Da miña hemeroteca

Nesta sección o lector pode ollar unha pequena selección de "pezas" da miña hemeroteca, que xa supera (a 6 de maio de 2015) as 495.000 páxinas de xornais diarios, semanarios, revistas, programas de partidos e boletíns, tanto en formato orixinal como fotocopiadas ou dixitalizadas (JPEG, TIFF, PNG, PDF...), de Ferrol, Galicia, España e algún país máis como Portugal, Francia, EEUU, Colombia, Arxentina, a antiga África ecuatorial francesa, a antiga Guinea española e até o antigo Congo francés!, salientando a colección completa do xornal madrileño Marca, do que teño absolutamente todos os números (día a día, páxina a páxina) da súa etapa como diario dende novembro de 1942 até decembro de 2008 así como moitos números de cando era semanario (1938-1942) e suplementos gráficos do mesmo da década de 1941-50; ou El Correo Gallego, xornal ferrolán entre 1878 e 1938 logo emigrado a Santiago de Compostela, do cal posúo todas as páxinas con información deportiva dende 1903 até 1970 e dende ese ano en diante de maneira fragmentada. Tamén podo destacar as coleccións -en case todos os casos completas- que teño dos desaparecidos As Color e Don Balón; de xornais galegos como La Voz de Galicia d`A Coruña, El Noroeste d´A Coruña; La Noche de Santiago de Compostela; Faro de Vigo, La Región de Ourense; El Balón d`A Coruña; Departamento de Ferrol; Atlántico Diario de Vigo; El Progreso de Lugo; El Orzán d`A Coruña; Diario de Pontevedra; ou El Pueblo Gallego de Vigo; dos excelentes rotativos deportivos bilbaínos Excelsior e Excelsius; As e Gol Diario Deportivo de Madrid; La Iberia de Madrid (onde atopamos as primeiras noticias nun xornal non ferrolán sobre fútbol en Ferrol, en 1892); o Odiel de Huelva; El Día de Palencia; El Imparcial de Madrid; El Punt de Xirona; La Vanguardia de Barcelona; o sorprendente Aire Libre de Santa Cruz de Tenerife; La Voz de Córdoba; o ABC nas súas edicións madrileña e sevillana; o Blanco y Negro de Madrid; El Luchador de Alacante; o Diario Español de Tarragona; o Diario de Lérida; El Debate de Madrid; o Deportes de Córdoba; o Región de Oviedo; El Nervión de Bilbao; o Campeón de Madrid; a mítica Hoja del Lunes de moitas cidades (Vigo, Barcelona, A Coruña, Cádiz, Xixón, Granada, Murcia, Madrid, Oviedo,...); Las Provincias de Valencia; o Voluntad xixonés; o estupendo Madrid Sport; o efémero -mais suculento- Gran Sport madrileño; o interesantísimo Murcia Deportiva; o entrañábel Gran Vida de Madrid; o enorme Mundo Deportivo de Barcelona;... Sería demasiado longo citalos todos porque son máis de cento sesenta.

Quero brindar, pois, este diminuto mosaico de imaxes, de capturas de crónicas, artículos, titulares, portadas e reportaxes referidos ao Racing Club de Ferrol e ao fútbol da cidade e a súa comarca no transcorrer do tempo para achegar con el só un anaquiño de parte das miñas fontes de datos e facer unha leve aproximación ao inmenso, rico e atractivo caudal de información que os arquivos xornalísticos nos proporcionan aos historiadores deportivos. Periodicamente, e nunca mellor dito, irei agregando capturas a esta sección.