ట్రావెలాగ్

వారాంతంలో.. ముత్యాలవానలో తడిసొద్దాం

వారాంతంలో..
ముత్యాలవానలో తడిసొద్దాం

జోగ్‌ జలపాతం.. ఓ అద్భుతం. నోహ్కలికై జలపాతం.. ఓ ఆశ్చర్యం. ఆ అద్భుతాన్ని దర్శించాలంటే కర్ణాటక దాకా వెళ్లాలి. మేఘాలయా వెళ్తే గానీ నోహ్కలికై కులుకులు చూడలేం. దూరభారం లేకుండా అలాంటి అనుభూతి దక్కాలనుకుంటున్నారా? అయితే మన దగ్గరున్న ముత్యాల జలపాతాన్ని చూసి రండి. అదెక్కడుందనేగా..! తెలంగాణ-ఛత్తీస్‌గఢ్‌ సరిహద్దులో దాగుందా జలసిరి. నిన్నమొన్నటి వరకు అక్కడో జలపాతం ఉందని చాలామందికి తెలియదు. ఆ జలధారల సోయగాలు ఇటీవలే వెలుగుచూశాయి. జయశంకర్‌ భూపాలపల్లి జిల్లా వెంకటాపురం మండలం వీరభద్రవరం శివారులో ఉందీ జలపాతం. 700 అడుగుల ఎత్తు నుంచి అలవోకగా దూకే జలాలు.. ముత్యాల్లా మెరిసిపోతూ ఆశ్చర్యాన్ని కలిగిస్తాయి. పాండవుల గుట్టల సౌందర్యాన్ని రెట్టింపు చేస్తూ ఈ జలపాతం సరికొత్త పర్యాటక విడిదిగా గుర్తింపు పొందుతోంది. గద్దలు ఎగిరేంత ఎత్తు నుంచి పడుతుండటంతో దీనిని గద్దలసరి జలపాతమనీ, ముత్యాల్లా మెరిసిపోతుంది కాబట్టి ముత్యాల జలపాతమనీ పిలుస్తారు. ఈ ముత్యాల జల్లులో తడిసి ముద్దవ్వాలంటే సాహసయాత్ర చేయాల్సిదే. వీరభద్రవరం నుంచి ప్రయాణమంతా అటవీ మార్గంలో ఉంటుంది. అయితే జలపాతం సౌందర్యం చూశాక.. కష్టమంతా మరచిపోయి పరవశించిపోతాం.

ఇలా చేరుకోవచ్చు
జలపాతానికి వెళ్లాలంటే ముందుగా వరంగల్‌కు గానీ, ఏటూరునాగారం గానీ చేరుకోవాలి. అక్కడి నుంచి జగన్నాథపురం మీదుగా వెంకటాపూర్‌ గ్రామానికి వెళ్లాలి. ఏటూరునాగారం నుంచి భద్రాచలం వెళ్లే బస్సులు వెంకటాపూర్‌ మీదుగా వెళ్తాయి. వెంకటాపూర్‌ నుంచి వీరభద్రవరం 8 కి.మీ దూరంలో ఉంటుంది. ప్రైవేట్‌ వాహనాల్లో వెళ్లాలి. సొంతవాహనాల్లో వెళ్లినా.. వీరభద్రవరం వరకే దారి సౌకర్యం ఉంది. మరో 8 కి.మీ ప్రయాణిస్తే గానీ జలపాతానికి చేరుకోలేం. అటవీమార్గంలో ట్రాక్టర్లు అందుబాటులో ఉన్నాయి. అవి కూడా జలపాతానికి కిలోమీటర్‌ దూరం వరకే వెళ్తాయి. అక్కడి నుంచి కాలినడక తప్పదు.ఈ జలపాతంపై పర్యాటక శాఖ ప్రత్యేక దృష్టి సారించి అభివృద్ధి చేస్తే బాగుంటుందని కోరుకుంటున్నారు సందర్శకులు

ఎస్‌. నర్సింహాచారి, న్యూస్‌టుడే, వెంకటాపురం

Tags :