerantlıq, milli həmrəylik mesajıdır. Festivalın ilk günü ölkəmizdə yaşayan müxtəlif xalqların mədəni irsinin təqdimatı – “Azərbaycan musiqisində multikulturalizm” mövzusunda konsert proqramı da bunun parlaq ifadəsi idi. Şuşanın işğaldan azad edilməsindən cəmi altı ay sonra illərdir həsrətində olduğu musiqi, sənət havasına qovuşması bütövlükdə Azərbaycan mədəniyyətinin təntənəsidir. İşğaldan azad edilmiş ərazilərdə yenidənqurma və bərpa işlərinə Şuşadan başlamışıq. Prezident İlham Əliyev və Birinci vitse-prezident Mehriban xanım Əliyeva ilin əvvəlindən artıq üç dəfə Şuşa şəhərində olublar. Bu səfərlər Şuşada aparılacaq mədəni quruculuq işlərinə ölkə rəhbərliyinin həssas münasibətini göstərir. Şəhərdə bir sıra tarix-mədəniyyət abidələrinin bərpası prosesi gedir. Vaqifin məqbərəsinin bərpası yay aylarında başa çatacaq. Onu da əlavə edim ki, bərpa prosesində xarici mütəxəssislərin təcrübəsindən də istifadə ediləcək. Bir sıra ölkələrin bu sahədə fəaliyyət göstərən şirkətlərinin də işlərə cəlb edilməsi nəzərdə tutulur. Bu il Şuşada Vaqif poeziya günlərinin keçirilməsi də nəzərdə tutulur. Türk dünyası təşkilatları da bu tədbirlərə dəstək vermək, yaxından iştirak etmək istəyirlər. Şuşa ilə bağlı çox əhəmiyyətli bir təklif ICESCO-dan gəldi. Təşkilatın rəhbərinin bu ilin yanvar ayında ölkəmizə səfəri zamanı Şuşanın “İslam mədəniyyətinin paytaxtı” elan edilməsi təklif olundu. Eyni zamanda TÜRKSOY təşkilatı Şuşanın 2023-cü ildə “Türk dünyasının mədəniyyət paytaxtı” elan edilməsini təklif etdi. Bu da Türk-İslam dünyasının qədim Şuşa şəhərinin mədəni zənginliyinə diqqətinin göstəricisidir. – Türk dünyasından söz düşmüşkən, nazir vəzifəsində ilk rəsmi səfəriniz Türkiyəyə oldu. Bu səfərin nəticələri olaraq qardaş ölkə ilə mədəniyyət sahəsində əməkdaşlıq barədə nə deyərdiniz? – Qardaş Türkiyə ilə mədəniyyət sahəsində həm ikitərəfli formatda, həm də beynəlxalq təşkilatlar çərçivəsində geniş əməkdaşlıq imkanları mövcuddur. Ortaq tarix və dəyərlərimizə əsaslanan bu əməkdaşlıq dövrün tələbi olmaqla bərabər, ölkələrimizin bütün maraqlarını tam şəkildə ehtiva edir. Martın 1-dən 3-dək nazirliyin geniş nümayəndə heyəti ilə Türkiyə səfərimiz gerçəkləşdi. Ankara və İstanbulda çoxsaylı görüşlərimiz oldu. Səfər zamanı iki ölkə arasında mədəniyyət üzrə birgə komissiyanın iclası keçirildi. İncəsənət, muzey, kitabxana işi, kino sənayesi və s. sahələrdə əməkdaşlığa dair faydalı müzakirələr aparıldı. İclasın yekun protokolu da mədəniyyətin bütün spektri üzrə gələcək birgə fəaliyyətimizi əhatə edir. Məqsədimiz Türkiyə ilə Azərbaycan arasında mədəniyyət sahəsində əməkdaşlığı daha da gücləndirmək, bir çox məsələlər üzrə təcrübə mübadiləsi aparmaqdır. Xüsusilə də kino sahəsi üzrə birgə layihələr həyata keçirməyi planlaşdırırıq. Vətən müharibəsində əldə etdiyimiz zəfərin həm türk dünyasında, həm də beynəlxalq platformada ən yüksək səviyyədə təbliğində kino layihələri mühüm rol oynaya bilər. Bu məqsədlə ortaq layihələr həyata keçirmək istəyirik. Türkiyə tərəfi də bu sahədə işbirliyinə böyük önəm verir. Türkiyənin film istehsalı ilə məşğul olan aparıcı şirkətləri ilə əlaqə yaratmışıq. Birgə filmlərin çəkilişlərində Azərbaycan tərəfindən həm aktyorlar, həm də rejissorlar iştirak edəcəklər. Məlumdur ki, Türkiyənin kino sənayesi son dövrlərdə çox inkişaf edib. Türk filmləri, serialları dünyada maraqla qarşılanır. Biz də bu təcrübədən yararlanmaq istəyirik. Səfər çərçivəsində nümayəndə heyətimizin üzvləri türkiyəli həmkarları ilə muzey əşyalarının qorunması, elmi tədqiqatı, muzeylərin maarifləndirici xüsusiyyətləri və təhsildə rolu, birgə sərgilərin təşkilini müzakirə etdilər. Görüşlərdə media-kommunikasiya sahəsində əlaqələrin genişləndirilməsi, təcrübə mübadiləsi, iki ölkənin birgə layihələrinin Türkiyə mətbuatında işıqlandırılması, habelə teatr sənəti sahəsində əməkdaşlıq, müştərək layihələrin həyata keçirilməsi, kitabxanaların rəqəmsallaşdırılması və vahid elektron kitabxana sisteminin qurulması prosesində qardaş ölkənin təcrübəsinin tətbiqi imkanları və s. məsələlərlə bağlı müzakirələr aparıldı. Əminəm ki, bu danışıqlar, görüşlər çox faydalı oldu və gələcək əməkdaşlığımıza töhfə verəcək bir başlanğıcdır. Müsahibəni apardı: Mehdi MÜKƏRRƏMOĞLU, “Xalq qəzeti” ..

21.05.2021 12:15

Əməkdar artist Qorxmaz Qurbanov vəfat edibƏməkdar artist, qocaman rəqqas Qorxmaz Ağababaoğlu Qurbanov 20 may 2021-ci il tarixində vəfat edib. Qorxmaz Qurbanov 18 iyul 1940-cı ildə anadan olub.Bakı Xoreoqrafiya Məktəbində təhsil alıb. 1958-ci ildə Azərbaycan Dövlət Mahnı və Rəqs Ansamblına dəvət olunub. Q.Qurbanov Mahnı və Rəqs Ansamblının baletmeysteri, bədii rəhbəri vəzifələrində çalışıb. O,Dövlət Mahnı Teatrında, Dağıstan Dövlət “Ləzginka“ rəqs ansamblında da uğurla çalışıb. Qorxmaz Qurbanov Ə.Abdullayevin quruluşlarında “Yallı-Zorxana“, “Bulaq başında“, “Şəki“, “Çobanlar“, “Bənövşə“, “Ceyran“, “Qarabağ maralı“, “Nazeləmə“, “Lənkəran“ rəqslərində, “Azərbaycan“ “Qələbə“, “Xalqlar dostluğu“, “Bayram“, “Neftçilər“ suitalarında solist kimi cıxış edib. O, Azərbaycan rəqs sənətinin inkişafındakı xidmətlərinə görə 1967-ci ildə Əməkdar artist fəxri adına layiq görülüb. Allah rəhmət eləsin! ..

20.05.2021 16:22

Tofiq Quliyevin abidəsinin ucaldılması haqqında Azərbaycan Respublikası Prezidentinin SərəncamıAzərbaycan Respublikası Konstitusiyasının 109-cu maddəsinin 32-ci bəndini rəhbər tutaraq, görkəmli Azərbaycan bəstəkarı, Xalq artisti, Dövlət Mükafatı laureatı Tofiq Ələkbər oğlu Quliyevin xatirəsinin əbədiləşdirilməsi məqsədilə qərara alıram: 1. Bakı şəhərində görkəmli Azərbaycan bəstəkarı Tofiq Quliyevin abidəsi ucaldılsın. 2. Bakı Şəhər İcra Hakimiyyəti Azərbaycan Respublikasının Mədəniyyət Nazirliyi ilə birlikdə Tofiq Quliyevin abidəsinin ucaldılması ilə bağlı tədbirlərin həyata keçirilməsini təmin etsin. 3. Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin. İlham Əliyev Azərbaycan Respublikasının Prezidenti Bakı şəhəri, 20 may 2021-ci il ..

20.05.2021 16:21

S.X.Rüstəmxanlının “Şöhrət” ordeni ilə təltif edilməsi haqqında Azərbaycan Respublikası Prezidentinin SərəncamıAzərbaycan Respublikası Konstitusiyasının 109-cu maddəsinin 23-cü bəndini rəhbər tutaraq qərara alıram: Azərbaycan Respublikasının ictimai-siyasi və mədəni həyatında uzunmüddətli səmərəli fəaliyyətinə görə Sabir Xudu oğlu Rüstəmxanlı “Şöhrət” ordeni ilə təltif edilsin. İlham Əliyev Azərbaycan Respublikasının Prezidenti Bakı şəhəri, 20 may 2021-ci il ..

19.05.2021 17:31

Milli Xalça Muzeyi intellektual oyun və “Muzeylər gecəsi” təşkil edibXəbər verdiyimiz kimi, Azərbaycan Milli Xalça Muzeyi 18 may – Beynəlxalq Muzeylər Günü münasibətilə silsilə tədbirlər keçirib. Müxtəlif icma nümayəndələrinin iştirakı ilə gerçəkləşən videokonfransda təqdimat və məruzələr dinlənilib. Bundan əlavə, ölkə muzeyləri içərisində ilk dəfə Azərbaycan Milli Xalça Muzeyi “Nə? Harada? Nə zaman?” intellektual oyununu təşkil edib. İştirakçılar incəsənət, o cümlədən dünya muzeyləri, xalçaçılıq sənəti və Azərbaycan Milli Xalça Muzeyi ilə bağlı sualları cavablandırıblar. 22 komandanın iştirak etdiyi, Onlayn keçirilən oyunun qalibi “Qarabağ” komandası olub. Silsilə tədbirlər Azərbaycan Milli Xalça Muzeyində təşkil edilən “Muzeylər gecəsi” konsert proqramı ilə yekunlaşıb. Gecədə yeni fəaliyyətə başlayan rok, caz qrupları və ifaçıları çıxış ediblər. Sənətdə ilk addımlarını atan istedadlı yaradıcı gənclərə dəstək verilməsi və onların pərəstişkarlarının muzeylərə marağının artırılması məqsədilə reallaşan konsertdə “The Etude Band”, “Seymur Əliyev Trio” qrupları, həmçinin Milan, Mixail Altuxov, Joseph Abbas maraqlı ifalar təqdim ediblər. “Nə? Harada? Nə zaman?” intellektual oyunu və konsert proqramı muzeyin sosial media hesablarında canlı yayımlanıb. Qeyd edək ki, bu il Beynəlxalq Muzeylər Gününün devizi “Muzeylərin gələcəyi: dirçəliş və yeni baxış”dır. ..

19.05.2021 11:27

"Səhnədən səngərə" layihəsi çərçivəsində təqdim olunur: Şəhid Rauf Əliyev Azərbaycan Respublikası Mədəniyyət Nazirliyi “Səhnədən səngərə“ layihəsinin ilk buraxılışını təqdim edir. 27 sentyabr 2020-ci ildə başlanan Vətən müharibəsinə könüllü yollananlar sırasında, sinəsinə sıxdığı doğma tarını anasına əmanət edib, yurdunun torpağına qarışan şəhidimiz Rauf Əliyev də var. Layihədə Rauf Əliyevin yarım qalmış şərəfli ömür yolundan bəhs edən doğmaları, şəhidimizin ürəyində məzara köçən ən böyük arzusundan, Bütöv Azərbaycan uğrunda yarı yolda qoyduğu nişanlısından, milli mənəvi dəyərlərimizə, muğama, tara olan sonsuz sevgisindən söz açıblar. ..

19.05.2021 11:15

Beynəlxalq Muzeylər Günü münasibətilə keçirilən videokonfransda Qarabağ muzeyləri ilə bağlı müzakirələr aparılıbXəbər verdiyimiz kimi, Azərbaycan Milli Xalça Muzeyinin təşkilatçılığı ilə mayın 18-də Beynəlxalq Muzeylər Gününə həsr olunmuş videokonfrans keçirilib. Üç hissədən ibarət olan konfransda müxtəlif icma nümayəndələri – fərqli sənət sahələri üzrə mütəxəssislər; sağlamlıq imkanları məhdud şəxsləri birləşdirən ictimai təşkilatların rəhbərləri, Qarabağ bölgəsi üzrə muzeylərin direktorları iştirak ediblər. Videokonfransın açılışında Azərbaycan Respublikası mədəniyyət nazirinin müavini Sevda Məmmədəliyeva çıxış etmişdi. Sonra iştirakçıların təqdimatları olub və onların ətrafında fikir mübadiləsi aparılıb. Mədəniyyət Nazirliyinin Beynəlxalq layihələr və innovasiyalar sektorunun müdiri Ramil Abbəkirov nazirliyin dəstəyi ilə həyata keçirilən “Kreativ Azərbaycan” portalının bölmələri, strukturu, fəaliyyət istiqamətləri ilə bağlı geniş məlumat verib. Müxtəlif sənət sahələri üzrə fəaliyyət göstərən mütəxəssislərin rifahının yüksəldilməsi, onların öz potensiallarını üzə çıxarması, yerli yaradıcı məhsulların və xidmətlərin ölkə daxilində, həmçinin xarici bazarlarda tanıdılması məqsədilə qurulan portalın əhəmiyyətindən bəhs edilib. Mədəniyyət Nazirliyinin Muzey işi və mədəni sərvətlərə nəzarət şöbəsinin müdiri Nərgiz Abdullayeva Qarabağ muzeyləri ilə bağlı təqdimatla çıxış edib. O, “Böyük qayıdış” konsepsiyasına uyğun olaraq işğaldan azad edilən torpaqlarımıza mədəni həyatın yenidən qaytarılması üçün muzeylərin fəaliyyətinin bərpasının mühüm əhəmiyyət kəsb etdiyini və bu məqsədlə arxivlərdə geniş miqyasda elmi-tədqiqat işlərinin aparılmasının zəruriliyi vurğulayıb. Qeyd edib ki, Qarabağda muzeylərin fəaliyyəti bərpa olunan zaman arxivlərdə aparılan tədqiqatların nəticələrinə istinad ediləcək. Şöbə müdiri Bakı şəhərində yaradılması nəzərdə tutulan Vətən müharibəsi memorial kompleksi və Zəfər muzeyinin konsepsiyasının hazırlanması istiqamətində Mədəniyyət Nazirliyi tərəfindən aparılan işlərdən də bəhs edib. Bu muzeyin Vətən müharibəsinin, bu müharibədə qazandığımız şanlı Qələbənin müasir təqdimat metodları ilə tamaşaçıya çatdıran məkan olmasının əhəmiyyəti xüsusi vurğulanıb, layihənin yüksək səviyyədə icrası üçün nazirlik tərəfindən yerli mütəxəssislərlə yanaşı, xarici ekspertlərə də müraciət olunduğu diqqətə çatdırılıb. Nazirlik tərəfindən Vətən müharibəsi memorial kompleksi və Zəfər muzeyi fondunun təşkili üçün lazımi materialların toplanılması işinə də başlanıldığı və Azərbaycan İstiqlal Muzeyində bu işin davam etdiyi bildirilib. Nərgiz Abdullayeva Azərbaycan Respublikasının Prezidentinin müvafiq tapşırığına əsasən azad olunmuş bütün şəhərlərdə işğal tarixi ilə bağlı muzeylərin yaradılacağını da konfrans iştirakçılarının nəzərinə çatdırıb. Qeyd edib ki, şəhərsalma işləri aparılarkən şəhərlərin müəyyən bir hissəsi dağıdılmış vəziyyətdə saxlanılacaq və Ermənistanın işğalçılıq siyasətinin ümumi mənzərəsini əks etdirən açıq səma altında muzey kimi nümayiş etdiriləcək. Onlayn görüş zamanı işğaldan azad olunmuş torpaqlarda vaxtilə fəaliyyət göstərmiş muzeylərin mövcud problemləri və onların həlli yolları müzakirə edilib, Qarabağ bölgəsi üzrə muzeylərin direktorlarının fikirləri dinlənilib. Həmin muzeylərin kolleksiyalarının öz doğma məkanlarına qaytarılması məqsədilə Beynəlxalq Muzeylər Şurasının (ICOM) müvafiq komitələri ilə həyata keçiriləcək işlər, həmçinin toplanmış yeni məlumatlar ətrafında fikir mübadiləsi aparılıb. Daha sonra Azərbaycan Milli Xalça Muzeyinin direktoru Şirin Məlikova sağlamlıq imkanları məhdud şəxsləri birləşdirən ictimai təşkilatlarla birgə həyata keçirilən uğurlu layihələrdən və gələcək planlardan söhbət açıb. Digər muzeylərin Azərbaycan Milli Xalça Muzeyi ilə bu istiqamətdə qarşılıqlı fəaliyyətinin genişləndirilməsi məsələləri müzakirə edilib. ..

19.05.2021 10:34

Azərbaycan xalçaları Xorvatiyada nümayiş edilibAzərbaycan Respublikası Mədəniyyət Nazirliyinin dəstəyi və Azərbaycanın Xorvatiyadakı səfirliyinin təşkilatçılığı ilə Zaqreb şəhərinin mərkəzi Nikola Şubiç Zrinski meydanında açıq havada “Azərbaycan xalçaları” sərgisinin rəsmi açılış mərasimi keçirilib. Sərgidə Azərbaycan Milli Xalça Muzeyinin fondunda qorunub saxlanılan Qarabağ, Şirvan, Quba, Gəncə, Qazax və digər Azərbaycan xalçaçılıq məktəblərinə məxsus xalçaların yüksək keyfiyyətli şəkilləri nümayiş olunub. Azərbaycanın Xorvatiyadakı səfiri Fəxrəddin Qurbanov sərginin açılış mərasimindəki çıxışında qeyd edib ki, xalçaçılıq sənəti Azərbaycan mədəniyyətinin bir parçasıdır və hazırkı sərgi iki həftə ərzində Zaqrebdə nümayiş olunacaq. Səfir bildirib ki, Azərbaycan qədim xalçaçılıq sənətinin yarandığı dünya mərkəzlərindən biri olub və xalçaçılıq Azərbaycan xalqının zəngin mənəvi dünyasını, dünyagörüşünü, dini inancını və həyat fəlsəfəsini əks etdirib. Müxtəlif naxış elementləri və təsvirlərlə bəzədilən xovlu və xovsuz xalçalar, Azərbaycan xalçaçılıq məktəbləri barədə qonaqlara məlumat verilib. Qeyd olunub ki, Azərbaycan xalçaları 2010-cu ilin noyabrında UNESCO-nun “Qeyri-maddi Mədəni İrs“ siyahısına salınmış və Azərbaycan el sənətkarlarının yaratdıqları xalça sənəti inciləri yüzilliklər boyu dünyanın bir çox muzeylərini, o cümlədən Nyu-Yorkun Metropoliten, Londonun Viktoriya və Albert, Sankt-Peterburqun Ermitaj, Parisin Luvr muzeylərini bəzəyib. Tədbirdə Xorvatiyanın sabiq Prezidenti S.Mesiç, Parlamentin üzvü V.Kaytazi, Xorvatiya Respublikasında akkreditə olunmuş diplomatik korpus, Xorvatiya-Azərbaycan Dostluq Cəmiyyətinin üzvləri və ictimaiyyətin nümayəndələri iştirak ediblər. ..

18.05.2021 18:08

Məktəblilər üçün muzey həftəsi layihəsi çərçivəsində “Muzeylər və Nizami irsi” adlı virtual beynəlxalq proqrama start verilib2021-ci ilin 18-26 may tarixlərini əhatə edən “Məktəblilər üçün muzey həftəsi” layihəsi çərçivəsində “Muzeylər və Nizami irsi” adlı virtual beynəlxalq proqrama start verilib. Proqram Təhsil, Mədəniyyət nazirlikləri, Azərbaycan Milli Elmlər Akademiyasının dəstəyi, Nizami Gəncəvi Beynəlxalq Mərkəzinin əməkdaşlığı və Respublika Uşaq-Gənclər İnkişaf Mərkəzinin təşkilatçılığı ilə icra edilir. Beynəlxalq proqramın məqsədi məktəbliləri Nizami irsi ilə tanış etmək, onlarda klassik irsə məhəbbət hissi aşılamaq, həmçinin onların asudə vaxtlarını səmərəli təşkil etməkdən ibarətdir. “Muzeylər və Nizami irsi” adlı virtual beynəlxalq proqramın açılış mərasimində Təhsil Nazirliyi Respublika Uşaq-Gənclər İnkişaf Mərkəzinin direktoru Firuzə Sultan-zadə, Mədəniyyət Nazirliyi Muzey işi və mədəni sərvətlərə nəzarət şöbəsinin müdiri Nərgiz Abdullayeva, Nizami Gəncəvi Beynəlxalq Mərkəzinin Himayəçilər Şurasının sədr müavini Rəfi Qurbanov, Gəncə şəhər Uşaq-Gənclər İnkişaf Mərkəzinin direktoru Sevinc Ələkbərova çıxış ediblər. Mayın 18-də beynəlxalq proqram çərçivəsində Gəncə şəhərində Nizami Gəncəvi adına muzeydən gənc bələdçi Xədicə Qasımova tərəfindən virtual ekskursiya təqdim edilib. Proqram çərçivəsində mayın 18-dən başlayaraq 26-dək hər gün Mədəniyyət Nazirliyinin tabeliyindəki Gəncə şəhər Nizami Gəncəvi adına muzeyə, Azərbaycan Xalça Muzeyinə, Milli İncəsənət Muzeyinə, Azərbaycan Musiqi Mədəniyyəti Dövlət Muzeyinə, Cəfər Cabbarlı adına Azərbaycan Dövlət Teatr Muzeyinə, AMEA-nın tabeliyində olan Nizami Gəncəvi adına Milli Azərbaycan Ədəbiyyati Muzeyinə, Milli Azərbaycan Tarixi Muzeyinə, Məhəmməd Füzuli adına Əlyazmalar İnstitutuna, xarici ölkələrin muzeylərindən isə ABŞ konqres kitabxanasına və Moskva Şərq Dövlət Muzeyinə virtual ekskursiyalar təşkil ediləcək. “Muzey həftəsi” COVID-19 pandemiyası ilə əlaqədar olaraq “Zoom” platforması üzərindən onlayn həyata keçiriləcək. Layihə çərçivəsində RUGİM-in ən fəal dərnək üzvü olan məktəblilər muzeylərdə Nizami irsinə aid olan eksponatlar haqqında topladıqları məlumatları onlayn bağlantı zamanı virtual ekskursiya kimi nümayiş etdirəcəklər. Qeyd edək ki, 18 may tarixi dünyanın 150-dən çox ölkəsində Beynəlxalq Muzeylər Günü (International Museum Day) kimi qeyd olunur. Bununla əlaqədar olaraq, 2015-ci ildən başlayaraq Təhsil Nazirliyi Respublika Uşaq-Gənclər İnkişaf Mərkəzi və YUNESKO üzrə Azərbaycan Respublikasının Milli Komissiyasının birgə təşəbbüsü ilə keçirilən “Məktəblilər üçün muzey həftəsi“ layihəsinə start verilib və onun əsasında yeni interaktiv təhsil proqramı yaradılıb. Proqram çərçivəsində hər il mayın 18-dən 26-dək bir həftə ərzində Bakı şəhəri və regionlarda fəaliyyət göstərən muzeyləri əhatə etməklə “Muzey həftəsi“ keçirilir. Beş il ərzində maarifləndirici “Muzeylər həftəsi” proqramı çərçivəsində Bakı şəhəri və regionlarda fəaliyyət göstərən muzeylərə 75000-ə yaxın şagirdin ekskursiyası təşkil edilib, onlayn platformada keçirilən proqramı 8000-ə yaxın məktəbli izləyib. ..

18.05.2021 15:35

Oljas Süleymenovun “Şərəf” ordeni ilə təltif edilməsi haqqında Azərbaycan Respublikası Prezidentinin SərəncamıAzərbaycan Respublikası Konstitusiyasının 109-cu maddəsinin 23-cü bəndini rəhbər tutaraq qərara alıram: Azərbaycan Respublikası və Qazaxıstan Respublikası arasında mədəni əlaqələrin inkişafına verdiyi töhfələrə görə Oljas Süleymenov “Şərəf” ordeni ilə təltif edilsin. İlham Əliyev Azərbaycan Respublikasının Prezidenti Bakı şəhəri, 18 may 2021-ci il ..

18.05.2021 14:40

Tatarıstanda Beynəlxalq Balet Festivalı Fikrət Əmirovun "1001 gecə" əsəri ilə açılıbKazan şəhərində keçirilən Rudolf Nureyev adına XXXIV Beynəlxalq Balet Festivalı görkəmli Azərbaycan bəstəkarı, SSRİ Xalq artisti Fikrət Əmirovun “Min bir gecə” baleti ilə açıq elan olunub. Rusiya Federasiyasının Əməkdar incəsənət xadimi, Mariinski Teatrının Primorsk səhnəsinin baş baletmeysteri, Rusiyanın Əməkdar incəsənət xadimi, həmyerlimiz Eldar Əliyevin quruluş verdiyi tamaşanın musiqi rəhbəri Azərbaycan Dövlət Akademik Opera və Balet Teatrının baş dirijoru, Azərbaycan Respublikasının Əməkdar artisti Eyyub Quliyev olub. Tamaşada Azərbaycan milli aləti olan tar, eləcə də milli zərb alətlərimizdən istifadə edilib. Qeyd edək ki, Rudolf Nureyev XXXIV Beynəlxalq Balet Festivalı 2021-ci il iyunun 2-dək davam edəcək. ..

18.05.2021 14:00

Beynəlxalq Muzeylər Günü münasibətilə videokonfrans keçirilibMayın 18-i dünyada Beynəlxalq Muzeylər Günü kimi qeyd olunur. Beynəlxalq Muzeylər Şurasının (İCOM) təşəbbüsü ilə 1977-ci ildə xalqlar arasında mədəni mübadilə və əməkdaşlığın inkişafına kömək məqsədilə təsis olunmuş əlamətdar gün hər il müxtəlif devizlər altında keçirilir. Bu il Beynəlxalq Muzeylər Gününün devizi “Muzeylərin gələcəyi: dirçəliş və yeni baxış”dır. Azərbaycan Milli Xalça Muzeyinin təşkilatçılığı ilə mayın 18-də Beynəlxalq Muzeylər Gününə həsr olunmuş videokonfrans keçirilib. Konfransda fərqli sənət sahələri üzrə mütəxəssislər, sağlamlıq imkanları məhdud şəxsləri birləşdirən ictimai təşkilatların rəhbərləri və Qarabağ muzeylərinin direktorları iştirak edib. Videokonfransda çıxış edən mədəniyyət nazirinin müavini Sevda Məmmədəliyeva muzey sahəsində çalışan, maddi mədəniyyət nümunələrimizin qorunmasında əvəzsiz xidmətləri olan bütün muzey işçilərinə nazir Anar Kərimovun təbriklərini çatdırıb, uğurlar arzulayıb. Qeyd olunub ki, builki Beynəlxalq Muzeylər Günü ölkəmiz üçün xüsusilə əlamətdardır: “Çünki artıq 18 mayı Laçın rayonunun işğal günü olaraq qeyd etmirik. Hazırda Qarabağımız, o cümlədən ölkəmizin dilbər guşələrindən olan Laçın rayonu düşməndən azad edilib”. Sevda Məmmədəliyeva düşmən üzərində qazandığımız möhtəşəm Qələbənin azad edilmiş torpaqlarımızda, o cümlədən Laçında fəaliyyət göstərəcək muzeylərin bərpa layihələrini hazırlamaq üçün böyük ilham verdiyini vurğulayıb. O, həmçinin 12-13 may tarixlərində Prezident İlham Əliyevin təşəbbüsü və Heydər Əliyev Fondunun təşkilatçılığı ilə ölkəmizin mədəniyyət paytaxtı Şuşada – Cıdır düzündə keçirilən möhtəşəm “Xarıbülbül” Musiqi Festivalının xalqımızı qürurlandırdığını diqqətə çatdırıb. Qeyd olunub ki, müzəffər Ali Baş Komandan İlham Əliyevin rəhbərliyi ilə qüdrətli Azərbaycan Ordusunun azad etdiyi Qarabağda vaxtilə mövcud olan muzeylərin və muzey filiallarının bərpası ilə əlaqədar hazırda nazirlikdə müvafiq işlər həyata keçirilir. Uzun illər erməni vandalizminə məruz qalan mədəniyyət məkanlarının bərpası ilə yanaşı, Qarabağda müasir tələblərə uyğun yeni muzeylər və digər mədəniyyət ocaqları da yaradılacaq. Düşməndən azad edilmiş ərazilərdə işğal muzeylərinin yaradılması da nəzərdə tutulur. Sevda Məmmədəliyeva çıxışının sonunda doğma məkanından uzaq düşən muzeylərimizin yaxın zamanda vətəninə qayıtması və muzeylərin zəngin kolleksiyasının öz yurdunda sərgilənməsi ilə bağlı muzey əməkdaşlarını gələcəkdə məsuliyyətli və qürurverici işlərin gözlədiyini diqqətə çatdırıb. Videokonfrans daha sonra iştirakçıların təqdimatları və fikir mübadiləsi ilə davam edib. ..

10.05.2021 13:13

İslam irsimizi tanıyaq: "Heydər məscidi" Mədəniyyət Nazirliyi “İslam irsimizi tanıyaq“ layihəsi çərçivəsində, bu müqəddəs Ramazan ayında və xalqımızın Ümummilli lideri Heydər Əliyevin doğum gününü qeyd etdiyimiz 10 may tarixində Qafqazın ən möhtəşəm ibadət ocağı olan “Heydər məscidi“ barədə qısa videoçarxı təqdim edir. İslam dini məzhəblərinin birgə ibadət etdiyi bu məscid kompleksi Prezident İlham Əliyevin təşəbbüsü ilə inşa edilərək 2014-cü ildə ictimaiyyətin istifadəsinə verilib. Məscidin fasadı Şirvan-Abşeron memarlıq üslubunda xüsusi daşlarla üzlənib. Məscid üzərində hündürlüyü 95 metr olan 4 minarə inşa olunub. 12.000 m² sahədə salınmış Heydər məscidinin daxili 4.200 m² sahəni əhatə edir. Məscidin 55 metr hündürlüyündə olan baş günbəzinin və 35 metr hündürlüyündə olan ikinci günbəzinin kənarlarına Quran ayələri yazılıb. ..

07.05.2021 20:41

Şuşadakı Qazançı kilsəsinin bərpası Azərbaycan dövlətinin öz mədəni irsinə, o cümlədən xristian irsinə diqqətini nümayiş etdirirMədəniyyət Nazirliyinin İnformasiya və ictimaiyyətlə əlaqələr şöbəsinin müdiri Məryəm Qafarzadə AZƏRTAC-a geniş müsahibə verib. Müsahibəni təqdim edirik. -Məryəm xanım, Azərbaycan dövləti işğaldan azad edilmiş ərazilərimizdə mənşəyindən asılı olmayaraq bütün dini mirasın və abidələrin yüksək səviyyədə qorunacağını və bərpa ediləcəyini bəyan edib. Şuşa şəhərindəki Qazançı kilsəsinin bərpa olunması da bu baxımdan xüsusi diqqət tələb edən məsələdir. Bu barədə nə deyə bilərsiniz? -Müstəqil Azərbaycan tarixinin ən parlaq dövrünü yaşayırıq. Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusu tərəfindən milli mədəniyyətimizin, tariximizin, dövlətçiliyimizin əsas dayaqlarından biri olan Qarabağ torpağı işğaldan azad edilərək, yenidən xalqımıza qovuşub. Doğma Şuşamızın mədəni ruhu da geri qayıdır, tarixi görkəmi bərpa edilir. Qarabağın tacı olan Şuşanın tariximizdə xüsusi yeri var. Türk dünyasının, İslam aləminin, bütün Qafqazın gözü, Azərbaycan mədəniyyətinin paytaxtı Şuşanın işğaldan azad olunması şanlı tariximizdə olduqca vacib hadisədir. Tarixi-mədəni əhəmiyyəti və Azərbaycan xalqı üçün müstəsna mənəvi dəyərə malik olması Şuşaya xüsusi qayğı və həssaslıqla yanaşılmasını zəruri edir. Məhz buna görə möhtərəm cənab Prezident Şuşanın Azərbaycanın mədəniyyət paytaxtı elan edilməsi ilə bağlı bu gün Sərəncam imzaladı. Bu Sərəncamla Şuşa şəhərinin tarixi görkəminin bərpası, əvvəlki şöhrətinin özünə qaytarılması və ənənəvi dolğun mədəni həyatına qovuşması, eləcə də Azərbaycanın çoxəsrlik zəngin mədəniyyətinin, memarlıq və şəhərsalma sənətinin parlaq incisi kimi beynəlxalq aləmdə təbliği təmin ediləcək. Bildiyiniz kimi, otuz ilə yaxın davam etmiş işğal dövründə işğalçı Ermənistanın vandalizminə məruz qalan Şuşada artıq bir neçə aydır quruculuq, bərpa işləri həyata keçirilir. Şəhərdəki məscidlər, mədrəsələr, imarətlər, karvansaralar, hamamlar, məqbərələr, kilsələr, kəhrizlər, muzeylər və digər mühüm abidələr yenidən həyata qaytarılır. Azərbaycan mədəniyyət tarixinin çox vacib örnəklərinin bərpa olunması şübhəsiz ki, öz tariximizə, mədəniyyətimizə, abidələrimizə sahib çıxmağımızın örnək nümunəsidir. İşğaldan azad olunan ərazilərimizdə Azərbaycan dövləti tərəfindən həyata keçirilən nəhəng yenidənqurma işləri, o cümlədən Şuşada aparılan bərpa və quruculuq prosesi şəhərin tarixi simasının bərpa edilməsi məqsədilə, Şuşanın orijinal memarlıq üslubuna uyğun olaraq gerçəkləşdirilir. Həyata keçirilən işlər çərçivəsində Qazançı kilsəsi də bərpa edilir. Qeyd edək ki, Qazançı kilsəsi Şuşa şəhərinin kənarında, hazırkı yuxarı hissəsində yerləşir. Kilsənin 1868-ci ildə qədim zərdüşt məbədi üzərində inşa olunmağa başlanıldığı bildirilir. Kilsənin inşası 1880-ci illərdə yekunlaşdırılıb. Kilsə quruluş baxımından 4 yarımdairəvi çıxışdan ibarətdir. Kilsənin daxili xüsusi memarlıq bəzəkləri olmadan, yonulmuş yerli daşlarla üzlənmişdir. Azərbaycan Respublikası Nazirlər Kabinetinin 2 avqust 2001-ci il tarixli 132 nömrəli Qərarı ilə dövlət qeydiyyatına alınan (inventar № 358) kilsə ilk dəfə Azərbaycan SSR Nazirlər Sovetinin 1988-ci il 27 aprel tarixli 145 nömrəli qərarı ilə abidələr siyahısına daxil edilib. Bütün digər tarix-mədəniyyət abidələrimiz kimi Qazançılar kilsəsinin də tarixi sənədlər, arxiv materialları əsasında ilkin bədii-estetik görkəminə uyğun olaraq bərpa edilməsi nəzərdə tutulur. Bu, elmi-praktiki-tədqiqat fəaliyyəti olmaqla abidənin hərtərəfli təhlilini, memarlıq, tarixilik xüsusiyyətlərinin araşdırılmasını ehtiva edir. Hazırlanacaq bərpa layihəsi abidənin XIX əsr ilkin-orijinal görkəminə qaytarılması imkanı verəcəkdir. Bundan əlavə, müvafiq layihə təcrübəli memar və bərpaçılardan ibarət mütəxəssislərdən təşkil olunan Elmi Şura tərəfindən müzakirə edilib təsdiqlənəcək. Həmçinin müvafiq sahədə geniş təcrübəsi olan və UNESCO-nun qəbul etdiyi beynəlxalq bərpa standartlarını bilən xarici mütəxəssislərin də bərpa layihəsi üzrə rəyinin alınması təmin olunur. Həmin xarici mütəxəssislərlə birlikdə bərpa işinin gedişatının monitorinq edilməsi də planlaşdırılır. Bu da onu göstərir ki, biz tarixi abidələrimizə sahib çıxmağı bacarırıq. Erməni vandalizminin, saxtakarlığının böyük yara vurduğu Azərbaycan abidələri bərpa edilərək öz tarixi görkəmlərinə, missiyalarına qaytarılmaqla canlanırlar. Qarabağda, Şuşada abidələrin bərpa prosesi dostlarımızı sevindirsə də, düşmənlərimizi içdən sarsıdıb. Şuşanın tarixi Qazançı kilsəsinin bərpa edilməsini həzm edə bilməyən işğalçı, terrorçu Ermənistan bizə qarşı şər-böhtan atır, cəfəng iddialar irəli sürməyə çalışır. Lakin bunlar hamısı əbəsdir və “Böyük qayıdış” çərçivəsində abidələrimiz bərpa olunduqca, tarixi-mədəni irsimiz azad olunmuş ərazilərə qaytarıldıqca Azərbaycan dövlətinin sülhə, inkişafa və tərəqqiyə yönəlmiş siyasəti öz təntənəsini yaşayacaq. -Düşmənin yürütdüyü mənfur siyasətə baxmayaraq, tarixi ədalət öz yerini tapdı. Əzəli Azərbaycan torpağı olan Qarabağda otuz il sürmüş barbarlıq dövründən sonra bu torpaqlara həyat, quruculuq, mədəniyyət qayıdır... -Tamamilə doğrudur. Doğma Qarabağımızın mədəni ruhu özünə qayıdır. Qarabağın hər qarış torpağı, abidələri, dahi şəxsiyyətləri bizim qədim, zəngin mədəniyyətimizin parlaq səhifələri, ayrılmaz parçasıdır. İndi mədəniyyətimiz də, illər boyu düşmən terroruna məruz qalan torpaqlarımız kimi, dirçəlməyə başlayıb. Artıq Azərbaycan övladları da qalib ruhda, məğrur böyüyəcəklər. Bu da təbii ki, Azərbaycan mədəniyyətinin, incəsənətinin gələcək inkişafına öz töhfəsini verəcək. Prezident İlham Əliyevin müvafiq sərəncam və göstərişləri əsasında mədəniyyət, musiqi beşiyimiz sayılan Şuşa şəhərində bir-birindən mühüm və maraqlı layihələrə start verilib. İllərlə həsrət qaldığımız, şuşalıların çiçəklərini qurudub, ən dəyərli xatirə kimi qoruduqları xarıbülbülə can gəlib. Bu fakt həm də Şuşada təşkil olunacaq Xarıbülbül festivalının timsalında bir daha öz sübutunu tapacaq. Dünya muzeylərini bəzəyən, tarixən ən varlı tacirlərin, kolleksiyaçıların böyük həvəslə əldə etməyə çalışdığı Qarabağ xalçaları ilmələrinin yurduna qayıdacaq. Qarabağın istedadlı xalçaçılarının əlinin hərarətindən doğulan sehrli naxışlar, ornamentlər yenə planetin hər nöqtəsini bəzəyəcək. Didərgin düşmüş Qarabağ atları yenə doğma Cıdır düzünə doğru yol alacaq. Qərinələr boyu bənzərsiz poeziya inciləri yaradıb, ədəbiyyatımızın yeni istiqamətlərinə təkan verən Vaqif yaradıcılığının davamçıları artıq misraları ilə Vətən həsrətini ovutmayacaq. Qarabağın gözəlliyini, Şuşanın dağlarını, mənfur düşmənin Vətənimizin darmadağın etdiyi hər daşını, qayasını vəsf edəcək. -Mədəniyyət Nazirliyinin keçirdiyi “Böyük Qayıdış” qısametrajlı bədii, sənədli və animasiya film layihələri müsabiqəsi yekunlaşıb. Bu barədə ətraflı məlumat verə bilərsinizmi? -Bu il yanvarın 22-də Mədəniyyət Nazirliyi “Böyük Qayıdış” qısametrajlı bədii, sənədli və animasiya film layihələri müsabiqəsi elan etmişdi. Müsabiqənin əsas məqsədi milli kinematoqrafiya sahəsində fəaliyyət göstərən yaradıcı şəxslərə dəstək olmaq, bu istiqamətdə çalışan dövlət studiyalarının və müstəqil prodüser mərkəzlərinin fəaliyyətini stimullaşdırmaq, milli-mənəvi və ümumbəşəri dəyərləri filmlərlə təbliğ etmək, kino peşəkarlarının təcrübələrini daha da yüksəltmək, habelə Vətən müharibəsində qazanılmış böyük Zəfərə kino vasitəsilə töhfə verməkdir. Müsabiqənin mövzusu 2020-ci ildə Vətən müharibəsində xalqımızın əldə etdiyi şanlı Qələbə, Azərbaycan əsgərinin, qüdrətli ordumuzun ölkəmizin ərazi bütövlüyü və suverenliyi uğrunda göstərdiyi qəhrəmanlıq mübarizəsi, yurd həsrəti ilə alışıb-yanan həmyerlilərimizin dədə-baba torpaqlarına qovuşması, habelə arxa cəbhədə dəmir yumruq kimi birləşən xalqımızın fəaliyyətini əhatə edirdi. Qeyd edim ki, müsabiqə böyük maraq doğurmuşdu. İlkin qəbul şərtlərinə cavab verən 49 layihə ikinci – Bədii seçim mərhələsində münsiflər tərəfindən dəyərləndirilib. Bu mərhələ bədii-kinematoqrafik baxımdan fərqlənən 26 layihə müsabiqənin münsiflər heyəti tərəfindən seçilərək, sonuncu – Pitçinq mərhələsində iştirak hüququ əldə edib. Onlardan 12-si bədii film, 8-i sənədli film, 6-sı animasiya filmi layihələri idi. Pitçinq mərhələsi aprelin 27-də Azərbaycan Dövlət Film Fondunda keçirilib və Fondun “YouTube” kanalı vasitəsilə canlı yayımlanıb. Münsiflər heyəti bütün layihələri bədii-kinematoqrafik keyfiyyətləri nəzərə alaraq qiymətləndirib. Münsiflərin açıq səsverməsi yolu ilə baş tutmuş prosesdə 11 layihə (5 bədii, 4 sənədli, 2 animasiya film layihələri) qalib seçilib. Həmin layihələrin adları aprelin 30-da Mədəniyyət Nazirliyinin rəsmi saytında elan edilib. Qalib layihələr onları təqdim etmiş müəssisə tərəfindən Mədəniyyət Nazirliyinin sifarişi və maliyyə dəstəyi əsasında istehsal olunacaq. -Məlumdur ki, “Azərbaycan Respublikasının işğaldan azad olunmuş ərazilərində müvəqqəti xüsusi idarəetmənin təşkili haqqında” dövlət başçısının fərmanına uyğun olaraq işğaldan azad olunmuş ərazilərdə Mədəniyyət Nazirliyinin nümayəndələri tərəfindən tarix və mədəniyyət obyektlərinin ilkin inventarlaşdırılması və mühafizəsi məqsədilə monitorinqlərə başlanılıb. Monitorinq prosesi necə gedir, hansı nəticələr var? -İndiyədək aparılmış monitorinqlər zamanı dövlət qeydiyyatında olan 313 tarix-mədəniyyət abidəsinin monitorinqi həyata keçirilib. Həmçinin həmin ərazilərdə yerləşən dövlət qeydiyyatında olmayan tarixi, memarlıq, arxeoloji əlamət daşıyan 113 obyekt (yeni aşkar olunmuş abidə) aşkar edilib. Baxış keçirilən tarix-mədəniyyət abidələrinin və tarixi, memarlıq, arxeoloji əlamət daşıyan obyektlərin əksəriyyətini işğalçılar tamamilə məhv ediblər. Həmin abidələrin dağıdıldığı, vandalizmə məruz qaldığı aşkarlanıb. Həmçinin 846 mədəniyyət müəssisəsi monitorinq edilib ki, onlardan 451-i kitabxana, 342-si mədəniyyət evi və klub müəssisəsi, 20-si muzey, 25-i uşaq musiqi məktəbi, 1-i kinoteatr, 2-si teatr, 2-si qalereya, 3-ü kinoklubdur. Bu müəssisələrdən 14-ü ilkin monitorinq nəticəsində aşkar edilsə də, nazirliyin şəbəkəsində yoxdur. Müəssisələrin hamısı demək olar ki, tamamilə dağıdılmış vəziyyətdədir. Monitorinqlər Şuşa, Cəbrayıl, Füzuli, Zəngilan, Xocavənd, Qubadlı, Ağdam və Kəlbəcər rayonları üzrə aparılıb. Baxış keçirilmiş tarix-mədəniyyət abidələrinin və tarixi, memarlıq, arxeoloji əlamət daşıyan obyektlərin əksəriyyətinə mənfur işğalçılar müdaxilələr etdiyi üzə çıxır. Onlar vandalizmə məruz qalıb, bir çoxları tamamilə dağıdılıb, yalnız qalıqları qalıb. Monitorinq davam edir və bu proses yekunlaşandan sonra erməni işğalı dövründə mədəniyyətimizə vurulmuş ziyanın tam mənzərəsini həm ölkə ictimaiyyətinin, həm də beynəlxalq ictimaiyyətin diqqətinə çatdıracağıq. -Geniş müsahibə üçün çox sağ olun. ..

07.05.2021 17:33

Mədəniyyət Nazirliyi “Səhnədən səngərə” layihəsini təqdim edirMüzəffər Ali Baş Komandanın rəhbərliyi altında dəmir yumruq olub işğalçını əzən, yurd yerlərimizi yağı tapdağından təmizləyib və səmamızı aydınladan Vətən övladlarının canı-qanı bahasına yazılan qəhrəmanlıq dastanı şanlı tariximizdir. Tarixi Zəfərlə başa çatan 44 günlük Vətən müharibəsində xalqımızın minlərlə övladı ilə bərabər mədəniyyət işçiləri də iştirak ediblər. Ölkəmizin ərazi bütövlüyü uğrunda şəhidlik zirvəsinə ucalanlar sırasında səkkiz nəfər mədəniyyət işçisi var. Azərbaycan Respublikası Mədəniyyət Nazirliyi 2020-ci ilin Vətən müharibəsində şəhid olmuş qəhrəman mədəniyyət işçilərinin xatirəsini əbədiləşdirmək məqsədilə “Səhnədən səngərə” layihəsinə start verir. Qeyd edək ki, layihə çərçivəsində şəhid mədəniyyət işçilərimiz haqqında videoçarxlar hazırlanacaq. Videomateriallarda onların yarımçıq qalan həyat yolu, sənət-peşə fəaliyyəti, döyüşlərdə göstərdiyi şücaət əks olunacaq. Beş dəqiqə müddətində nəzərdə tutulan hər bir videoçarxda şəhidlərin ailə üzvlərinin, yaxınlarının, iş yoldaşlarının, vaxtilə çalışdıqları tədris ocaqlarındakı şagirdlərinin ürək sözləri qısa müsahibələr şəkində təqdim olunacaq. Vətən torpaqlarının azadlığı, ölkəmizin ərazi bütövlüyü naminə canından keçmiş igidlərimizin əziz xatirəsi xalqımızın, o cümlədən mədəniyyət ictimaiyyətinin qəlbində əbədi yaşayacaq. ..

07.05.2021 11:58

Şuşa şəhərinin Azərbaycanın mədəniyyət paytaxtı elan edilməsi haqqında Azərbaycan Respublikası Prezidentinin SərəncamıŞuşa şəhəri tarixən Azərbaycanın tarixi-mədəni, ictimai-siyasi həyatının mühüm mərkəzlərindən biri olmuşdur. 1977-ci ildə xalqımızın Ümummilli Lideri Heydər Əliyevin təşəbbüsü ilə “Şuşa şəhərinin tarixi hissəsini tarix-memarlıq qoruğu elan etmək haqqında” qərar qəbul edilmişdir. Həmin qərar nəticəsində Şuşada abidələrin qorunması, görkəmli mədəniyyət və incəsənət xadimlərinin xatirələrinin əbədiləşdirilməsi istiqamətində əhəmiyyətli addımlar atılmışdır. Azərbaycana qarşı başladığı hərbi təcavüz nəticəsində Ermənistan Respublikası 1992-ci il mayın 8-də Şuşa şəhərini işğal etmiş və şəhərdə xalqımızın tarixi-mədəni irsinin məhv edilməsi siyasətini həyata keçirmişdir. Ordumuzun qətiyyətli mübarizəsi ilə tarixi ədalət bərpa edilmiş və 2020-ci il noyabrın 8-də Şuşa şəhəri işğaldan azad olunmuşdur. Şəhərə, onun tarixi-mədəni irsinə və təbiətinə vurulmuş zərərin təxirəsalınmadan inventarizasiyası aparılmış, bərpa işlərinə başlanılmışdır. Bərpa-quruculuq işlərinin təşkilində çevikliyi və səmərəliliyi təmin etmək üçün Şuşada dövlət idarəetməsinə də böyük diqqət yetirilmişdir. Azərbaycan Respublikası Prezidentinin işğaldan azad olunmuş ərazilərdə ilk xüsusi nümayəndəsi məhz Şuşa rayonuna təyin edilmişdir. Tarixi-mədəni əhəmiyyəti və Azərbaycan xalqı üçün müstəsna mənəvi dəyərə malik olması Şuşaya xüsusi qayğı və həssaslıqla yanaşılmasını zəruri edir. Bu baxımdan, Şuşada dövlət idarəetməsinin və hüquqi tənzimləmənin daha da təkmilləşdirilməsi şəhərdə tarixi-mədəni irsin bərpasına və qorunub saxlanmasına xidmət etməklə yanaşı, onun daim inkişafına şərait yaradacaqdır. Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq, Şuşa şəhərinin tarixi görkəminin bərpası, əvvəlki şöhrətinin özünə qaytarılması və ənənəvi dolğun mədəni həyatına qovuşması, eləcə də Azərbaycanın çoxəsrlik zəngin mədəniyyətinin, memarlıq və şəhərsalma sənətinin parlaq incisi kimi beynəlxalq aləmdə təbliği məqsədilə qərara alıram: 1. Şuşa şəhəri Azərbaycanın mədəniyyət paytaxtı elan edilsin. 2. Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin. İlham Əliyev Azərbaycan Respublikasının Prezidenti Bakı şəhəri, 7 may 2021-ci il ..

07.05.2021 10:03

Xalq artisti Arif Quliyev vəfat edibAzərbaycanın mədəniyyət ictimaiyyətinə ağır itki üz verib. Tanınmış teatr və kino aktyoru, Xalq artisti, Prezident təqaüdçüsü Arif Quliyev 2021-ci il mayın 7-də, ömrünün 71-ci ilində vəfat edib. Arif Əli oğlu Quliyev 1950-ci il mayın 16-da indiki Şirvan şəhərində anadan olub. 1965-1968-ci illərdə Bakı Mədəni-Maarif Texnikumunun Dram və kino aktyorluğu fakültəsində, 1973-1975-ci illərdə Azərbaycan Dövlət İncəsənət İnstitutunun (indiki ADMİU) Musiqili komediya aktyorluğu fakültəsində təhsil alıb. Əmək fəaliyyətinə 1965-ci ildə Mingəçevir Dövlət Dram Teatrında aktyor kimi başlayan Arif Quliyev 1975-ci ildə Musiqili Komediya Teatrına dəvət edilib. Bu teatrın səhnəsində müxtəlif xarakterli obrazlar yaradıb. Onun “Təzə gəlin”də (S.Dağlı, C.Cahangirov) Şərbətəli, “Gözün aydın”da (F.Əmirov, M.Əlizadə) Salyanski, “Durna”da (S.Rüstəmov, S.Rüstəmov) Dursun, “Gurultulu məhəbbət”də (S.Ələsgərov, S.Qədirzadə) Mürsəl, “Özümüz bilərik”də (Ş.Qurbanov, S.Ələsgərov) İbişov, “Hicran”da (S.Rəhman, E.Sabitoğlu) Dursunov, “Ev bizim, sirr bizim”də (Ş.Axundova, N.Gəncəli) Tofiq, “Məşədi İbad”da (Ü.Hacıbəyli) Hambal, “Durnalar qayıdanda” tamaşasında (Hidayət) Mirzəqulu, “Məhəbbət, şeytan və ağ ölüm”də (M.Haqverdiyev) Səbzəli və s. canlandırdığı obrazlar tamaşaçılar tərəfindən maraqla qarşılanıb. Aktyorun “Şans”, “Bığ əhvalatı”, “Qayınana”, “Lift əhvalatı”, “Yarım ştat”, “Evləri köndələn yar” və digər teletamaşalarda yaratdığı rollar da sənətkara böyük tamaşaçı rəğbəti qazandırıb. Arif Quliyevin “Bəyin oğurlanması”, “Yaramaz”, “Bəxt üzüyü”, “O dünyadan salam”, “Qəm pəncərəsi”, “Mənim ağ şəhərim”, “Alma almaya bənzər”, “Ağ gəmi” bədii filmlərindəki obrazları onun yaradıcılıq potensialının zənginliyini ifadə edir. Müxtəlif teatrlarda çalışan sənətkarın yaradıcılığı qiymətləndirilib, 1989-cu ildə “Əməkdar artist”, 1993-cü ildə “Xalq artisti” fəxri adlarına layiq görülüb. “Humay”, “Qızıl dərviş” mükafatları və “Sənətkar” medalı ilə təltif olunan aktyor Prezidentin fərdi təqaüdçüsü idi. Tanınmış aktyor, səmimi insan Arif Quliyevin əziz xatirəsi doğmalarının, sənət dostları və tamaşaçıların yaddaşında əbədi yaşayacaq. Allah rəhmət eləsin. ..

06.05.2021 15:36

Gənc istedadlar “Səhnədə” parlayacaq!Azərbaycan Respublikasının Gənclər Fondunun dəstəyi, Mədəniyyət Nazirliyi və “RÄNG” leyblın tərəfdaşlığı, “GəncSİMA” İctimai Birliyinin təşkilatçılığı ilə “Səhnədə” müsabiqəsi elan olunur. İstedadlı gənclərin Səhnədə parlayacağı müsabiqənin məqsədi paytaxt və regionlarda xüsusi istedada malik olan gənc ifaçıları aşkar etmək, onların qabiliyyətlərinin inkişafı və sənətdə öz yerini tapmasına dəstək göstərməkdir. Azərbaycan Dövlət Televiziyasında (AzTV) teleşou formatında yayımlanacaq müsabiqə vasitəsilə 16-25 yaş arasındakı gənclər özlərinin ifaçılıq sahəsində olan bacarıqlarını nümayiş etdirəcəklər. Müraciət etmək istəyən istedadlı gənclər www.gencistedad.az saytı vasitəsilə qeydiyyatdan keçə bilər. Daxil olan müraciətlərin dəyərləndirilməsindən sonra uğurlu hesab edilən iştirakçılar Bakı, Gəncə, Naxçıvan, Şəki, Quba, Lənkəran və Bərdə şəhərlərində keçiriləcək kastinqlərə dəvət olunacaqlar. Kastinqlər nəticəsində müəyyənləşən 10 finalçı Bakı şəhərində keçiriləcək möhtəşəm konsert proqramında iştirak edəcək və münsiflər heyəti tərəfindən qiymətləndiriləcək. Qalib olaraq seçilən 3 ifaçı “RÄNG” leyblı ilə birillik əməkdaşlıq müqaviləsi imzalamaq şansı əldə edəcək. Qeyd edək ki, müsabiqənin münsiflər heyəti ölkəmizin musiqi sahəsində tanınan və peşəkar simaları olan Sevda Ələkbərzadə, Pərviz İsaqov və digər ulduzlardan ibarətdir. Müraciət üçün son tarix 10 iyun 2021-ci ildir. Səhnədə ulduz olmaq vaxtıdır! ..

06.05.2021 12:15

Azərbaycan Milli Xalça Muzeyində “Ənənələrimizi yaşadanlar” Mayın 5-də Azərbaycan Milli Xalça Muzeyində “Xalçaçı günü” peşə bayramı münasibətilə “Ənənələrimizi yaşadanlar” adlı tədbir keçirildi. Tədbirdə Türkiyə və Mərakeş Krallığının ölkəmizdəki səfirləri Cahid Bağçı və Məhəmməd Adil Embarş, Milli Məclisin Mədəniyyət Komitəsinin sədri Qənirə Paşayeva, mədəniyyət nazirinin müavini Sevda Məmmədəliyeva və tanınmış mədəniyyət xadimləri iştirak edirdi. Tədbiri açan Milli Xalça Muzeyinin direktoru Şirin Məlikova əlamətdar gün münasibətilə xalçaçıları təbrik etdi. Təqdimatı keçirilən XVIII əsrə aid Qarabağ xalçası haqqında məlumat verən direktor dedi ki, bu xalça təkcə Milli Xalça Muzeyinin deyil, dünya muzeylərinin də yüksək dəyərləndirdiyi sənət əsəridir. *** Tədbirdə çıxış edən mədəniyyət nazirinin müavini Sevda Məmmədəliyeva ölkəmizdə xalça sənətinin qorunması və inkişafına töhfələr verən xalça ustalarına peşə bayramları münasibətilə nazir Anar Kərimovun təbriklərini çatdırdı. Bildirdi ki, xalça Azərbaycanın ən qiymətli mədəni irs nümunələrindən biridir. Azərbaycan xalça sənəti özündə xalqın mənəvi aləmini, estetik dünyagörüşünü, bədii istedadını əks etdirir. Xalça sənətinin inkişafına dövlət qayğısından söz açan Sevda Məmmədəliyeva vurğuladı ki, ölkəmizdə xalça sənətinin qorunmasına və inkişaf etdirilməsinə dövlət tərəfindən xüsusi diqqət göstərilir. Təsadüfi deyil ki, dünyada xalça sənəti üzrə ixtisaslaşmış ilk muzey də məhz Azərbaycanda yaradılıb. 2004-cü ildə “Azərbaycan xalça sənətinin qorunması və inkişaf etdirilməsi haqqında” Qanun qəbul olunub, həmçinin Prezident İlham Əliyevin sərəncamı ilə “Azərbaycan Respublikasında xalça sənətinin qorunmasına və inkişaf etdirilməsinə dair 2018-2022-ci illər üçün Dövlət Proqramı” təsdiq edilib. Dövlət Proqramının icrası ilə əlaqədar əhəmiyyətli işlər görülüb və bu sahədə fəaliyyət uğurla davam etdirilir. Mədəniyyət Nazirliyinin tabeliyində fəaliyyət göstərən muzeylərin fondlarının zənginləşdirilməsi məqsədilə xarici hərrac evləri, yarmarkalar, qalereya və şəxsi kolleksiyalarda olan sənət nümunələri mütəmadi olaraq izlənilir və müvafiq monitorinqlər aparılır. Dünya muzeylərində qorunan Azərbaycana aid maddi mədəniyyət nümunələrinə, xüsusilə xalçalara düzgün atribusiyaların verilməsi istiqamətində fəal işlər həyata keçirilir: “Xarici şəxsi kolleksiyaçıdan alınan və bu gün burada ilk dəfə nümayiş olunan XVIII əsrə aid nadir Qarabağ xalçası da Vətəninə qayıtmış növbəti xalçadır”. Ölkə başçısının 5 may 2016-cı il tarixli sərəncamı ilə “Azərxalça” Açıq Səhmdar Cəmiyyəti yaradılıb. Məhz bu tarix Prezidentin digər sərəncamına əsasən, “Xalçaçı günü” kimi qeyd edilir. Nazir müavini Azərbaycan xalçaçılığının beynəlxalq miqyasda təbliğində Birinci vitse-prezident Mehriban xanım Əliyevanın mühüm xidmətlərini xüsusi vurğuladı. Qeyd etdi ki, Mehriban xanımın təşəbbüsü ilə 2010-cu ildə Azərbaycan xalçaçılıq sənəti UNESCO-nun Qeyri-maddi mədəni irs siyahısına daxil edilib. Sevda Məmmədəliyeva çıxışının sonunda Ali Baş Komandan İlham Əliyevin rəhbərliyi ilə qüdrətli Azərbaycan Ordusunun azad etdiyi Qarabağda vaxtilə mövcud olan muzeylərin və muzey filiallarının bərpası ilə əlaqədar hazırda Mədəniyyət Nazirliyində mühüm işlərin həyata keçirildiyini vurğuladı: “Nəhayət ki, illərdir doğma məkanından uzaq düşən Azərbaycan Milli Xalça Muzeyinin Şuşa filialı da vətəninə qayıdacaq və xalçalar öz doğma yurdunda sərgilənəcək”. *** Milli Məclisin Mədəniyyət komitəsinin sədri Qənirə Paşayeva qeyd etdi ki, Azərbaycan Milli Xalça Muzeyi xalçaçılıq sənətinin qorunmasında və təbliğ edilməsində mühüm missiyanı həyata keçirir. Qədim xalçalarımızın xarici ölkələrdən Vətənimizə gətirilməsi istiqamətində diqqətəlayiq işlər görür: “Özəlliklə XVIII əsrə aid Qarabağ xalçasının ölkəmizə qaytarılması, bu hadisənin xüsusilə 44 günlük Vətən müharibəsində qazanılan Zəfərdən sonra sərgilənməsi sevindirici haldır. Prezident İlham Əliyev tərəfindən Şuşa şəhəri ölkəmizin mədəniyyət paytaxtı elan olunub. Yaxın zamanlarda Şuşada Azərbaycan Milli Xalça Muzeyinin filialı açılacaq və Qarabağ xalçaları öz evinə qayıdacaq”. Qənirə Paşayeva Xalça Muzeyi tərəfindən fiziki imkanları məhdud insanlar üçün hazırlanmış layihədən söz açdı. Dedi ki, bu layihə sayəsində görmə məhdudiyyətli insanlar da xalçalara toxunaraq onları hiss edə bilirlər. Tanınmış xalçaçı, Əməkdar mədəniyyət işçisi Zəhra Əliyeva dövlət tərəfindən xalçaçılıq sənətinə göstərilən qayğıdan danışdı. O, bu sənət üzrə çalışdığı üçün qürur hissi keçirdiyini vurğuladı. Daha sonra 5 may – “Xalçaçı günü” peşə bayramı münasibətilə xalça sənətinin inkişafına verdiyi töhfəyə görə mədəniyyət nazirinin müvafiq əmri ilə bir qrup xalçaçı-rəssam və toxucu nazirliyin fəxri fərmanı ilə təltif edildi. Sonda “Nizami Gəncəvi İli” ilə əlaqədar muzeydə toxunan “Bəhram Gur və Dürsəti” xalçasının kəsimi oldu. Əməkdar rəssam Taryer Bəşirovun müəllifi olduğu xalça dahi Nizami Gəncəvinin “Yeddi gözəl” poemasına həsr edilib. Xalçanın toxucuları Əminə Əliyeva və Təranə Qasımovadır. ..

05.05.2021 17:26

Xalq şairi Fikrət QocaAzərbaycan ədəbi ictimaiyyətinə ağır itki üz vermişdir. Müasir Azərbaycan ədəbiyyatının görkəmli nümayəndəsi, Azərbaycan Yazıçılar Birliyinin birinci katibi, Dövlət mükafatı laureatı, Azərbaycan Respublikası Prezidentinin fərdi təqaüdçüsü, Xalq şairi Fikrət Qoca (Fikrət Göyüş oğlu Qocayev) 2021-ci il mayın 5-də ömrünün 86-cı ilində vəfat etmişdir. Fikrət Qoca 1935-ci il avqustun 25-də Ağdaş rayonunun Kotanarx kəndində anadan olmuşdur. O, Ağdaş şəhərində orta məktəbi bitirmiş, 1953–1957-ci illərdə Bakı dəmir yolu texnikumunda oxumuş və 1957–1959-cu illərdə Bakı şəhərində tikinti idarəsində işləmişdir. Ədəbi yaradıcılığa gənc yaşlarından meyil göstərən Fikrət Qoca 1959–1964-cü illərdə Moskvada Maksim Qorki adına Ədəbiyyat İnstitutunda təhsil almış, Bakıya qayıtdıqdan sonra 1964–1965-ci illərdə Azərbaycan Dövlət Radio və Televiziya Verilişləri Komitəsində redaktor, 1967–1970-ci illərdə “Azərbaycan gəncləri” qəzeti redaksiyasında ədəbi işçi, 1970–1975-ci illərdə Azərbaycan Yazıçılar İttifaqında məsul katib, 1978–1987-ci illərdə “Azərbaycan” jurnalında şöbə müdiri və 1987–2004-cü illərdə “Qobustan” incəsənət toplusunun baş redaktoru vəzifələrində çalışmışdır. O, 1998-ci ildən Azərbaycan Yazıçılar Birliyinin katibi, 2004-cü ildən birinci katibi olmuşdur. Fikrət Qoca Azərbaycan ədəbi mühitinə yeni ab-hava gətirən sənətkarlardandır. Şair dərin ictimai məzmunlu yaradıcılığı ilə müasir poeziyamızın mövzu dairəsinə, poetik forma və ifadə tərzinə özünəməxsus çalarlar qazandırmış, mühüm hadisələr və cəmiyyətdəki mənəvi-ictimai proseslər fonunda insanın daxili aləminin dolğun təsvirinə nail olmuşdur. Mənəvi ucalığa və mənalı yaşamağa səsləyən, insan və zaman haqqında lirik-fəlsəfi ümumiləşdirmələrlə zəngin əsərləri Fikrət Qocanı geniş oxucu kütləsinə sevdirmişdir. Şairin bədii tərcümələri sayəsində Azərbaycan oxucusu dünya poeziyasının dəyərli nümunələri ilə yaxından tanış olmaq imkanı əldə etmişdir. Fikrət Qocanın sözlərinə bəstələnmiş mahnılar tanınmış müğənnilərin repertuarında geniş yer tutur. Fikrət Qoca istiqlal ideyalarının tərənnümünü həmişə diqqət mərkəzində saxlamışdır. Onun xalqımızın azadlıq mübarizəsindən bəhs edən əsərlərinin gənc nəslə vətənpərvərlik ruhunun aşılanmasında əhəmiyyətli rolu vardır. Fikrət Qocanın uzunmüddətli səmərəli yaradıcılıq fəaliyyəti yüksək qiymətləndirilmişdir. O, “Əməkdar incəsənət xadimi” və “Xalq şairi” fəxri adlarını almış, Azərbaycan Respublikasının ali dövlət təltiflərindən olan “Şöhrət”, “Şərəf” və “İstiqlal” ordenlərinə, Dövlət mükafatına və “Azərbaycan Respublikası Prezidentinin fəxri diplomu”na layiq görülmüşdür. Görkəmli şair, qayğıkeş və səmimi insan Fikrət Qocanın xatirəsi onu tanıyanların qəlbində həmişə yaşayacaqdır. Allah rəhmət eləsin! İlham Əliyev Mehriban Əliyeva Əli Əsədov Sahibə Qafarova Samir Nuriyev Eldar Əzizov Fərəh Əliyeva Anar Kərimov Anar Rzayev Çingiz Abdullayev Nəriman Həsənzadə Elçin Əfəndiyev Sabir Rüstəmxanlı Rəşad Məcid ..

05.05.2021 14:56

İNTERACT Online ikinci mövsümü ilə qayıdır!Bu mövsüm SSENARİ mövzusuna fokuslanıb. Ssenari sənətinin ən xırda incəliklərini öyrənmək, məhşur kinematoqrafçılardan dəyərli tövsiyələr alıb, öz ssenarini peşəkarlar tyutorla formalaşdırmaq istəyirsənsə - bu mövsüm sənin üçündür! İNTERACT Online haqqında qısa xatırlatma: İNTERACT Online proqramının əsası 2020-ci ildə Azərbaycan Respublikası Mədəniyyət Nazirliyinin dəstəyi ilə “Debüt” Film Studiyası tərəfindən qoyulub. Bu, İNTERACT LAB tədris layihəsinin çərçivəsində həyata keçirilən onlayn tədris və təlim proqramıdır. İNTERACT ONLINE elektron platforması gənc kinematoqrafçılara tanınmış beynəlxalq peşəkarlarla onlayn master-klasslar və vorkşoplar vasitəsilə məlumat mübadiləsi imkanını təklif edir. Bu mövsümdə iştirakçıları hansı yeniliklər gözləyir? Proqram 3 mərhələdən (may, iyul və oktyabr ayları) ibarətdir. Proqrama Oskar, Kann, BAFTA və Emmi mükafatlı filmmeykerlərin keçirəcəyi master klasslarla yanaşı, peşəkar tyutor tərəfindən keçirilən ssenari üzrə vorkşop da əlavə olunub. Vorkşopu keçirəcək tyutor Gülengül Altıntaş Münxen Lüdviq-Maksimillian Universitetində (Almaniya) magistrlər üçün ssenari yazılması dərsini tədris edir. ABŞ-da – Kaliforniya Los Anceles Universitetində (UCLA) “Əyləncəvi media üçün kontentin yaradılması“ sertifikasiya proqramında, Nyu York Tiş incəsənət məktəbi (New York Tisch School of the Arts) və Macarıstan Film Akademiyasının ssenari yazılması üzrə vorkşoplarında iştirak edib. Vorkşop 3 mərhələdən ibarətdir. Seçilmiş iştirakçılar öz qısametrajlı film ideyası, mövcüd olan loqlayn və qısa sinopsislə qatılacaqlar. Hər mərhələdə ideyalarını inkişaf etdirərək, vorkşopun sonunda ssenarilərini formalaşdıracaqlar. May ayında keçəcək ilk mərhələdə master klass keçəcək qonağımız Oskar, Kann və BAFTA mükafatlı ssenarist Kristofer Hempton olacaq. Dünyanın ən önəmli dramaturqlarından biri olan Hemptonun filmoqrafiyasında “Ali and Nino”, “Dangerous Liaisons”, “Atonement”, “Father” və özünün həm də rejissoru olduğu “Carrington” kimi filmlər var. Onun “Father” filmi 2021-ci ilin Oskar mükafatına namizəddir. İyul ayında ikinci mərhələnin qonağı Kann kinofestivalında “Ən yaxşı qısametrajlı film” nominasiyası üzrə “Qızıl palma budağı” mükafatını qazanan Sameh Alaa olacaq. Qahirədən Parisə, oradan isə Kanna gedən uğur yolu onu master klass üçün ideal rejissora çevirir. Oktyabrda keçiriləcək son master klassın qonağı Oskar mükafatına namizəd olan və Emmi mükafatını qazanan Henri Hyuz olacaq. “Day One” və “Terp” filmləri ilə ən çox tanınan bir ssenarist və rejissordur. “Outpost” filmində isə prodüser və aktyor kimi çıxış edib. Henri Hyuz ssenari sənəti ilə bağlı öz təcrübəsini bölüşəcək. Proqrama necə qatılmaq olar? Master klasslara qatılmaq ödənişsiz və sərbəstdir. İştirakçı limiti yoxdur. Qeydiyyat formasını doldurmaqla master klasslara qatıla bilərsiniz. Vorkşopa qatılmaq üçün loqlayn və sinopsisdən ibarət olan yazılı ideya tələb olunur. Nümunə şəklində yazdığınız hazır ssenarilər (və ya hekayə, pyes, şeir) də əlavə olunmalıdır. Vorkşopa qatılacaq iştirakçı limiti 10 nəfərdir. Müraciətlər cari ilin 10 may tarixinədək qəbul olunur. İlk mərhələ 13 may 2021-ci il tarixində Kristofer Hemptonun master klassı ilə başlayacaq. Mayın 14, 15, 16-da isə vorkşopun ilk mərhələsi keçiriləcək. Ssenari bacarıqlarını təkmilləşdir, ideyadan ssenariyə aparan yolu bizimlə bir keç! Qeydiyyat üçün keçid al: https://debutfilms.az/interact “Debüt” film studiyası 1987-ci ildə Azərbaycan Respublikasının Xalq artisti, rejissor Eldar Quliyev tərəfindən əsası qoyulmuşdur. Azərbaycan Respublikası Mədəniyyət Nazirliyinin nəzdində yerləşən “Debüt” film studiyası qısa və tammetrajlı debüt filmlərinin çəkilişi, həmçinin kinematoqrafçılar üçün təhsil proqramları və Azərbaycan istehsalı olan audiovizual məhsulların beynəlxalq bazarda təbliğini reallaşdırır. Studiya haqqında daha ətraflı: http://debutfilms.az/ Həmçinin sosial mediada: İnstagram: https://www.instagram.com/debutfilms/ Telegram: https://t.me/debutfilms Facebook: https://www.facebook.com/debutfilms.az/ Twitter: https://twitter.com/debutfilms ..

04.05.2021 16:23

“Xalçalarımız: dünənimiz, bu günümüz, sabahımız” mövzusunda videokonfrans keçirildiMayın 4-də Mədəniyyət Nazirliyi, Milli Xalça Muzeyi, “Azərxalça” ASC və Gəncə Regional Mədəniyyət İdarəsi Samux rayon Heydər Əliyev Mərkəzinin birgə təşkilatçılığı ilə “Xalçalarımız: dünənimiz, bu günümüz, sabahımız” mövzusunda videokonfrans keçirildi. Konfrans 5 may Xalçaçı günü peşə bayramı münasibətilə gerçəkləşdi. Videokonfransda çıxış edən mədəniyyət nazirinin müavini Sevda Məmmədəliyeva ölkəmizdə xalça sənətinin qorunması və inkişafına töhfələr verən xalça ustalarını peşə bayramları münasibətilə təbrik etdi. Bildirdi ki, maddi və mənəvi sərvətimiz olan xalçaçılıq sənəti Tunc dövründən başlayaraq bu günümüzə gəlib çatıb. Bu gün Azərbaycan xalçalarının sorağı dünyanın müxtəlif muzeylərindən gəlir. Xalça sənətinin inkişafına dövlət qayğısından söz açan Sevda Məmmədəliyeva vurğuladı ki, 2004-cü ildə “Azərbaycanda xalça sənətinin qorunması və inkişaf etdirilməsi haqqında” Qanun qəbul olunub, həmçinin Prezident İlham Əliyevin sərəncamı ilə “Azərbaycan Respublikasında xalça sənətinin qorunmasına və inkişaf etdirilməsinə dair 2018-2022-ci illər üçün Dövlət Proqramı”nın təsdiq edilib. Dövlət başçısının 5 may 2016-cı ildə imzaladığı sərəncama əsasən, “Azərxalça” Açıq Səhmdar Cəmiyyəti yaradılıb. Artıq beşinci ildir ki, həmin tarix “Xalçaçı günü” kimi qeyd edilir. Nazir müavini bildirdi ki, Azərbaycan xalçaçılığının beynəlxalq miqyasda təbliğində Birinci vitse-prezident Mehriban xanım Əliyevanın mühüm xidmətləri var. Mehriban xanımın təşəbbüsü ilə 2010-cu ilin noyabr ayında UNESCO-nun Qeyri-Maddi Mədəni İrs üzrə Hökumətlərarası Komitəsinin V sessiyasında Azərbaycan xalçaçılıq sənəti UNESCO-nun Qeyri-maddi mədəni irs üzrə reprezentativ siyahısına daxil edilib: “Bu gün regionlarda fəaliyyət göstərən Heydər Əliyev mərkəzlərində müxtəlif dərnəklər açılır, toxuma kursları təşkil edilir. Kurslarda iştirak edən xalça həvəskarları bir-birindən gözəl nümunələr yaradırlar”. Sevda Məmmədəliyeva çıxışının sonunda ümidvar olduğunu bildirdi ki, yaxın zamanda Xalça Muzeyinin Şuşa filialı yenidən bərpa ediləcək və Qarabağ xalçaları doğma yurdunda sərgilənəcək. “Azərxalça” ASC İdarə Heyətinin sədri Emin Məmmədov bildirdi ki, “Azərxalça”nın 21 filialında 1200-dən çox işçi çalışır. O, əlavə etdi ki, son zamanlar orijinal xalçalarla bərabər, saxta xalçalar da yayılır: “Bizim əsas məqsədlərimizdən biri onların qarşısını almaqdır. Bunun üçün hamımız əl-ələ verib xalçaçılıq sənətimizi qoruyaraq gələcək nəsillərə ötürməliyik”. Gəncə Regional Mədəniyyət İdarəsinin rəisi Vasif Cənnətov qeyd etdi ki, ölkəmizdə heç bir evi xalçasız təsəvvür etmək mümkün deyil. Xalça xalqımızın məişətində təkcə qiymətli əşya deyil, ona həm də sənət əsəri kimi yanaşılır. Azərbaycan Milli Xalça Muzeyinin direktoru Şirin Məlikova bu gün ölkəmizdə xalçaçılıq sənətinin çiçəklənmə dövrünü yaşadığını dedi: “Həm qədim xalçalarımız, həm də müasir rəssamların ərsəyə gətirdikləri xalçalar dünyanın müxtəlif muzeylərində saxlanılır”. Şirin Məlikova muzeyin fəaliyyəti, həmçinin kompleksdə saxlanılan nadir xalçalar haqqında da məlumat verdi. Bildirdi ki, Azərbaycanın müxtəlif bölgələrində aparılan çoxsaylı elmi tədqiqat ekspedisiyalarının nəticəsi olaraq muzeyin fondu ölkənin maddi mədəni sərvətləri ilə zənginləşib. Azərbaycan Dövlət Rəssamlıq Akademiyasının professoru, Əməkdar rəssam Məmmədhüseyn Hüseynov xalça sənətinin inkişafı istiqamətində görülən işlərdən danışdı: “Xalçalardakı naxış sistemləri ağılın, onların üzərində işlənilən ornamentlər, rənglər isə ürəyin simvoludur. Xalçaçılıq, sadəcə, mədəniyyət tariximizin deyil, bütövlükdə ölkəmizin tarixinin öyrənilməsi üçün zəngin bir xəzinədir. Bu xəzinəni qoruyub gələcək nəsillərə ötürmək isə hər kəsin borcudur”. Daha sonra Lənkəran, Quba, Qazax, Xaçmaz, Gəncə, Oğuz, Zərdab, Tərtər, Yevlax, Şabran və Samux rayonunda fəaliyyət göstərən Heydər Əliyev mərkəzlərinin direktorları çıxış edərək xalçaçılığın mövcud vəziyyəti barədə məlumat verdilər. Sonda ölkəmizdə xalçaçılığın inkişafı ilə bağlı fikir mübadiləsi aparıldı. ..

04.05.2021 15:29

“Mədəniyyət/Culture” jurnalı mart-aprel nömrəsi ilə oxucuların görüşünə gəlibNəşrin bu sayında Zəfərli Novruz əhval-ruhiyyəsi üz qabığından başlayaraq bütün səhifələrdə özünü göstərir. Azərbaycan Prezidentinin Şuşadan – Cıdır düzündən xalqımıza bayram müraciəti ilə açılan jurnalın materialları mədəniyyət nazirinin Novruz təbriki və daha sonra nazirliyin Vətən müharibəsindən sonrakı dövrdə fəaliyyətini əks etdirən ən vacib xəbərlərlə davam edir. Nazirliyin keçirdiyi vətənpərvərlik mövzusunda müsabiqənin qalibi Akif Azalpın müəllifi olduğu “Şəhid türküsü” şeiri şəhidlərimizin müqəddəs ruhuna ehtiram kimi səslənir. Jurnalın yeni sayında Mədəniyyət Nazirliyinin “Nizami ili”nə töhfələrindən də söz açılır. “Nizami və Nəvai” məqaləsi redaksiyanın bu ilə töhfəsidir . “Mədəniyyətdən əbədiyyətə...” yazısı Vətən müharibəsinin şəhidi, Qobustan Uşaq incəsənət məktəbinin müəllimi Rauf Əliyevə, “Səhnədən hərb meydanına...“ isə Bakı Uşaq və Gənclər Teatrının aktyorları Qurban Əhmədov və Röyal Allahverdiyev, Akademik Opera və Balet Teatrının əməkdaşı Altun Qaracayevə həsr olunub. “İçərişəhərin şəhid Fəridi” adlı məqalədə Vətən uğrunda canından keçən igidimiz Fərid Əliyevin ömür və döyüş yolundan danışılır. Nəşrdə həmçinin Xalq şairi Nəriman Həsənzadənin 90 illiyi münasibətilə ilə yubilyarla səmimi söhbət (“İnsanlıqda şair, şairlikdə insan”), nakam şairimiz Əli Kərimin yaradıcılığı haqqında yazı, “Rəngkarlıq” rubrikasında monumentalçı rəssam Oqtay Şıxəliyevin zəngin irsinə nəzər, “Musiqi” rubrikasında üzdəniraq qonşularımızın bizdən oğurladıqları təsniflərin tarixçəsi, “Teatr” rubrikasında professor İlham Rəhimlinin “Bitdi qürbət həsrəti” (Ağdam teatrının yurda dönüşü) və başqa maraqlı yazılar dərc olunub. Türkiyədə yaşayan jurnalist soydaşımız İbrahim Nəbioğlunun “Düşüncələr”i, konyalı həmyerlimiz Aynur Elxan Nayir haqqında “Uzaqdakı yaxınlar” və s yazılar da jurnalda yer alıb. Nəşrin bu sayında da mədəni irsimizin ən vacib mövzusu Qarabağ, onun mədəni irsi, abidələri , təbiəti, turizm potensialı və möhtəşəm Zəfərimizdir. “Elm” rubrikasında, hər zaman olduğu kimi, müxtəlif mövzularda tədqiqatlar diqqətə çatdırılır. ..

04.05.2021 12:00

Azərbaycanlı bəstəkarın əsəri Vyanada işıq üzü görmüş CD alboma daxil edilibİstedadlı bəstəkar, Jazeps Vitols Latviya Musiqi Akademiyasının məzunu, Azərbaycan Bəstəkarlar İttifaqının üzvü, Prezident mükafatçısı Ayaz Qəmbərlinin “Mirage” (İlğım) adlı əsəri dünyaca məşhur bəstəkarların əsərləri ilə birgə Vyana Musiqi və İfaçılıq Mədəniyyəti Universiteti tərəfindən hazırlanan CD alboma daxil edilib. Qeyd edək ki, adıçəkilən CD kommersiya məqsədi daşımır. Bu albomun məqsədi dünya xalqlarının musiqisini bir-birinə tanıtmaqdır. Bəstəkarın “Mirage” (İlğım) adlı əsəri 2019-cu ildə Avstriyanın Vyana şəhərində keçirilən bəstəkarların Mauricio Kagel beynəlxalq müsabiqəsində birinci yerə layiq görülüb. ..

03.05.2021 12:02

Mədəniyyət Nazirliyi sistemində kadr təyinatlarıAzərbaycan Respublikasının mədəniyyət naziri Anar Kərimovun müvafiq əmri ilə Bəxtiyar Vaqif oğlu Qılıncov Masallı Regional Mədəniyyət İdarəsinin rəisi vəzifəsinə təyin edilib. Bəxtiyar Qılıncov 1974-cü ildə Tovuz rayonunda anadan olub. 1998-ci ildə Bakı Əmtəəşünaslıq Kommersiya İnstitutunu (bakalavr), 2000-ci ildə Azərbaycan Dövlət Universitetini (magistr) bitirib. 1999-cu ildən Azərbaycan Respublikası Nazirlər Kabineti yanında xarici turizm şurasında statistik üzrə mütəxəssis kimi fəaliyyət göstərib. 2001-2018-ci illərdə Gənclər, İdman və Turizm, Mədəniyyət və Turizm nazirliklərində müxtəlif vəzifələrdə çalışıb. 2018-ci ildən son təyinatadək Mədəniyyət Nazirliyinin Regional siyasət şöbəsində işləyib. İqtisad üzrə fəlsəfə doktorudur. 2017-ci ildə Azərbaycan Respublikası Prezidentinin müvafiq sərəncamına əsasən “Dövlət qulluğunda fərqlənməyə görə” medalı ilə təltif olunub. *** Nazir Anar Kərimovun digər əmrinə əsasən Lənkəran Regional Mədəniyyət İdarəsinin rəisi vəzifəsinə Şahin Yusif oğlu Şahbazov təyin olunub. Şahin Şahbazov 1984-cü ildə anadan olub. 2006-cı ildə “Muzey işi və abidələrin mühafizəsi” ixtisası üzrə Azərbaycan Dövlət Mədəniyyət və İncəsənət Universitetini (bakalavr), 2008-ci ildə Bakı Dövlət Universitetinin (magistr) “Tarix” fakültəsini fərqlənmə diplomları ilə bitirib. Əmək fəaliyyətinə 2004-cü ildə Qobustan Milli Tarix-Bədii Qoruğunda başlayıb. 2013-2021-ci illərdə Mədəniyyət Nazirliyində müxtəlif vəzifələrdə çalışıb. 2012-2018-ci illərdə AMEA-nın Arxeologiya və Etnoqrafiya İnstitutunun doktorantı olub. 2019-cu ildən, həmçinin Xəzər Universitetində pedaqoji fəaliyyət göstərib. Dörd elmi məqalənin müəllifi, bir neçə kitabın redaktoru və tərtibatçısıdır. Beynəlxalq Muzeylər Şurasının (İCOM) üzvüdür. ..

30.04.2021 12:37

“Böyük Qayıdış” qısametrajlı bədii, sənədli və animasiya film layihələri müsabiqəsinin qalibləri müəyyən olunubAzərbaycan Respublikasının Mədəniyyət Nazirliyi tərəfindən elan olunmuş “Böyük Qayıdış” qısametrajlı bədii, sənədli və animasiya film layihələri müsabiqəsinin sonuncu – Pitçinq mərhələsi cari ilin aprel ayının 27-də Azərbaycan Dövlət Film Fondunda keçirilmiş və şəfaflığın qorunması məqsədi ilə Pitçinq Dövlət Film Fondunun rəsmi “YouTube” kanalı vasitəsilə canlı yayımlanmışdır. Milli kinematoqrafiya sahəsində fəaliyyət göstərən yaradıcı şəxslərə dəstək olmaq, bu istiqamətdə çalışan dövlət studiyalarının və müstəqil prodüser mərkəzlərinin fəaliyyətini stimullaşdırmaq, habelə Vətən müharibəsində qazanılmış Böyük Zəfərə kino vasitəsilə töhfə vermək məqsədilə elan olunmuş müsabiqənin Pitçinq mərhələsində iştirak hüququ qazanan 26 layihə Münsiflər heyəti tərəfindən bədii-kinematoqrafik keyfiyyətləri nəzərə alınaraq qiymətləndirilmişdir. Seçim prosesi münsiflərin açıq səsverməsi yolu ilə həyata keçirilmiş, 7 münsifdən 2-si bitərəf qalmış, 5-nin səs çoxluğu ilə aşağıdakı 11 layihə qalib seçilmişdir: BƏDİİ FİLMLƏR № Təqdim edən şirkət Layihənin adı 1 “İnteraz Media and Broadcasting” MMC “Tanrının nəbzi” 2 “Mozalan” studiyası MMC “İkinci planetin qırmızı rəngi” 3 “Karvan production” MMC “Arxa cəbhə” 4 “Debüt” studiyası “İki gün” 5 “Ultra Production” MMC “Hasar” SƏNƏDLİ FİLMLƏR № Təqdim edən şirkət Layihənin adı 1 C.Cabbarlı adına “Azərbaycanfilm” kinostudiyası “Fulya” 2 C.Cabbarlı adına “Azərbaycanfilm” kinostudiyası “Müharibənin uşaqları” 3 “Balans” MMC “Çin olan gizlinlər” 4 “Debüt” studiyası “Evimin səsi” ANİMASİYA FİLMLƏRİ № Təqdim edən şirkət Layihənin adı 1 “Birlik kinostudiyası” MMC “Qarabağ nağılı” 2 “OB Film” MMC “Tarix” Qeyd edək ki, müsabiqənin Pitçinq prosesini aşağıdakı linkdən izləmək olar: https://www.youtube.com/watch?v=5Kd0ddaBxsc ..

28.04.2021 12:00

Vətən müharibəsindəki şanlı Qələbəmizə həsr olunan bəstəkarlıq müsabiqəsi elan edilirAzərbaycan Respublikasının Mədəniyyət Nazirliyi, Azərbaycan Bəstəkarlar İttifaqı və Ü.Hacıbəyli adına Bakı Musiqi Akademiyasının birgə təşkilatçılığı ilə 44 günlük Vətən müharibəsindəki şanlı Qələbəmizə həsr olunmuş bəstəkarlıq müsabiqəsi elan olunur. Müsabiqə 2021-ci ilin 1 may-1 oktyabr tarixində keçiriləcəkdir. Simfonik əsər kateqoriyası üzrə keçirilən müsabiqədə yaşı 25-dən 35-ə qədər olan peşəkar bəstəkarlıq təhsili almış musiqiçilər iştirak edə bilər. İştirakçıları münsiflər heyətinin üzvləri – Firəngiz Əlizadə (Xalq artisti, Azərbaycan Bəstəkarlar İttifaqının sədri), Aydın Əzimov (Əməkdar incəsənət xadimi, Ü.Hacıbəyli adına Bakı Musiqi Akademiyasının professoru), Fəxrəddin Kərimov (Xalq artisti, Q.Qarayev adına Azərbaycan Dövlət Kamera Orkestrinin bədii rəhbəri və baş dirijoru), Həcər Babayeva (Əməkdar incəsənət xadimi, Ü.Hacıbəyli adına Bakı Musiqi Akademiyasının professoru) və Ayaz Qəmbərli (Bülbül adına Orta İxtisas Musiqi Məktəbinin müəllimi, bəstəkar) qiymətləndirəcəklər. Əsərlərin müzakirəsi qapalı şəraitdə keçiriləcək. Müsabiqənin qalibləri barədə məlumatlar əsas mərhələ başa çatdıqdan sonra 15 oktyabr 2021-ci il tarixində Mədəniyyət Nazirliyinin rəsmi saytında (mct.gov.az) yayımlanacaq. Qalib olmuş müəlliflərin əsərlərinin 8 noyabr 2021-ci il tarixində Azərbaycan Dövlət Akademik Filarmoniyasında keçiriləcək “Qələbə” konsertində səsləndirilməsi nəzərdə tutulur. Müsabiqənin əsasnaməsi Qeydiyyat forması ..

27.04.2021 15:14

Mədəniyyət Nazirliyi “İslam irsimizi tanıyaq” layihəsini təqdim edir Azərbaycan Respublikasının Mədəniyyət Nazirliyi müqəddəs Ramazan ayında “İslam irsimizi tanıyaq” layihəsinə start verir. Layihə çərçivəsində İslam mədəniyyəti abidələri (İslam memarlığının nümunələri olan məscidlər, türbələr, xanəgahlar, karvansaralar və s.) barədə qısa videoçarxların hazırlanması, nazirliyin rəsmi saytı, sosial media hesabları və kütləvi informasiya vasitələrində yayımlanması nəzərdə tutulur. Layihə çərçivəsində hazırlanan ilk videoçarx Gəncə şəhərindəki İmamzadə ziyarətgah kompleksinə həsr olunub. Qeyd edək ki, İmamzadə ziyarətgahı Gəncə şəhərinin təqribən 7 kilometrliyində, Gəncə Dövlət Tarix-Mədəniyyət Qoruğu ərazisində yerləşir. Kərpicdən tikilmiş türbənin ətrafında kiçik məscidlər, təkyələr, karvansara tipli evlər, alaqapı və köməkçi binalardan ibarət dini kompleks yaradılmış, onun ətrafına daş və kərpicdən hasar çəkilmişdir. Kompleksin içərisində xalq arasında “Göy günbəz”, “Göy məscid”, yaxud “Göy İmam” kimi tanınan türbə yerləşir. Ölkəmizin ən dəyərli memarlıq abidələrindən biri hesab edilən türbədə beşinci imam Məhəmməd Baqirin oğlu İbrahim dəfn olunub. Müxtəlif vaxtlarda dağıntılara məruz qalan İmamzadə ziyarətgahı 1946-cı ildən İmamzadə piri kimi fəaliyyət göstərib. Sonrakı vaxtlarda, xüsusilə Ümummilli lider Heydər Əliyevin Azərbaycana rəhbərlik etdiyi illərdə tarixi abidə kimi burada təmir-bərpa işləri aparılıb. Eyni zamanda, bu, sovet dövründə rəsmi dövlət qeydiyyatından keçmiş yeganə ziyarətgah olub. Dini abidə Gəncənin qədimliyini sübut etməklə yanaşı, şəhərin İslam aləmindəki yerini və nüfuzunu da göstərir. Ölkənin dini-tarixi abidələrinin tamamilə yenidən qurulmasına və gələcək nəsillərə çatdırılmasına həssaslıqla yanaşan Prezident İlham Əliyev bu kompleksə də xüsusi diqqət göstərib. Dövlət başçısının müvafiq sərəncamları ilə 2010-2015-ci illərdə burada təmir-bərpa işləri aparılıb, insanların inam və inanc yeri kimi üz tutduğu məbəd gözəl görkəm alıb. Məlumat üçün bildiririk ki, Mədəniyyət Nazirliyi tərəfindən ötən ilin noyabr ayında “Xristian irsimizi tanıyaq” layihəsi təqdim edilib və layihənin birinci mərhələsi artıq başa çatıb. Layihə çərçivəsində Azərbaycan ərazisində xristian dininə aid olan və dövlət tərəfindən qorunan məbədlər, kilsələr və ibadətgahlara dair qısa videoçarxlar hazırlanaraq ictimaiyyətə təqdim olunub. ..

27.04.2021 11:13

Əməkdar artist Baloğlan Əşrəfov dünyasını dəyişibTanınmış müğənni, Azərbaycan Respublikasının Əməkdar artisti Baloğlan Əşrəfov 2021-ci il aprelin 26-da 70 yaşında vəfat edib. Baloğlan Xanoğlan oğlu Əşrəfov 1951-ci il oktyabrın 8-də Masallı rayonunun Bədəlan kəndində anadan olub. Kənd məktəbində orta təhsil almaqla yanaşı, rayon musiqi məktəbində 5 illik tar kursunu bitirib. BDU-nun Filologiya fakültəsində ali təhsil alıb (1978), beş il kənddə müəllim işləyib. Əmək fəaliyyətinə 1971-ci ildə başlayan Baloğlan Əşrəfov el şənliklərində, televiziya proqramlarında çıxışları, özünəməxsus ifa tərzi, həzin səsi ilə tamaşaçı və dinləyici rəğbəti qazanıb. Müğənni musiqi sənətində uzunmüddətli və səmərəli fəaliyyətinə görə 2007-ci ildə Azərbaycanın Əməkdar artisti fəxri adına layiq görülüb. Baloğlan Əşrəfov aprelin 27-də Masallı rayonunun Bədəlan kənd qəbiristanlığında dəfn edilib. Tanınmış müğənninin əziz xatirəsi onun sevənlərin qəlbində əbədi yaşayacaq. Allah rəhmət eləsin. ..

26.04.2021 17:17

“Qədim mətnlər və klassik mənbələr erməni saxtakarlıqlarını ifşa edir” mövzusunda vebinar keçirilibAprelin 26-da Əqli Mülkiyyət Agentliyi və Mədəniyyət Nazirliyinin birgə təşkilatçılığı, UNESCO üzrə Azərbaycan Respublikası Milli Komissiyasının dəstəyi ilə “Qədim mətnlər və klassik mənbələr erməni saxtakarlıqlarını və uydurmalarını ifşa edir və ya işğaldan azad edilmiş ərazilərdə mədəni sərvətlərin sahibləri haqqında” mövzusunda vebinar keçirilib. Tədbir 23 aprel – Dünya Kitab və Müəllif Hüquqları Günü və 26 aprel – Beynəlxalq Əqli Mülkiyyət Gününə həsr olunub. Vebinarı giriş sözü ilə açan Əqli Mülkiyyət Agentliyi İdarə Heyətinin sədri Kamran İmanov bildirib ki, məkrli planlara görə, erməni dövlətində yeganə millət kimi qalan və yaşayan etnosun şüuru millətçilik dumanına bürünərək daha uğurla kök atmalı və bəhrələr gətirməli idi. Süni surətdə “müstəsnalıq” və “əzabkeşlik” haqqında miflər, digər xalqlara münasibətdə ambisiyalar və iddialar xalqın şüuruna yeridilərək təbii adilik alternativinin qarşısına sipər çəkir, “xüsusi missiya” mifi isə beynəlxalq hüququ, yəni müasir dünya quruculuğunun təməl daşı olduğunu rədd edir: “Bu növ mifologemləri dəstəkləyən, onlara yol açan hakimiyyət və ziyalı elita nəticədə özü də həmin uydurmaların qurbanına və dustağına çevrilir. Nəticədə hamı siyasi folklorun qəfəsinə düşür”. Agentliyin rəhbəri bildirib ki, Vətən müharibəsində qazandığımızın tarixi Zəfər nəticəsində bütün erməni uydurmaları dağıldı. Bunun bariz nümunəsi Ali Baş Komandanın rəhbərliyi ilə rəşadətli Azərbaycan Ordusu tərəfindən “yenilməz erməni ordusu” mifinin puç edilməsidir: “Biz faktiki olaraq bu ərazilərdə Azərbaycan xalqının məhv edilmiş maddi mədəniyyət irsi, dağıdılmış, yaxud tamamilə yer üzündən silinmiş müsəlman və türk mədəniyyəti abidələri ilə qarşılaşırıq. Tarixi həqiqət azərbaycanlıların keçmiş abidələrini qorumaq istəməməsində deyil, əksinə Alban xristian abidələrin ermənilər tərəfindən planlı şəkildə təhrif olunmasında, üzərindəki köhnə yazıların məhv edilməsi və abidələrin erməni mənsubiyyətinin “sübutlarına“ çevrilməli olan yeni yazıların həkk edilməsindədir”. Vebinarda çıxış edən mədəniyyət nazirinin müavini Sevda Məmmədəliyeva bildirib ki, Ermənistan işğalda saxladığı əzəli torpaqlarımızdan azərbaycanlıların izlərini tamamilə silmək məqsədilə 30 il müddətində milli mədəni irsimizi məhv edib və ya saxtalaşdırıb. İşğal dövründə Azərbaycan mədəniyyətinin beşiyi Şuşada olan 300-dən artıq tarixi memarlıq abidəsinin əksəriyyəti tamamilə dağıdılıb. Nazir müavini vurğulayıb ki, erməni işğalı zamanı bədnam qonşular tərəfindən mədəni irsimizə qarşı həyata keçirilən talançılıq və mənimsəmə faktları həmişə diqqət mərkəzində olub, bu problem müxtəlif platformalarda diqqətə çatdırılıb: “Dövlətimizin dünyada artan nüfuzu, gücü və qüdrəti sayəsində Azərbaycan həqiqətləri və milli mədəni irsimiz son illər beynəlxalq səviyyədə daha geniş təbliğ olunmağa başlamışdır. Bu mənada, UNESCO çərçivəsində fəaliyyətlərimizi xüsusilə vurğulamaq istərdim. Azərbaycanın Birinci vitse-prezidenti, UNESCO və İCESCO-nun xoşməramlı səfiri, Heydər Əliyev Fondunun prezidenti Mehriban xanım Əliyevanın böyük səyləri və şəxsi nüfuzu sayəsində Azərbaycanın mədəni irsi dünya miqyasında getdikcə daha çox tanınır”. Sevda Məmmədəliyeva qeyd edib ki, hazırda dövlətimiz yaşayış məskənlərinə və mədəni irsə qarşı analoqu olmayan 30 illik terrorun nəticələrini aradan qaldırmaq üçün sürətli bərpa-quruculuq işləri ilə məşğuldur: “Mədəniyyət Nazirliyi olaraq Şuşa, Cəbrayıl, Füzuli, Zəngilan, Xocavənd, Qubadlı, Ağdam və Kəlbəcər rayonlarını əhatə edən dövlət qeydiyyatında olan 313 tarix-mədəniyyət abidəsinin ilkin monitorinqi həyata keçirilmişdir. Bundan əlavə, həmin ərazilərdə yerləşən dövlət qeydiyyatında olmayan tarixi, memarlıq, arxeoloji əlamət daşıyan 113 obyekt (yeni aşkar olunmuş abidə) aşkara çıxarılmışdır. Müəssisələrin, demək olar ki, hamısı dağılmış vəziyyətdədir”. Nazir müavini çıxışının sonunda deyib: “Azərbaycan xalqının 30 ildən artıqdır ki pozulan mədəni hüquqları dövlətimizin öz qüdrəti hesabına bərpa olunmaqdadır. İnanıram ki, işğaldan azad olunmuş ərazilərdə böyük sürətlə aparılan təmir-bərpa işlərindən sonra öz yurdlarına qayıdacaq sakinlər Qarabağın əsl ruhunu da geri qaytaracaq və Qarabağ yenidən regionun yüksək mədəniyyət mərkəzinə çevriləcək”. Sonra təhsil naziri Emin Əmrullayev, insan hüquqları üzrə müvəkkil (Ombudsman) Səbinə Əliyeva, Xarici İşlər Nazirliyinin xüsusi tapşırıqlar üzrə səfiri, UNESCO üzrə Azərbaycan Milli Komissiyasının baş katibi Elnur Sultanov mövzu ilə bağlı çıxış ediblər. Daha sonra vebinarda professor Kamran İmanovun “Qədim mətnlər və klassik mənbələr erməni saxtakarlıqlarını və uydurmalarını ifşa edir və ya işğaldan azad edilmiş ərazilərdə mədəni sərvətlərin sahibləri haqqında”, AMEA-nın A.Bakıxanov adına Tarix İnstitutunun direktoru, professor Kərim Şükürovun “İşğaldan azad edilmiş sənət abidələri, daşınan və daşınmaz tarix və mədəniyyət abidələrinə qarşı erməni vandalizmi” və Əqli Mülkiyyət Agentliyinin eksperti Elşad Əlilinin “Qarabağın xristian abidələri barədə” mövzusunda məruzələri dinlənilib. ..

23.04.2021 17:35

Milli Kitabxanada “Cəmiyyətin intellektual inkişafında kitab və mütaliənin rolu” mövzusunda konfrans keçirilibAprelin 23-də Milli Kitabxanada Dünya Kitab və Müəllif Hüquqları Günü ilə əlaqədar “Cəmiyyətin intellektual inkişafında kitab və mütaliənin rolu” mövzusunda konfrans keçirilib. Tədbir Azərbaycan Respublikasının Mədəniyyət Nazirliyi və Milli Kitabxananın birgə təşkilatçılığı ilə gerçəkləşib. Konfransı giriş sözü ilə Milli Kitabxananın direktoru Kərim Tahirov açaraq əlamətdar günün tarixi barədə məlumat verib. Direktor “Ulu öndər Heydər Əliyev kitab və mütaliənin rolu haqqında” mövzusunda çıxış edib. Bildirilib ki, ümummilli lider mədəniyyətimizə, mənəvi dəyərlərimizə həmişə böyük qayğı ilə yanaşıb və bu diqqət milli-mənəvi dəyərlərimizi yaşadan Milli Kitabxanadan da yan keçməyib. 1995-1997-ci illərdə ulu öndər Milli Kitabxananı 4 dəfə ziyarət edib və ilk gəlişində bu kitabxanaya öz şəxsi kitabxanasından 300 nüsxəyə yaxın kitab bağışlayıb. Hazırda həmin kitablar kitabxananın Heydər Əliyev guşəsində yer alır. Konfransda çıxış edən mədəniyyət nazirinin birinci müavini Vaqif Əliyev öncə Dünya Kitab və Müəllif Hüquqları Günü münasibətilə Mədəniyyət Nazirliyi adından bütün kitabsevərlərə təbriklərini çatdırıb. Bildirib ki, yaradıcı əməyin məhsulu olan kitab bilik mənbəyi və onu nəsildən-nəslə ötürən bir vasitədir. Bu baxımdan, Mədəniyyət Nazirliyi müəllif hüquqlarının qorunmasına, nəşriyyat fəaliyyətinə xüsusi önəm verir. Vaqif Əliyev vurğulayıb ki, ulu öndər Heydər Əliyevin hakimiyyəti illərində onun kitab və kitabxana sahəsi, nəşriyyatlarla bağlı verdiyi müvafiq fərmanlar bu sahənin inkişafında mühüm rol oynayıb. Ümummilli lider ədəbiyyatımızın, mədəniyyətimizin, incəsənətimizin, milli-mənəvi dəyərlərimizin, kitab nəşri və müəlliflik hüquqlarının qorunması sahəsində ardıcıl tədbirlər görüb. Ölkəmiz müstəqillik qazandıqdan sonra isə Heydər Əliyevin rəhbərliyi ilə kitab nəşri və müəlliflik hüququ sahəsində zəngin qanunvericilik bazası yaradılıb. 1996-cı ildə “Müəlliflik hüququ və əlaqəli hüquqlar haqqında”, 1998-ci ildə “Kitabxana işi haqqında”, 2000-ci ildə “Nəşriyyat işi haqqında”, 2003-cü ildə “Azərbaycan folkloru nümunələrinin hüququ qorunması haqqında” qanunların qəbul edilməsi bu sahənin inkişafına öz müsbət təsirini göstərib. Ulu öndərin uğurlu siyasətini layiqincə davam etdirən Prezident İlham Əliyevin “Azərbaycan Respublikasında kitabxana-informasiya sahəsinin 2008-2013-cü illərdə inkişafı üzrə Dövlət Proqramı”nın təsdiq edilməsi haqqında, “Dünya ədəbiyyatının görkəmli nümayəndələrinin əsərlərinin Azərbaycan dilində nəşr edilməsi haqqında”, “Azərbaycanda kitabxanaların fəaliyyətinin yaxşılaşdırılması haqqında”, “Azərbaycan dilində latın qrafikası ilə kütləvi nəşrlərin həyata keçirilməsi haqqında” sərəncamları, eləcə də “Azərbaycan Respublikasının Müəllif Hüquqları Agentliyinin fəaliyyətinin təmin edilməsi haqqında” 6 sentyabr 2017-ci il tarixli fərmanı kitabın təbliği və müəllif hüquqları sahəsində uğurlu və sistemli tədbirlərin həyata keçirilməsinə təkan verib. Xarici İşlər Nazirliyinin xüsusi tapşırıqlar üzrə səfiri, UNESCO üzrə Milli Komissiyanın baş katibi Elnur Sultanov çıxış edərək tədbirin təşkilinə görə Mədəniyyət Nazirliyinə və Milli Kitabxanaya təşəkkürünü bildirib. Qeyd edib ki, UNESCO əlamətdar gün münasibətilə hər il çoxsaylı tədbirlər keçirir. Müasir dövrdə gənc nəslin elmə, biliyə olan marağının, kitaba olan tələbatının artırılması mühüm əhəmiyyət kəsb edir. Bakı Kitab Mərkəzinin direktoru Günel Anarqızı “Kitab və mütaliənin kütləviləşdirilməsində Bakı Kitab Mərkəzinin rolu” mövzusunda çıxış edib. O, mərkəzin kitaba olan marağın artırılması istiqamətində gördüyü işlərdən, keçirilən tədbirlərdən danışıb. Azərbaycan Yazıçılar Birliyinin katibi, “525-ci qəzet”in baş redaktoru Rəşad Məcid “Gənclər arasında kitab və mütaliənin təbliği” mövzusunda çıxış edərək bildirib ki, kitab bir nəslin o biri nəslə qoyub getdiyi mənəvi vəsiyyətdir. Konfransda daha sonra AMEA Mərkəzi Elmi Kitabxanasının direktoru, professor Məmməd Əliyev, Bakı Dövlət Universiteti Kitabxanaçılıq və informasiya fakültəsinin dekanı, dosent Ələmdar Cabbarlı və “Təhsil” nəşriyyatının direktoru Tural Axundovun çıxışları dinlənilib. Sonda qonaqlar “23 aprel – Dünya Kitab və Müəllif Hüquqları Günüdür” başlıqlı sərgi ilə tanış olublar. ..